المذاكرة من أول الترم الجديد: ٣ خطوات ل قتل التسويف والتأجيل والكسل في المذاكرة فورا

الكسل و التسويف و التأجيل في المذاكرة هما السبب في كرهك للمذاكرة وعلشان كده, إحنا في أسلوب بنقدم ٣ خطوات محددين لمحاربة تسويف المذاكرة فورا و البدأ في المذاكرة من بداية الترم الجديد الخطوة الأولى: حضر و أستعد للعمل من قبلها – خطط للعمل المهم قبل ما تحاول تبدأ فيه الخطوة الثانية: شارك تخطيطك مع شخص آخر الخطوة الثالثة: ابعد عن اي أشياء او اشخاص تشتتك عن انجاز أعمالك المهمة

كورس تعلم صناعة فيديوهات كارتون أنيميشن والتربح منها مثل قنوات أسلوب https://bit.ly/osloop-animation-course-ytcom

الحلقة رقم ١٤ من أسلوب في دقيقة: المذاكرة ليلة الإمتحان: https://bit.ly/osloop-in-a-minute-014-study-for-exams-02

 

ماما: أحمد يا أحمد مش هتقوم تذاكر يا حبيبي ؟ أحمد : مش بحب حد يقولي قوم ذاكر ، أنا بحب أذاكر من نفسي ماما : بس يابني دي الامتحانات علي الأبواب ، هتتزنأ في الآخر و أعصابك تتعب ، علي ايه كل ده ما أنت قدامك فرصة ووقت أهو علشان تقدر تلم المنهج و تراجع كمان . أحمد : أنا عارف أنا بعمل ايه كويس يا ماما متقلقيش أنت بس ، هبدأ أذاكر من بكره ان شاء الله ماما: ربنا يهديك يابني

 

بعد مرور أسبوع 

ماما: أنا مش شايفاك بتمسك كتاب تذاكره ، أنت علي طول علي الموبايل ، ينفع كده ، ولما تيجي تتزنأ في المذاكرة في الآخر هتعمل ايه ! أحمد: أنا بنزل دروسي و بعمل اللي عليا .. لما أرجع البيت بقي عايز أرفه عن نفسي و أخد بريك شوية ، ماتقلقيش يا ماما لسه في وقت أنا عارف أنا بقولك ايه ماما : ربنا يهديك يابني

بعد مرور شهر ( فاضل يومين علي الأمتحان  )

ماما: أحمد أنت برضه مش عايز تذاكر؟ امتحانك بعد يومين هتلحق تذاكر امتي ؟ أحمد : ايه بعد يومين ؟؟!!! ألحقوني يا أسلوب انا أتزنأت في المذاكرة مفيش حل سحري أقدر أذاكر المنهج كله في يومين و أنجح ؟ 

لو الموقف ده عدى عليك كطالب قبل كده ، يبقي الفيديو ده ليك .. “التسويف” 

اهلا بيكم في حلقة جديدة من ستوديو اسلوب

حلقتنا النهارده هنتكلم فيها عن التسويف او procrastination معني التسويف أنك تقعد تأجل أي عمل مهم أنت محتاج تقوم تعمله دلوقتي بس بتأجل فيه زي المذاكرة طبعا احسن مثال، أو انك  تتحرك و تسعي علشان تقدم في وظيفة ، أو في شغلك عندك بروبوزل أو presentation محتاج تعملها و عمال تأجل في كتابته كل شوية ، أو حتي مشوار مهم عمال كل شوية تقول هروح الأسبوع اللي جي و الاسبوع اللي جي تقول اللي بعده هكذا ، أو بالنسبة لحالتي انا شخصيا عمالة ااجل في كتابة سكريبت لحلقة أسلوب جديدة و بقالي أسبوعين أأجل في كتابةالحلقة يعني أنا نفسي كمان بقع في فخ التسويف .. علشان كده قلت اني لازم ألاقي له حلول و أشاركها مع  أصدقائي الأسلوبيين 

فيه أسباب كثيرة بتخلينا نأجل أي عمل مهم محتاجين أننا نقوم نعمله 

أول سبب : رغبتنا الملحة و الدائمة اننا نشعر بالراحة (أحنا عايزين دايماً نبقي مرتاحين ، عايزين دايماً النتائج تجلنا بدون أي مجهود مننا كبير ) عايزين دايماً الأسهل  و طبعاً الأسهل انك تقعد علي الكنبة ، تلفيونك في ايدك , انترنت موجود ، و أنت كده تمام ، ضيع وقتك براحتك ، فيسبوك ، انستجرام ، تويتر ، يوتيوب ، عيش لحظات تضييع الوقت السعيدة اللي بيتبعها الشعور الكبير بالندم ، و الصداع اللي بينتج عن قعدتك بالساعات قدام شاشة التليفون . و ده بيبقي أريحلك و من أن انت تقوم يا حرام من قعدة البلاي ستشن اللي ما تتعوضش و تشتغل علي الحاجات المهمة اللي وراك ، الحاجات اللي هتفرق في حياتك و مستقبلك محتاجها. 

للاسف مش بنضطر نلتزم و ننجز الاعمال المهمة غير لما نتزنأ فى الوقت, ويبقى ورانا امتحان تاني يوم او تسليم مشروع تاني و هكذا … لازم دافع قوي اوي يخلينا نتحرك من ماكانا و نقوم نشتغل احنا ممكن نحل موضوع التسويف ده ازاي من غير ما يكون فيه زنئة او الاضطرار ؟؟ ..

 عندنا 3 طرق مهمين :

أول طريقة : “حضر و أستعد للعمل من قبلها ” أو ” خطط للعمل المهم قبل ما تحاول تبدأ فيه “

من الأسهل علي أي حد مننا أنه يبدأ أي عمل أو يشتغل أي شغل لو مخطط ليه من قبل كده يعني مثال .. لو محتاج الاسبوع ده تذاكر، يبقى خطط الأسبوع ده زي ما بتخطط للرحلات و الفسح كده ، انت طبعا شاطر اوي في الموضوع ده. خلي كأن المذاكرة مشروع هتشتغل عليه لمدة أسبوع.

موضوع التخطيط ده هيغير حياتك حتي في أي حاجة ثانية غير المذاكرة ، أي حاجة عمال تأجلها و مستقبلك محتاج أنك تبدأ تاخد خطوة البدأ فيها اعمل لها خطة

 

لو طالب متخرج جديد وعمال تأجل أنك تدور علي شغل و تقدم في شركات مثلاً  , خطط للموضوع ده يشملها كتابة سي في جيد, اختيار الشركات المناسبة, استشارة الاقارب و الاصدقاء و تحديد الاشخاص اللي ممكن تساعدك و هكذا  و انت كمان بتسعي خد كورسات تعلي من السي في بتاعك في نفس الوقت. ما تستناش تاخد الكورسات علشان تقدم علي شغل.

عارفين التخطيط ده عامل زي project plan ..يعني زي ما بتخطط لاس مشروع كده و احب اوضح ان فيه فرق بين التخطيط و كتابة المهام اليومية 

التخطيط يشمل صورة أكبر و اشمل بكثير و كتابة المهام أو ال todo list مجرد جزء واحد من التخطيط

 

التخطيط  هو أنك تشوف الصورة كاملة لحد ما تنجز العمل

 

مثال للتوضيح أكثر  

تعالوا نعمل مع بعض خطة للمذاكرة لمدة أسبوع .. مش هتكتفي بمجرد انك هتكتب جدول يومي فقط للمذاكرة خلال الاسبوع ده  لأ أنت كمان هتحتاج تجاوب علي الأسئلة دي علشان الصورة توضح و تخطيطك يكون كامل – هتسأل نفسك مثلا: أنا بعد مذاكرة أسبوع هتكون الحصيلة النهائية ايه .. هكون خلصت جزء قد ايه من منهج مادة ايه و يبقي كده فاضل لي كام أسبوع علشان أخلص منهج مادة معينة . و كمان لو مخلصتش المذاكرة اللي أنا محدد انيأخلصها في الوقت ده ، محتاج تعمل ايه ك Backup plan أو plan B او خطة البديلة.  وكده هيكون فاضل لي قد ايه وقت علشان أخلص المنهج كله؟

 لازم الصورة الكبيرة تكون مكتملة عندك ، زي أي تخطيط لأي مشروع

الصورة النهائية لازم تكون واضحة و كل ما تكون الصورة لمذاكرتك و تخطيطك لمذاكرتك واضح ، كل ما هيكون عندك ثقة أكثر و انت بتذاكرة ، و حماس أكثر للمذاكرة و هدوء لعصاب كمان

أعتبر كل مادة عندك محتاج تذاكرها مشروع قائم بذاته ، مشروع تخطط ليه كويس 

حتي مذاكرة ليلة الامتحان لازم تكون عامل لها خطة ، لو بدأت تذاكر عشوائي و تفتح المنهج من أوله ليلة الامتحان و تذاكر درس درس ما أعتقدش أبدا انك هتقدر تراجع كل المنهج ليلة الامتحان 

بس لو عندك تخطيط جيد لمشروع ” مذاكرة ليلة الامتحان ” هيكون عندك ثقة أكثر و هيكون ماعندكش توتر و لا خوف و اعصابك هتكون هادية

” أتكلمنا قبل كده عن مذاكرة ليلة الامتحان في حلقة من حلقات أسلوب في دقيقة حلقة رقم 14 ” 

لينك الحلقة في صندوق الوصف.

الطريقة الثانية : 

“شارك تخطيطك مع شخص آخر” 

شارك خططك للمذاكرة الشهر ده مع مامتك ، اخوك ، صديقك ، خالك 

أطلب منهم يتابعوك ، يفكروك ، يشاركوك ,, لما تشارك خططتك مع شخص ذو ثقة هتكون مطمن أكثر و هتحس أنك مش لوحدك 

شارك خطتك أنك تدور علي شغل مع باباك أو أي شخص تثق فيه 

شاركي خطتك لفقدان الوزن مع صديقتك و خططوا مع بعض هتفقدوا وزن قد ايه في خلال قد ايه و ازاي 

هتلاقوا نفسكم شجعتم بعض و الموضوع بقي التزام و جد أكثر لأنه هيخلق نوع من التنافس بينكم و هتنتظروا تشوفوا مين اللي وصل للنتيجة أسرع من الثاني .. 

الطريقة الثالثة : 

“ابعد عن اي أشياء او اشخاص تشتتك عن انجاز أعمالك المهمة “

السبب الرئيسي في أننا بنأجل انجاز الأعمال المهمة هو اننا حوالينا أشياء كثيرة بتسحبنا و تشتتنا و تشغلنا 

“نصيحة شخصية ” : لا تعتمد أبداً علي قوة ارادتك ، يعني ماينفعش تسيب تليفونك قدامك و تقول انا عندي قوة ارادة و هقدر أني مامسكش التليفون أثناء المذاكرة 

أو انك تملي درج مكتبك شوكلاتة و شيبسي و تقولي أنا عندي ارادة و هقدر اني حتي لو حسيت بالجوع ماكلش الحاجات دي “قبليني غيرك كان أشطر” 

أو تخلي البلاي ستيشن متوصل و جاهز علي اللعب و تقول أنا عندي ارادة و هقدر أقاوم اني أقوم و العب أثناء المذاكرة و تقول لنفسك ” طب ماتش واحد بس و أقوم .. و تلاقي نفسك أتسحبت و تم استدراجك اليوم كله لعب بلاي ستيشن

 ” أقطع عرق و سيح دم ” 

شيل البلاي ستيشن تماماً من قدامك ، حطه في الدولاب و أقفل عليه بالمفتاح و أدي المفتاح لمامتك أو باباك أو حتي صحبك في المدرسة .

الموبايل نفس الوضع ، خلي مامتك تخبيه و أعمل حسابك تأخده فقط لمدة ساعة واحدة قبل النوم لما تكون خلصت اللي وراك . 

اي عامل من عوامل التشتت أو أي مانع بيمنعك عن انجاز المهام المهمة اللي موجودين في حياتك حاول تبعد عنها لحد لحد ما تيتم انجاز المهام … وخليه لايف ستايل أو أسلوب حياة 

و علي فكرة مش شرط الأشياء اللي بتمنعك عن انجاز المهام يكونوا عوامل تشتت فقط ، ممكن كمان موانع في صورة أشخاص .. 

شخص وجوده في حياتك بيمنعك أنك تحقق النجاح ، شخص بيضيع لك وقتك مالوش هدف أو طموح ، أبعد عن الأصدقاء اللي بيجروك أنك تضيع وقتك و بيمنعوك من الوصول لأهدافك . 

خليك واعي و أعرف مصلحتك فين ، وأقف و قول بشجاعة ” لأ مش هقدر ” “لأ عندي شغل ”  “لأ عندي أعمال مهمة لازم أنجزها” “لأ عندي مذاكرة ” 

و أخيراً التسويف أكبر عائق ممكن تلاقيه في حياتك بيعطلك عن النجاح ، تغلب عليه بالتخطيط ، و مشاركة خطتك ثانياً والبعد عن عوامل التشتت ثالثاً 

ايه رأيكم تبدأوا تخططوا للترم الجديد علشان تبدأوا النصف الثاني من العام الدراسي و أنتم بتشعروا بثقة أكثر ، وضوح أكثر , توتر أقل و قلق وعبأ أقل من المذاكرة . 

بطلب منكم تعملوا شير للحلقة دي لكل أصدقائكم و في كل مكان علشان يستفادوا هما كمان و يقدروا يتغلبوا علي التسويف في حياتهم . 

أتمني تنشروا الحلقة و تعملوا لأسلوب Follow علي انستجرام 

اللينك موجود في صندوق الوصف أسفل الفيديو زي كل مرة . 

تقدر تتعلم من الصفر للإحتراف طريقة عمل فيديوهات كارتون أنيميشن إحترافية زي الفيديو ده من الكورس الخاص بتعليم طريقة عمل فيديوهات كارتون أنيميشن والتربح منها مثل قنوات أسلوب من الرابط التالي:  https://bit.ly/osloop-animation-end-of-year-udemy-announce-website