خليك معروف بايجابيتك و روحك الحلوة

ابدأ يومك مع مبادئ أسلوب و المبدأ رقم ٢٠  من سلسلة ال٢١ مبدأ لحياة أكثر إيجابية

خليك معروف بايجابيتك

خليك مشهور بين أصدقائك وزمايلك أقاربك بايجابيتك و نشاطك و ابتسامتك وتفاؤلك و اقدامك على العمل و النجاح مهما كانت الظروف اللى حوالينا

الفترة دى للاسف معظم الناس عندهم حالة من الإحباط و اليأس و الكل بيتوقع الأسوأ أنه يحصل – و الكل دلوقتى بيرجع و يفتكر الأحوال زمان و أزاى كنا عايشين فى نعيم مع أن أيامها برده كان فيه ناس كتير حاسه بنفس الإحباط و اليأس اللى حاسين به دلوقتى, لو فضلنا نتابع الظروف السيئة و نركز عليها عمرنا ما هنتقدم و نوصل لحاجة , لكن إذا كنا فى وسط أى وضع عندنا شعور بالرضا و حسن الظن بالله فأكيد هنوصل هنوصل. والنجاح عمره ما بيكون فى يوم و ليلة

النجاح هو أنك كل يوم تضيف مجهود و تعب زيادة عن اليوم اللى قبله لان فى الاخر رصيد المجهود بيزيد و بنأتى بثماره أكيد

لو تلاحظ الناس اللى حواليك – شوف مين اللى دايما روحه جميلة و دايما عنده إيجابية و ابتسامته مش بتروح من على وشه … هتلاقيه أكثر واحد بيتقدم وينفد و يعدى من المشاكل والظروف الوحشة أكثر من أى حد تانى

خلاص تعبنا من كثر البكاء على الماضى و اللى ما وصلناش لحاجة غير التعب النفسي والعجز عن اننا نتقدم

زمان كانوا أجدادنا عايشين فى حروب ومجاعات و أمراض منتشرة وبالرغم من كده كان فيه ناس بتخترع و تنجح و تخدم البشرية – بدليل العلم و الأمان اللى وصلنا ليه دلوقتى

فى ظل أسوأ الظروف ممكن الانسان ينجح ويتقدم – لأن النجاح مش مرتبط بالظروف – النجاح مرتبط بس على أد أيه المجهود اللى الإنسان بيبذله و استمرارية إعطاء المجهود ده و الصبر على النتائج

لازم لازم اللى بيزرع – لازم يحصد … قانون فى الحياة عمره ما اتلغى, المشكلة بس أننا بنستعجل دايما على النتائج.

أحسن خدمة تقدمها لأصحابك أنهم يشوفوك دايما ايجابى و روحك حلوة كلها تفاؤل….خليك قدوة لكل الناس اللى تعرفهم

محدش بيحب الناس اللى بتنشر طاقة سلبية و بتفضل تشتكي على طول و بنفضل أننا نبعد عنهم, على عكس الناس اللى دايما بتشجعنا و تحمسنا و بتظن دايما ظن الخير تحت أي ظرف وفي أي وضع

واجبك كأم – أنك تخلى أولادك دايما شايفينك سعيدة وإيجابية – هتفرق كتير معاهم فى تكوين شخصياتهم و نفسيتهم

واجبك كصديق – أنك دايما تشجع أصحابك و تكون معروف بينهم بروحك الحلوة و ايجابيتك

واجبك كزوج – أنك تبطل البكاء على أحوال البلد فى وسط أهلك – علشان ده مش بيحسسهم بالأمان

واجبك كخريج جامعة – أنك تسعى وتجتهد و متستناش الظروف تتصلح -ساهم أنت فى أن الظروف تتصلح أبدأ بأي شغلانة مهما كانت و متعتمدش على حد

ده ايه ده يا اسلوبى أنت واقف فى الاشارة بتمسح عربيات ؟؟

أسلوبي: مش انت قولت – نقبل بأى شغلانة و أدينى بمسح عربيات فى الإشارة أهوه

أنا: دى مسمهاش شغلانة يا أسلوبي – دى شحاتة أنت أكيد فهمت كلامى غلط – يلا قدامى أمشى من هنا أحسن أنادي على المخرج……يلبسك فى الشاشة تانى

أسلوبي: لأ و على إيه

الشغل مهما كان صغير مش عيب طالما شغل شريف و ما ينفعش نتأمر و منرضاش, نبدأ بشغل متواضع بحجة أننا خريجي جامعة – ونفضل قاعدين فى بيوتنا و أهالينا بتصرف علينا ونكون لسه عبأ عليهم حتى بعد ما نتخرج

أنا: أسلوبي أنا مبسوطة اوى هو ده الشغل ولا بلاش

أسلوبي: ايه رأيك مهندس بترول أد الدنيا أهوه و مالى مركزى كمان وبكره البنزينة دى كلها هتبأى بتاعتى

أنا: ايوه كده – خلى حلمك دايما كبير

اعملوا لايك و شير للحلقة دى لكل أصحابكم

علشان تنشروا الخير والايجابية

و راجعوا كل المبادئ من تانى

و إنتظروا الحلقة الأخيرة من المبادئ  


وإكتبلنا إقتراحاتك لأفكار جديدة تحب تشوفها في أسلوب
 
إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على ‫#‏موبايلك‬ ‫#‏الأندرويد‬ من هنا:
وأسلوب ‫#‏أيفون‬ من هنا:
وده, ‫#‏موقع‬ أسلوب:
وده أسلوب على فايسبوك:
وده أسلوب على انستاجرام:
وأكيد أسلوب على تويتر: