برنامج أستوديو أسلوب – الحلقة الثانية: ٦ عادات يومية تخليك تنجح طول العمر

أهلا بيكم في أستوديو أسلوب

عاوزين النجاح يكون أسهل شويتين؟

الحل ببساطة, إن إحنا نخلي خطوات النجاح عبارة عن عادات في حياتنا

بمعنى…. إن إحنا نبني عادات السعادة و النجاح, و نهدم كل عادات الفشل والحبشتكنات

السؤال المهم؟ إزاي بطريقة عملية نقدر نبني عادات جديدة تنجحنا في حياتنا, وإزاي نقدر نواظب عليها؟

والإجابة ببساطة هي التكرار

الإجابة إيه؟ التكرار؟

إزاي هانقدر نبني عادات جديدة؟… التكرار

معلش… ممكن تكررلي الجزء ده تاني علشان أنا بنسى بسرعة

ال تكرار
ا ل ت ك ر ا ر

التكرار… بيعلم الشطار

إن إحنا ننكرر العادات دي كل يوم في حياتنا

هات ورقة وقلم وتعالى نبدأ ب ست عادات للنجاح:

العادة الأولى اللي لازم نبدأ بيها كل يوم الصبح

إن إحنا يكون عندنا نوتة صغيرة – نكتب فيها الحاجات اللي عاوزين نخلصها النهاردة
زي مثلا:
– مادة معينة محتاج تذاكرها النهاردة
– مشوار معين محتاج تروحه
– وراك تمرين رياضة
– تنظيف أوضة في البيت
– تدفع الإيجار

إكتب كل الحاجات اللي المفروض فعلا تعملها النهاردة, وكل ما تخلص حاجة منهم, طلع النوت الصغيرة دي من جيبك وأشطب عليها.

ممكن بدل النوت, تستخدم برنامج تودو على موبايلك… وتخليه يسانكرونايز مع الكمبيوتر… بس نوتة كفاية أوي وهاتقضي الغرض بنجاح

تاني عادة من عادات النجاح اللي عاوزين نبنيها هي:
إنك تكتب أسامي الناس المهمة في حياتك:
– باباك
– مامتك
– أخواتك
– مراتك
– الأوستاذ ربنا يخليهولك
– الننوس الصغير… ربنا يحفظة… لولوي

وتكتب كل واحد فيهم محتاج إيه علشان يكون سعيد
العادة دي هاتضمنلك أفضل النتائج والتأثير الجميل على حياتك وهاتشعر بسعادة كبيرة جدا لما تحققها

لأنها بتقوي علاقتك الشخصية وكمان المهنية مع الناس المهمة في حياتك

… برضه راجع حلقتنا اللي فاتت علشان يكون عندك فكرة أفضل عن النقطة دي:

ثالث عادة نجاح مهمة هي:
إنك تهتم بالأكل الصحي وتلعب رياضة كل يوم… حتى لو عشر دقايق… بس… كل يوم… التكرار… ها؟؟

وكمان تنتهز الفرص اللي ببلاش اللي هاتخليك تلعب رياضة ببلاش:
– إطلع على السلم… مش لازم أسانسير
– إنزل على السلم
– إركن عربيتك بعيد عن المكان اللي عاوز تروحه… وإمشي الباقي… دا لو لقيت ركنة طبعا smile emoticon
– نط من الأتوبيس قبل المكان اللي عاوز توصله … وإتمشى الباقي…

رابع عادة نجاح جميلة… اللي بجد هاتساعدك جدا في تغيير حياتك للأحسن:

إنك تقدر تجبر نفسك على إنك تقوم وتتحرك وتعمل الشغل اللي وراك في الوقت اللي القعدة على الفايسبوك طعمها أحلى
إنك تقدر تجبر نفسك إنك تقفل الفايس بوك وتقوم تذاكر
إنك تقفل الفايسبوك وتقوم تشتغل
إنك تقفل الفايسبوك حتى وتنام… المهم تقفله

سيلف ديسبلين زي ما بيقولوا

خامس وأهم عادة مهمة علشان سعادتك ونجاحك هي إنك:
تقول الحق والصدق مهما كانت النتائج

إنت لما بتكذب, حتى لو كذبة صغيرة, بتبيع كرامتك ببلاش
, وبتبقى إنسان جبان على الفاضي
, وهاتضطر تكذب تاني في المستقبل علشان تغطي كذبتك الأولى… حياة… يع يع… مش سعيدة.

الصدق هايخلق منك شخصية مميزة وأمينة هاتنال ثقة وإحترام الناس… وأهم من كده هاتنال إحترام نفسك

سادس عادة نجاح مهمة
هي … وإنت بتتكلم مع أي حد, تشغل دماغك وتقف لحظة تفكير قبل ماتقول أي حاجة جارحة
أو أي حاجة … ملهاش أي فايدة إنها تتقال

في الآخر… قولنا إنت … إيه هي عادات النجاح اللي إنت شايفها مهمة علشان تنجح في حياتك؟

قولنا في تعليق على الفيديو… وتابعنا وإعمل سابسكرايب علشان تشوف فيديوهاتنا اللي جاية

برنامج استوديو اسلوب - الحلقة الثانية - غير حياتك ب ٦ عادات للنجاح

برنامج استوديو اسلوب – الحلقة الثانية – غير حياتك ب ٦ عادات للنجاح