أهلا بيكم في الحلقة رقم ٢٠ من برنامج أسلوب في دقيقة

اللي بنجاوب فيها على الأسئلة اللي بتوصلنا في كومنتس… واللي عمرها ما بتكون دقيقة أبدا

بمناسبة إننا وصلنا للحلقة رقم ٢٠ … فا قررنا نعمل الحلقة بالعكس

المرة دي السؤال إحنا اللي بنسأله في أسلوب

وبنسئلك السؤال دلوقتي, وعاوزينك توقف الحلقة, وتكتب الإجابة في كومنت… وبعدين تكمل الحلقة لأنها هاتعتمد على إجابتك

السؤال:

أُوصِّف بالتفصيل يوم مثالي ليك في المستقبل لما تكون حققت أحلامك وعايش اجمل حياة؟

بتصحى الساعة كام؟

بتعمل ايه اول لما تصحى؟

ترتيب يومك كله عامل ازاي؟

مين من الناس اللي تعرفها تحب انه يكون موجود في حياتك؟

بتشتغل ايه بالظبط؟ ومع مين؟

وقف الفيديو دلوقتي حالا… وبص للأسئلة وجاوب عليها في كومنت

و بعد لما تخلص الإجابة… إبقى كمل الحلقة فيديو….

(فراغ في الوقت بتاع الفيديو)

حمدا لله على سلامتك…نتمنى إن رحلة كتابة يوم مثالي واقعي ليك في المستقبل تكون جميلة أوي وخليتك تعيش سعادة وإنت بتكتبها

إلا طبعا لو كتبت إنك نفسك في المستقبل تخلص ورق العربية الجديدة من المرور… ساعتها … طابورك طوييييل

و لو كنت زوغت من الإجابة على السؤال … إتفضل روح جاوبه بجد, وتعالى تاني

———————————

خلوني أكون صريح معاكم:

إحنا عارفين معظم الإجابات عاملة إزاي

لأننا في أسلوب جربنا التمرين ده على نفسنا

وسألناه كمان على صفحة أسلوب على فايسبوك, ودي الإجابات اللي وصلتنا:

(صور من الردود الكتيرة اللي وصلت لنا – إما يتم طباعتها على كروت وعرضها… وإما تظهر على أفتر إيفكتس)

معظم الناس قالت

أصحى بدري جدا, الفجر أو قبل الفجر

أصلي الفجر

أنزل أجري ساعة

أرجع آخد شاور

أفطر في البلكونة وأنا بقرأ في كتاب وبشرب نسكافيه أو شاي

أنزل أروح أشتغل في شركتي اللي بحبها ومع فريق عمل جميل ونعمل عمل إبداعي

وأكون مركز طول اليوم في الشغل

أرجع بيتي وأخرج مع عيلتي

وأرجع البيت بالليل أقرأ كتاب وأنام بدري علشان أقدر أكرر نفس اليوم تاني

———————————

انت كمان، راجع كويس على الاجابات بتاعتك واحدة واحدة

وشوف ايه من الأعمال اللي بتتمنى تعملها في المستقبل، تقدر تعملها بإمكانياتك الحالية ومن غير ما تحتاج تكون ميلياردير ولا حاجة؟

هاتلاقي نفسك ممكن تُمارس الرياضة من غير ما تحتاج انك تنتظر الحياة المثالية السعيدة تحصل في المستقبل

وتقدر كمان انك تصلي الفجر زي ما تمنيت في الحياة المثالية اللي بتحلم بيها

من الآخر، هاتلاقي نفسك ممكن تعيش في حياة قريبة جدا من الحياة المثالية اللي انت بتحلم تعيشها كمان ٢٠ سنة من دلوقتي … يعني ممكن تضيع ٢٠ سنة من حياتك منتظر انك تبدأ تعيش حياة مثالية، مع انك تقدر تعيش معظم الحياة المثالية السعيدة دي من النهاردة

السؤال ده مهم جدا إنك تسأله لنفسك

ومهم جدا إنك تجاوب عليه بورقه وقلم

ومهم إنك تجاوب عليه بعقل صافي وهدوء

هاتلاقي إن الحياة المثالية اللي بتحلم بيها… جزء كبير جدا جدا جدا تقدر تعيشه من دلوقتي حالا

وإكتبلنا في كومنت… إيه الحياة المثالية اللي بتحلم بيها

وأسئلتك لحلقاتنا اللي جاية

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على ‫#‏موبايلك‬ ‫#‏الأندرويد‬ من هنا:
http://bit.ly/osloop-android
وأسلوب ‫#‏أيفون‬ من هنا:
http://bit.ly/osloop-iOS-eg
وده, ‫#‏موقع‬ أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife