اهلًا بيكم في الحلقة رقم ٢٦ من برنامج اُسلوب في رمضان

وحلقة بعنوان: مديتيشن

أكيد معظمن سمع عن المديتيشن قبل كده… اللي هو التداوي بإنك تقعد مع نفسك كده وتفكر في ولا حاجة

المديتيشن بالمناسبة مش هو التأمل

التأمل انك تقعد مع نفسك، وتتأمل وتفكر وتحاول تفكر بوضوح

اللي انا جاي أكلمكم عليه النهارده مش هو ده خالص

اللي انا جاي اتكلم عليه النهاردة وعلى أهميته الشديدة هو مديتيشن… اللي بيعلمك انك ماتفكرش في اي حاجة في الدنيا

لكن تعالوا احكيلكوا قصتي مع المديتيشن من الاول

انا بشتغل مهندس برمجة، وبعمل برامج وتطبيقات للموبايلات

جانب من حوالي سنتين، عميل من فرنسا، عاوز يعمل برنامج للمديتيشن، علشان هو بيعمل سيشنز، بيعالج فيها الناس بالمديتيشن

ولأني كنت سمعت عن المديتيشن ده ميت مرة قبل كده وعن أهميته الفظيعة من براين جونسان ومن براندون بيرشارد ومن ميت واحد غيرهم، فا دي كانت فرصة مهمة جدا ليا اني اتعلَّم المديتيشن صح، علشان لما اعمل المشروع اللي مطلوب مني، اعمله يفيد الناس فعلا

فا رحت نزلت أشهر برنامج للأيفون والاندرويد  في العالم لتعليم المديتيشن، والبرنامج اسمه: هيد فيرست – او: الرأس اولا

تعليم المديتيشن انك تحضر حصة او سيشن ١٠ دقايق يوميا

تتعلم فيهم ازاي انك ما تفكرش في اي حاجة خالص

الموضوع ممكن يبان سهل انك تقعد ١٠ دقايق ما تفكرش في حاجة خالص

لكن لو جربته في الاول، صدقني: الموضوع اقرب للمستحيل

الهدف من تعليم المديتيشن انه يعلمك انك تفصل دماغك وتفكيرك عن الدنيا كلها وما فيها لمدة ١٠ دقايق متواصلة، لكن وانت صاحي وفي كامل مش وانت نايم

طيب هاستفيد ايه انا حضرتك لما اكل المديتيشن اللي انت قاعد تطبخ فيه ده سيادتك؟؟؟

الاستفادات كتيييرة جدا جدا لا حصر لها بجد

– علاج فعال جدا للتوتر

– بيفصلك عن الدنيا والمشاكل، وبترجع بذهن صافي جدا للحياة

– بيخليك تفكر برة الصندوق دايما، وبيزود الإبداع 

– بيخليك تقدر تخرج من مود مشاكل الشغل لما تروح البيت، فا تبدأ حياة حقيقية جميلة من البداية وانت فريش مع اهلك وعيلتك

المهم، انك تعمل مديتيشن صح… تتعلم ازاي تفصل نفسك عن الحياة كلها… وطرق تعليم المديتيشن والحصة والسيشنز اليومية موجودين في البرنامج المشهور اللي اسمه هيد فيرست، والبرنامج اللي عملته مع زمايلي في شركة ان ويڤ للبرمجة: برنامج زين-في

(صوت سلوبي) شكرًا يا عّم اُسلوب على انك حكيتلنا قصة حياتك مع المديتيشن، وشكرا ان احنا ما استفدناش اي حاجة منك النهاردة

ويالا انت والبتاعيشين اللي مش فاهمه ده، علشان ها نرش بطيخ

استنى بس يا عّم أسلوبي… انت بتتعصب بسرعة، ومحتاج مديتيشن فعلا

بس هاقولك اللي انا استفدته من المديتيشن ده

اول حاجة فهمتها واتعلمتها لما اتعلمت فعلا المديتيشن الصح، ان كل حاجة في المديتيشن ده، موجودة في الصلاة الصحيحة… مش الصلاة الكروتة الهبل اللي بنمضي بيها حضور وانصراف دي

الصلاة الصحيحة

اللي هي: اول لما تقف، وترفع ايديك لربنا، وتاخد نفس كامل بكل هدوء وتقول: الله أكبر

وأول لما تقول الله اكبر… الكون كله يقف

مفيش حاجة خلاص في الكون

مفيش ورايا حاجة مهما كان

مفيش شغل ولا مشاكل شغل

لو الشغل ومديري اللي في الشغل انفجروا دلوقتي حالا، ولا يهمني

مفيش أولادي ولا مشاكلهم خالص

مفيش ورايا ولا ديون ولا اي هموم

انا خلاص… مش معاكوا في الدنيا دلوقتي

انا مع ربنا

إنتوا والكون كله تحت… وانا في حتة تانية خالص، مفيش فيها اي انشغالات ولا مشاغل ولا حياة

انا واقف بي ايدين ربنا

اللي بإيده الكون بتاعكوا كله

هاقول: الحمد لله رب العالمين

واقف لحظة كده، وافهم وأحس انا قولت ايه

مع كل كلمة هاقولها هايكون في اطمئنان حقيقي في قلبي

كل حركة، يكون معاها: اطمئنان

يااااااة…. مستحيل اقدر اوصفلك انت بتكون فين لما تصلي كده 

بتكون فعلا في مكان تاني خالص

لما بتخلص صلاة… بتبقى فعلا منتظر الصلاة اللي جاية بفارغ الصبر، علشان تروح نفس المكان ده، وتسيب الدنيا والكون والمشاكل والمذاكرة والأولاد ومشاكل الاسرة والديون والضغط النفسي والعصبي… وتروح عند ربنا… وتقف وتقول: الله اكبر

وتاخد نفس طوييييييل… وقلبك بجد يبقى في اعلى درجات السعادة والاطمئنان … وَيَا باختك بجد وانت في رحلتك اللي بتقابل فيها خالق الكون كله، وانت واقف لواحدك عنده، وتقول: انا جيت يارب، بقلبي وروحي وتفكيري، ورميت كل همومي وانشغالاتي واتخلصت منها، 

ساعتها بس هاتفهمليه في ناس بتقف تصلي قيام ليل بالسعات يوميا… وبتبقى ساعتها خارج نطاق الكون

طيب، انت جربت قبل مده تصلي بخشوع وماعرفتش

هاقولك حاجتين:

الحاجة الاولى: سيبك من اي مسميات

انت محتاج تفصل نفسك عن الكون كله لمدة دقايق بس، علشان تقدر ترجع تاني إنسان جديد

اول لما تقف بين أيدين ربنا علشان تصلي، قول لمل فكرة هاتحاول تدخلك: اياكش تولع

هاتحس براحة بجد فظيعة

انا متأخر اوي في الشغل: ان شالله يولع الشغل باللي فيه

انا متأخر في المذاكرة… اياكش تولع المذاكرة على المناهج … عجبتك دي اوي انا عارف… هههه

كل فكرة هاتدخل وتحاول تشتتك، هاتكون هي فرصتك لطردها وتحرير نفسك من كل قيود الحياة … هاتكون حر مرة تانية، مهما كانت قيودك

وافتكر دايما… انك محتاج تفصل نفسك عن الكون وانت صاحي وفي كامل وعيك

النقطة التانية: برنددون بيرشارد بيحكي بالتفصيل في الفيديو ده:

ازاي هو بيجبر نفسه على طرد كل الأفكار من دماغه علشان يعرف يعمل مديتيشن

(شغل الفيديو على مديتيشن – ريليز، ريليز، ريليز)

هو بيقول انه اول لما بيروح من الشغل، وقبل ما يقابل مراته، لازم يعمل مديتيشن لمدة ٢٠ دقيقة كاملة، يفضّل ال ٢٠ دقيقة يقول فيهم… ريليز… وياخد نفس طويل

ويقول ريلييييز،،، وياخد نفس

ويفضل يكرر الموضوع ده ٢٠ دقيقة

وهو بيقول انا اللي اخترعت كلمة ريليز دي، انت ممكن تقول اي كلمة

انا كنت بتعلم اعمل مديتيشن، كنت بفضل أقول وانا رايح الشغل بالعجلة طول الطريق، ريليييييز

ايوة… سامعك… انا بروح الشغل بالعجلة والله

وبعدين لاقيتني بقول بدالها… الله اكبر، واخد نفس… وأقول الله اكبر واخد نفس طويل… وأفضل أعمل كده طول الطريق

ربنا بعتلي ناس ملهومش اي دعوة بالدين لا من قريب ولا من بعيد، يعلموني ازاي اصلي صح، وإزاي أقول أذكار صح، وإزاي أعبد ربنا صح، وأستفيد فعلا في يومي وحياتي من الصلاة والذكر والدعاء

ودي فرصتك انت كمان… انك تتعلم رؤية للصلاة والذكر من زاوية جديدة مختلفة

واجب الحلقة بتاعك النهاردة:

هات كراسة اُسلوب في رمضان بتاعتك

ووقف الفيديو ده، وشغله من الاول خالص تاني

دلوقتي حالا ما تنتظرش

وتكتب كل نقطة تشوفها مهمة في كراستك

وتروح تطبق النقط دي كلها وانت بتصلي وانت كمان بتذكر ربنا

الحلقة دي بالذات، ما ينفعش تشوفها مرك واحدة ابدا

دي تشوفها تاني دلوقتي حالا

وتشوفها بكرة وبعده وبعده وكل يوم لغاية لما تشرب معنى الصلاة والخشوع بين يدي الله… وكمان ترجع للحلقة دي مليون مرة تاني، كل ما تعوز تشحن نفسك فهم وحب للصلاة والعبادة

بنفكرك انك هاتروح تصلي دلوقتي حالا بقلب جديد … نفس عميق

… ابتسامة في قلبك

وخليك حبوب بقى وتدعيلنا معاك… بلاش بخل يا راجل

محتاجين نسمع رأيك وأفكارك وأي رسالة تحب تبعتها لنا، واحنا ان شاء الله هانقرأ كل التعليقات وكل الكومنتس اللي هاتكتبها

و وصل الحلقة دي لكل شخص ممكن يدعيلك المرة اللي جاية وهو جاي يصلي

واعمل سابسكرايب لقناة اُسلوب على يوتيوب، علشان توصلك كل حلقاتنا اللي جاية

ورمضان… كرييييم

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على #‏موبايلك #‏الأندرويد من هنا:
http://bit.ly/osloop-android
وأسلوب #‏أيفون من هنا:
http://bit.ly/osloop-iOS-eg
وده, #‏موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife