مليش نفس أذاكر وماليش نفس أشتغل… في حاجز بيني وبين المذاكرة والشغل

أعمل إيه؟؟؟؟

أهلا بيكم في الحلقة رقم ٥ من برنامج أفكار أسلوب

وحلقة بعنوان: كسر الحاجز النفسي للشغل والمذاكرة

يااااااااي (صوت تصفيق من الجمهور)

بعد غياب أكتر من ٩ شهور من توقف برنامج أفكار أسلوب

كان الراجل اللي بيكتب وبيقول الحلقات عنده شوية أعطال… وديناه التوكيل وغيرناله كبالن وموتور وشكمان

وهو دلوقتي زي الفل… عنننننننن …. عننننننننن

من الآخر كده… عندك مذاكرة أو شغل (أو الإتنين مع بعض)… و مش طايق نفسيا تعمل حاجة منهم… عندك وقت والمفروض تقوم تشتغل أو تقوم تذاكر…. بس في حاجز نفسي بينك وبين المذاكرة والشغل

مش طايق… هافتح يوتيوب… هافتح فايسبوك… هانام شوية… هاكل… كوباية شاي… طيب أنام شوية… هاكلم صاحبتي في التليفون

ها هرش في ودني… هانام شوية… آآآآ هاتفرج على التليفيزيون… طيب أنام عشر دقايق بس… طيب فايسبوك تاني!

كل الناس بلا إستثناء بيجي عليها الوقت ده

ساعات كتيرة جدا جدا جدا, بيكون في حاجز نفسي كبير بينا وبين المذاكرة

يبقى أنا قاعد دلوقتي, وعندي مذاكرة

وأدامي الكتب وأدوات المذاكرة

وممكن أذاكر

لكن… بيكون في حاجز نفسي بيمنعني

مليون حاجة بتصرخ في دماغي إن لأهههههههه

بلاش

إفتح فايسبوك بسرعة بص على صورة بس

إفتح يوتيوب بسرعة شوف فيديو واحد بس يفتح نفسك

هانام… أيوة… هانام… أنام…

النوم بالمناسبة هو أجمل طريقة إحنا بنهرب بيها من المذاكرة

لأنه هروب من المذاكرة بدون الإحساس بالذنب اللي بيجي مع باقي أنواع الهروب

خاصة بقى لما بنقول: هانام ساعة واحدة بس

وأقوم أكسسسسسر الدنيا

أيوة … إنت بتعمل كده… ومفيش حد مش بيعمل كده

هانام نص ساعة

هانام عشر دقايق

وطبعا….. بتقوم تاني يوم

وبتكرر الموضوع ده يوميا… وبيبني إرتباط شرطي إنك لما تيجي تذاكر, يكبس عليك النوم حتى لو إنت لسه صاحي من النوم

————

إحنا مش بنعترض على إنك تاخد وقت ترفيه أو حاجة

إحنا بنتكلم عن الحاجز النفسي اللي بينك وبين المذاكرة… اللي إنت سايبها وقاعد تتفرج علينا دلوقتي

الكلام ده حتى لو إنت طالب متفوق جدا

أنا في طريقة فرقت معايا جدا جدا جدا, وهاحكيلكم عليها في قصة حقيقية حصلتلي وغيرت حياتي فع

أنا كنت في كلية هندسة قسم كمبيوتر, وكانت المواد عندنا معقدة جدا, وتسليم برامج ومشاريع أسبوعيا

وبرغم إني كنت بجتهد مش أقل من ٢٠ ساعة يوميا وبذاكر بذكاء وبخطط مدروسة قبلها بكتيييير

إلا إن كان بيجي عليا أوقات بكون جيبت فيها أخري

خلاص… مش قادر يا نفيسة… بطني ها ترشق

مش قادر أبص للكتاب… مش قادر أمسك ورقة وقلم… وكان ربنا بيحل الموضوع ده من عنده بطريقة أو بأخرى

لغاية لما حصلي الموضوع ده ليلة إمتحان مهم جدا

قاعد ليلة الإمتحان, مش قادر أفتح كتاب

نفسيا بس مش أكتر… عندي طاقة وعندي أسباب مهمة إني أذاكر… بس مش طايق

أنا لازم أذاكر منهج كامل في يوم… ونفسيا مش قادر

ربنا ألهمني بحاجة

كنت لسه شاري رزمة ورق أبيض سادة جميل كده

وكان معايا قلم أسود بحبه

قولت لنفسي: خلااااااص… أنا كده أو كده مش هذاكر

أنا نفسيا مش قادر أفتح وأذاكر

مفيش أدامي أي إختيارات

خلااااص… مفيش مشكلة, أنا هاخد راحة ٤ ساعات كاملين… أجازة, وبعدها ربنا يسهل

وقولت لنفسي: أنا في الأجازة دي هاعمل أي حاجة تكون مسلية

قولت… أنا مش خسران حاجة, أنا في أجازة ومش هذاكر

هاجيب الورق الأبيض اللي شكله حلو ده

وهاكتب آخر محاضرة آخدتها كاملة… وهاقعد أشخبط وأرسم أسهم وأتسلى… مش مذاكرة خالص

وفعلا عملت كده… بدأت أكتب آخر محاضرة…

كانت مادة تفاضل و تكامل (ممكن تعتبرها مادة رياضيات) وبدأت أنقل المسائل وحلها بدون أي فهم أو تفكير… بنقل وبكتب بس

وماكنتش فاهم أي حاجة خالص … بس إيه المشكلة…. إن شالله ما فهمت حاجة

أنا في وقت راحة وبكتب بس وبمشي إيدي… بنقل بس

بعد حوالي ١٠ دقايق …  لقيت نفسي دخلت في المود وإتشجعت ونفسي إتفحت والحاجز النفسي إتكسر… وكمان لسه أدامي كذا ساعة في وقت الراحة… يااااي

كملت بنفس الطريقة دي… ولما ال ٤ ساعات اللي أنا كنت عاملهم لنفسي راحة خلصوا…

كنت خلصت مذاكرة كتيييييرة جدا جدا جدا بفهم وتركيز وإستيعاب

ولقيت نفسي في الوقت اللي أنا كنت محدده لنفسي علشان أبدأ لسه مذاكرة… مخلص حمل كبييير أوي من عليا… ومش باقي غير حاجة بسيطة جدا… وأنا لسه في بداية الوقت اللي محددة للمذاكرة

وطبعا لو ماكنتش ذاكرت ال ٤ سعات اللي فاتوا… كان زماني لسه هابدأ وكنت لسه برضه داخل الحاجز النفسي وكنت هاكون نفسيا أسوء جدا لأني كنت هاقول: يا ريتني ذاكرت من ٤ ساعات… أنا كده هاضيييييييييييييع

واااااو… التجربة دي واليوم ده عمرهم ما راحوا من تفكيري ولا ذاكرتي من يوميها

لأني من اليوم ده من ١٤ سنة بالظبط وأنا بنفذ الطريقة دي في أي شغل ورايا مهما كان, علشان أكسر الحاجز النفسي بيني وبين الحاجة اللي المفروض أعملها

حتى وأنا بشتغل مهندس برمجة.. يعني حاجة مفيش ليها علاقة بالمذاكرة ولا الكتابة خالص… وأنا بشتغل مثلا في مشروع, ومش طايق أكتب كود برمجة… بقول لنفسي… ولا يهم

ورقة وقلم… وبكتب جزء من كود المشروع بإيدي للرفاهية

بنقل كود من على الكمبيوتر أدامي للورق… حاجة مفيش ليها أي ٢٠١٧ لازمة أو فايدة في الكوكب على فكرة…

بس بعد ١٠ دقايق من الجنان ده… بلاقي نفسي إتفتحت جدا على إني أبدأ أكتب كود على الكمبيوتر

حتى المشاريع اللي بقدم عليها والمفروض أعملها أناليسيز وديزاين (دراسة وتصميم)… بيكون في أوقات كتيرة جدا في حاجز نفسي كبير مانعني إني أبدأ شغل في المشروع

بدون تفكير أبدا… بروح أجيب ورق أبيض شكله جميل, وقلم… وأكتب أي ورقة من شرح المشروع…

الهدف هنا إني مش أفهم خالص

الهدف بس إني أكسر الحاجز النفسي بيني وبين الحاجة اللي عاوز أعملها

بدون أي ضغط نفسي عليا… يعني لو الموضوع جاب نتيجة… يبقى خير أوي

ولو ماجابش نتيجة… أنا كده أو كده ماكنتش هاذاكر أو ما كنتش هاشتغل … ماخسرتش أي حاجة… بالعكس

جرب الطريقة دي… وإكسر الحاجز النفسي بينك وبين المذاكرة أو أي حاجة عاوز تشتغل عليها

لأن مهما كنت طالب فائق أو متفوق… لازم هايعدي عليك أيام مش هاتكون نفسك تذاكر أبدا

مخك فعلا هايكون تعبان

وطريقة النقل والكتابة دي بتخليك تشتغل من غير مخ أو تفكير

بس بتصحي مخك من النوم والكسل بطريقة جميلة جدا… وبتخليك تدخل في المود.

تمااااام… شكلك فاهم يا نصه

إنت لسه معايا في الفيديو؟ ولا نمت مني؟

لو لسه صاحي… إضغط لايك حلو كده قبل ما تنام مني

وتعالى نكمل هري

على فكرة… إنت ممكن تقفل وتروح تجرب الطريقة دي دلوقتي… دي طريقة مجانية وحلوة

وإنت مش خسران حاجة… إنت كده أو كده بتتفرج على فيديو على يوتيوب أو فايسبوك… يعني مش خسران حاجة

تعالى بقى أكرررررررر ليك القصة تاني… علشان التكرار… طيب خالص و مش مكار

عندك حاجز نفسي بينك وبين المذاكرة أو بينك وبين أي شغل أو أي مشروع هاتعمله؟؟؟

ورقة وقلم… وإكتب ال ٤ خطوات دول

١- إدي لنفسك أجازة أو راحة لمدة ساعة أو ساعتين…

طالما كده أو كده مش هاتذاكر (إدي لنفسك وقت كافي جدا, ماتقولش ١٥ دقيقة راحة… إدي لنفسك وقت كفاية أوي حتى لو ٤ ساعات)

٢- إكتب جدول لنفسك, هاتعمل إيه بعد ساعات الراحة دي

يعني لو الساعة دلوقتي ٧ مساءا مثلا… قول أنا هابدأ مذاكرة الساعة ٩ بالظبط

وحط جدول: من الساعة ٩ ل الساعة ١٠ هاتعمل وتذاكر إيه بالظبط

وإكتب إنك هاتاخد راحة بسيطة مثلا… ومن الساعة ١٠:٣٠ ل ١١:٣٠ هاتخلص مذاكرة مادة تانية أو أي حاجة وراك

٣- كده إنت حطيت الجدول بتاعك… يالا بقى نبدأ الساعة أو الساعتين راحة بتوعنا

هات ورق أبيض أو كراسة أو أي حاجة إنت بتحب تكتب فيها

وهات أول حاجة حطيتيها إنك تبدأ فيها في الجدول اللي بعد ساعتين

وإبدأ إكتب وإنقل أي حاجة من أي درس

…. إنت كده أو كده في أجازة… مفيش مشكلة

إكتب شوية… وقلب شوية… وإتبسط شوية… هاتلاقي مخك دخل في الموود ونفسك إتفتحت

٤

– مفيش مشكلة خالص لو مافهمتش أي حاجة أو ما إستفدتش أي حاجة في الوقت ده (مع إن ده مستحيل يحصل طبعا)

بس… حتى لو ما إستفدتش… إنت كده أو كده… في وقت راحة….

يالابقى  يا كبير… إعمل شير للحلقة على يويتيوب وفايسبوك وواتس آب وإديها لأصحابك في الفصل وفي الكلية وحطها في كل الجروبس الشريرة اللي عندك

حتى جروبس الواتس آب بتاعة شنط البنات والهدوم

جرب الطريقة دي دلوقتي حالا… وإحنا منتظرينك ترجع تكتب لنا تجربتك بالتفصيل؟ هل نفسك إتفتحت على المذاكرة وإتشجعت؟

خليك كريم… خليك حبوب

صوت أسلوبي:

العلم يحلو كلما كتبته في ورقة وشخبطته

صوتك وحش يا أسلوبي

وعلشان كده أنا بجيب ورق أبيض وأقعد أكتب طالما مش فاهم حاااجة

ياعينيييي

وبكثرة التكرااااااااااااااااااااااااااااااااااااااااار يكثر نفعه

ماتجيب ورق وتكتب وتخلص بقىىىىى

وإكتبلنا إقتراحاتك لأفكار جديدة تحب تشوفها في أسلوب
 
إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على ‫#‏موبايلك‬ ‫#‏الأندرويد‬ من هنا:
وأسلوب ‫#‏أيفون‬ من هنا:
وده, ‫#‏موقع‬ أسلوب:
وده أسلوب على فايسبوك:
وده أسلوب على انستاجرام:
وأكيد أسلوب على تويتر: