https://www.youtube.com/watch?v=qYJHqm5qAZY

أهلاً بيكم في حلقة جديدة من أستديو أسلوب … النهاردة حلقتنا عن موضوع طلبتوه مننا علي انستجرام  اننا نتكلم عليه …
ااااااااه انستجرام !! سمعاك يالي بتقول ” هما أسلوب عندهم انستجرام أصلاً ؟؟ ” .. أيوة يا أستاذ عندنا اتفضل اعملنا فولو حالاً هتلاكي اللينك فى صندوق الوصف تحت ده بعد اذنك يعني .

المهم .. موضوعنا النهاردة هو عن إزاي أبطل ادمان الموبايل أثناء المذاكرة, أثناء الشغل او فى العموم و فى حياتنا الطبيعية

هنتكلم اولا عن طرق للتخلص من ادمان الموبيل اثناء المذاكرة…و المشكلة دي بتواجه معظم الطلبة,

 لأن من الطبيعي ان أي طالب يجيله احساس بالملل من المذاكرة  هيجري علي الموبايل عشان يسليه .. يمسك الموبايل و يعمل بيه أي حاجة ملهاش اي 30 لازمة المهم يضيع وقته و خلاص ..

هقولك امثلها عن اللي انت بتعمله بالموبيل خاصة اثناء المذاكرة,  بتتصل بصاحبك و تتكلمواعن مين كسب مين علي بابجي او قورت نيت .. أو تفتح انستجرام تشوف كل الستوريز لحد الآخر حتي لو وصلوا 100 ستوري .. أو تفتح الفيس بوك و تشوف كام لايك علي آخر بوست و كام لاف علي صورتك و انت في داندي مول واقف قدام شجرة الكريسماس .. أو تكلم 100 واحد من أصحابه علي الواتس اب في وقت واحد .. أصله مقصر معاهم يا حرام و مكلمتهمش بقالك نص ساعة بحالها ..او تتابعي جروبات اصحابك و تفضلوا تتكلموا عن خناقة خروجة امبارح…..و الفيلم الجديد اللي نزل فى السينما و اللي لازم نشوفه  و تفضلوه علي الحال ده بقية اليوم و تضيعوا جزء كبير من وقتكم و تكرروا كمان نفس الحكاية تاني يوم …

ده اسمه ادمان موبيل مش إستخدام موبيل . ادمان مش إستخدام  …. صح و لا ايه يا أسلوبي ؟؟

أسلوبي (ماسك موبيل فى ايده):  أيوه أيوه حضرتك أنا من كثر ما بمسك الموبايل صحابي بقوا يقولولي يلا يا Nomophopia .. و ال  Nomophopia راح ال Nomophopia جاه .. هي ديه شتيمة ديه ولا ايه يا بشمهندسة ؟؟؟

لا يا أسلوبي و انت الصادق ديه مش شتيمة .. ده مرض خطير موجود علي مستوي العالم كله .. اسمه  Nomophopia .. و الباحثين شخصوا المرض ده لكل شخص بيخاف أنه يفقد موبايله او بطريته تفضي.. أوعنده اي قلق من البعد عن الموبايل … زيك كده يا أسلوبي …

و خد عندك بقي بقية الأمراض .. اللي عنده صداع و اللي عنده أرق و في  كمان ال  Text neck   و ده بيجي للناس اللي بتتني رقبتها ليل و نهاااار علي الموبايل ها يا أسلوبي

(اسلوبي يقول : اه يا رقبتي

 

   .. و في كمان Digital eye strain .. واللي بيسبب جفاف في العين و بلاوي ثانية كثيرة … هااااااااا أكمل ولا كفاية كده ؟؟

(عين اسلوبي تطلع لبره)

أسلوبي : لا لا خلاص حضرتك أنا حرمي الموبايل خلاص أهو

أيوة شاطر يا أسلوبي ..

 

نرجع لموضوعنا انت اتعودت تمسك الموبايل كثير .. بسبب و بدون سبب .. و ده موضوع خطير .. لازم تبدأ في السيطرة عليه .. بس ازااااااااااي ؟؟

هقولكم عل طرق سهلة  تقدرنقضي بيها علي ادمان الموبايل اثناء المذاكرة :

 

– تعالوا نفكر مع بعض الاول انت بتستخدم الموبيل فيه ايه تاني غير السوشيال ميديا ؟؟؟ ..
أكيد الآلة الحاسبة عشان تحل بيها مسائل ال Math   اوتستخدمه كساعة او منبه
طب ايه رأيكم نرجع للماضي شوية .. وبدل الموبايل نستخدم  آلة حاسبة عادية جداً و منبه عادي من اللي بيتباعوا في المكتبات  .. بلاش تلاكيك بقي
انت لو مش عارف تبعده عنك … ممكن حد من أهلك في البيت يساعدك سواء باباك مامتك أخوك أختك أي حد ياخده منك و يديهولك في وقت البريك فقط .. لكن انت كبير و شطور و هتسيبه من نفسك ان شاء الله ..

و  لو أنت مش قادر خالص انك تستغني عن الموبيل و قوة احتمالك ضعيفة ,ممكن كمان تنزل أبيلكشنز تساعدك في قفل كل الأبليكيشنز اللي علي الموبايل فترة معينة لحد ما تذاكر.. و هنوريكم عملي دلوقتي  ازاي الأبليكيشنز ديه بتخليك مجبر انك متفتحش أي أبليكشن تاني ..

 
( الجزء اللي جي تصوير  live 

1- أول أبليكشن هو  OFF TIME و اللي لما بتنزله .. لازم تحدد وقت محدد .. يعني مثلاً انت هتذاكر 45 دقيقة .. يبقي تحدد الوقت 45 دقيقة على الأبلكيشن و تقفل الموبايل .. و أول ما تفتح الموبايل تاني و تطلع برة الأبليكشن .. هيديك صوت انذار عالي جداً يفكرك انك محدد وقت للمذاكرة …

2- APP BLOCK / SOCIAL LOCK و دول هيقفلوا كل الأبيكشن الي ليها علاقة بالسوشيال ميديا .. و ممكن كمان يخليك تقفل كل Notifications في كل الأبليكيشنز

 

4- FOREST  وده أشهرهم .. ده أبليكشن بيعتمد علي مدة قفلك للموبايل .. كل ما تقفل الموبايل لفترة طويلة .. انت بتزرع شجرة في الأبليكشن .. و كل يوم تقفل الموبايل أكثر الشجر بيكثر لحد ما تكون غابة أشجار .. لكن لو فتحت الموبايل مدة طويلة .. الشجر بيموت .. و ده أبليكشن فكرته حلوة جداً جربوه
و دول هيساعدوك انك حتي لو مسكت الموبايل مش هتعرف تفتح أي أبليكشن يضيع وقتك ..

و لو نفسك تتخلص من ادمان الموبايل و تخلي ده أسلوب حياتك و مش شرط تكون طالب ممكن تكوني ربة منزل او ممكن تكون موظف عادي و عندك ادمان للموبيل و نفسك تتخاص منه.. يبقي ركز في الطريقتين دول ..

1- انت ممكن تقفل ال Notification لأي أبليكشن .. زي مثلاً ال facebook  … أنا واحدة من الناس مهم عندي أعرف مواعيد أعياد ميلاد أصحابي … و المناسبات المهمة .. حفلة مثلاً أو ندوة .. و كمان مهم عندي أعرف مين بيعملي أدد و مين بيعمل Share لحاجتي … فأنا هقفل كل حاجة ثانية علي ال FB و أسيب اللي يهمني بس مفتوح … و بكدة أي Notification مش مهمة تيجي علي ال Fb أنا مش هشوفها .. و مش همسك الموبايل أضيع وقتي في حاجات مش مهمة بالنسبة ليا .. 

ممكن أنت كمان تقفل ال Notification اللي مش مهمة زي مثلا جروب معين علي ال Whatsapp  أو تقفل ال Notification بتاعة الانستجرام وقت المذاكرة …
و الموضوع سهل خالص كل ما عليك انك تفتح ال Settings بتاعة أي أبيلكشن و تحدد انت عايز تقفل ايه و تفتح ايه .. بالمنظر ده ….  (Live )
الموضوع ده هيفرق معاك جداً … حاول تجربه … أنا متأكدة انك مش هتمسك الموبايل بنفس المعدل خالص .. 

 

2- خصص وقت محدد في اليوم للسوشيال ميديا ..  يعني ممكن آخر اليوم تدخل علي ال Fb أو Insta أو أي سوشيال ميديا بس لفترة تحددها لنفسك .. يعني تقول لنفسك ½ ساعة فقط في اليوم سوشيال ميديا و اذا دخلت في أي وقت ثاني غير اللي حددته لنفسك طلع 20 جنيه لله .

 

دول كانوا نصائح للقضاء علي ادمان الموبايل .. و خليك فاكر .. ان الموبايل ده آلة .. انت اللي بتتحكم فيها .. متسمحش أبدأ انها تتحكم فيك و في عقلك و في يومك كله ..
لأن زي ما هو مهم و ليه منافع .. لكن أضراره أكبر  بكثير لو استخدمناه غلط ..

ماتنساش تعمل شير للحلقة ديه لكل أصحابك .. عشان يستفادوا هما كمان
و أشوفكم و حلقة جديدة من أستديو أسلوب ..