أهلا بيكم في الحلقة رقم ١١ من برنامج مفاتيح النجاح

ومفتاح النهاردة بعنوان: خليك شخص معدي… آآآآآتشششووووووو

العدوى … هي إنتقال الحالة من شخص للآخر

لو حد عنده برد, و الفيروس وصل من عنده لعندك… إحتمال كبير أوي يبقى عندك برد زيه بالظبط… بالعدوى يعني

لو شخص عنده مرض معدي… وقربت منه… هايوصلك المرض ده بالعدوى

لو شخص عنده مرض جلدي… وقربت منه… … هاينتقل لك المرض الجلدي ده بالعدوى

و … و …

و لو شخص بيبتسم وبيضحك… وقربت منه… يمكن أوي الإبتسامة والضحكة تتنقل ل وشك بالعدوى

أصل الموضوع ده كمان معدي

و لو شخص أخلاقه جميله أوي بزيادة… لدرجة إنها تكون معدية جدا… ياسلام بقى لو قربت منه… يمكن أوي العدوى توصلك

و لو شخص بيبيع عطور جميلة و دايما بتروح عنده… بالعدوى هايكون لك عطر طيب… حتى لو ما اشتريتش منه أي عطور… بالعدوى هايكون لك عطر جميل

و لو شخص جميل أوي وبينشر الخير… وقربت منه… الخير هايصيبك بالعدوى

يااااه… دا الموضوع جميل أوي والله

إنت أوقات كتيرة أوي بتكون محتاج قنبلة نووية تنفجر جانبك علشان تقوم تعمل الشغل اللي وراك وتبطل الحاجات الغلط

ما يمكن إنت بس محتاج عدوى جميلة من حد جميل كده … وتوفر على نفسك التعب والمجهود والقنابل النووية كلها

ببساطة خالص, شوفلك واحد معدي يكون جميل كده … وحاول تتلزق فيه غصب عنه مش بمزاجه… خليك جانبه … مش بمزاجه هو على فكرة… بمزاجك إنت

حاول تتعدي يا أخي

حاولي تشوفي بنوتة جميلة تكون عفيفة أوي وعندها حياء كبير… وإلزقي فيها غصب عنها… هاتتبسطي أوي والله

إلزقوا في الناس الشاطرة والمجتهدة والمبتسمة والرياضية والملتزمة والبارين بآبائهم وأمهاتهم والناس الناجحة والناس الفرحانة… الموضوع معدي والله وإن شاء الله ينتقل لك الخير بالعدوى

وإنت كمان… خليك معدي

إمشي اعطس في وش الناس حاجات جميلة غصب عنهم

مش تعطس برد أو فيروسات… لأه… إعطس في وشهم غصب عنهم كلمة حلوة

إبتسامة في وشهم غصب عنهم

نكتة بايخة وقولها من قلبك وإنت فرحان وإقعد إضحك على بواختها من قلبك… والله الموضوع معدي وهاتنشر الفرحة والسعادة على قلبك وقلوب الناس

لما تلاقي أي حاجة في الخير كويسة, إنشرها وخليك معدي

ما تحرمش نفسك إنك تكون بتنشر العدوى في كل مكان

و اجبر نفسك تبقى مع الناس الجميلة

واصبر نفسك معاهم

وماتسيبهومش أبدا وتروح للناس اللي شكلهم من بره حلو… ومن جوه كآبة و تكبر وتعالى

خليك مع الناس اللي من بره بسيطة, ومن جوه دهب… وإوعى تسيبهم وتلزق في الناس اللي هدومها غالية, وهي من جوه رخيصة

مفتاح نجاح النهاردة اسمه: خليك معدي

و اقرأ ان شئت من سورة الكهف: أعوذ بالله من الشيطان الرجيم:

وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ ۖ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا ۖ وَلَا تُطِعْ مَنْ أَغْفَلْنَا قَلْبَهُ عَن ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا

يعني من الآخر كده… إلزق أوي في الناس الكويسة… أمر من ربنا

وإبعد عن الناس اللي مش كويسة… برضه أمر من ربنا

و طبعا طبعا طبعا… إوعى تنسى إنك تكون إنسان “معدي” طول العمر

وربنا يرزقك كده وتعدي الناس خير وفرح وسعادة… وربنا يرزقك بناس معدييين, ينقلوا لك العدوى هما كمان.

إفرد وشك الجميل ده… وخليه مفرود وجميل كده طول العمر

سلاااااام