أهلا بيكم بعد طول غياب من حلقات استوديو اسلوب و الحلقة  رقم 9  حلقة مميزة جدا و محضرين ليكم فيها مفاجأة جميلةاوي هتبسط كل متابعينا فى أسلوب – ايه رأيكم الأول فى الديكور الجديد؟ يا رب يكون عجبكم…ده احنا صرفنا عليه كتير أوى خاصة الكنبة اللي انا قاعدة عليها دي ….

مين يا ترى فيكم فاكر حلقة استديو أسلوب السنة اللى فاتت عن “أهداف السنة الجديدة ” ؟ تعالوا مع بعض نفتكر الحلقة ” جزء من حلقة السنة اللى فاتت ”

أنا متأكدة أن في بعض الناس قدروا فعلا يطبقوا أفكار من الحلقة اللي شوفتوها دلوقتي و قدروا يحققوا أهدافهم السنة اللى فاتت….. و ناس تانية حاولوا فعلا بس مقدروش يكملوا و يوصلوا لأهدافهم كلها – و ناس تانيين خالص – مهتموش اصلا يكتبوا  أى أهداف ليهم لأنهم بيعتبروا أنها حاجة ملهاش لازمة لأن الموضوع مش مستاهل، هم عارفين كويس هم عايزين ايه و كله فى التمام متخزن فى مخهم.

.

حلقتنا السنة دى مختلفة جدا، مش هنقولك أكتب أهدافك المرة دى و لا حتى هنديك أفكار لأهداف جديدة تحاول تحققها خلال السنة الجديدة  مش فى الحلقة دى ” فيه حلقة تانية مخصوصة لكده – هقدم لكم بعض الأفكار لأهداف تقدروا تحققوها السنة اللى جاية بجانب طبعا أهدافكم اللى أنتم محددينها لنفسكم – بس ممكن الأفكار اللى هنقدمها ليكم تساعدكم لو كنتم لسه محتارين أنتم عايزين تحققوا ايه السنة دى

و زى ما قلت لكم هنناقش الأفكار دى فى حلقة تانية فى الاعداد.

أما فى الحلقة دى -هانقدم ليكم رؤية مختلفة رؤية انا عن نفسي شايفاها مهمة جدا اننا نعملها قبل ما نبدأ سنة جديدة: هنطلب منكم تجاوبوا على شوية أسئلة – حتفتح عنيكم أكتر، و تديلكم نبذة سريعة عن السنة اللى فاتت، و ازاى عدت عليكم، و انجزتم ايه فيها، و الأحداث المهمة اللى مرت عليكم و أثرت فى حياتكم.

فكرة حلقتنا باختصار:

اننا قبل ما تبدأ صفحة جديدة و سنة جديدة لازم تطوى صفحة السنة اللى فاتت – أو بمعنى أصح تهضم السنة اللى فاتت الأول قبل ما تبدأ كده على بياض سنة جديدة.

وقف الحلقة و هات ورقة وقلم و أعمل لايك للحلقة و أكتب السؤال الأول – لازم تكتب…… مش بنغلس عليك صدقني بس الكتابة ليها فعلا اثر كبيرفى  إستيعابك لإيجاباتك أقوي من لو ايجاباتك شفوي كده  حتي لوكتبت مصطلحات او keywords او سطر واحد يؤدي المعني لايجاباتك  وتكون واضح ليك.

السؤال الاول: ايه الحاجات اللى عملتها السنة اللى فاتت و كنت فخور انك عملتها ؟ حتى لو حاجات بسيطة، متستهونش بيها أكتبها برده – اى حاجه تخليك تحس انك فعلا السنة اللى فاتت دى معدتش من عمرك على الفاضي – و بص حتى فى النتيجة عندك على الموبايل شوف الأحداث و الأفنتز اللى حضرتها – اتفرج و عدى على كل شهر فى السنة اللى فاتت و شوف عملت ايه فيه – حضرت كورس معين – نجحت  أو اتخرجت – كسبت بطولة في لعبة – اتعلمت هواية  او مهارة جديدة – قراءة كتب معينة أثرت في اسلوب حياتك و طريقة تفكيرك – نجحت مشروع فى شغلك – اترقيت – بدأت مشروع جديد – اشتركت فى عمل خيرى – بدأت تلتزم بالصلاة – أى حاجة عملتها و لو بسيطة و كنت فخور انك عملتها اكتبها دلوقتى. أيجاباتك دي هاتديك ثقة بنفسك اكتر و تديلك دفعة للامام و كمان تشجعك انك السنة الجديدة تقدر تحقق فيها حاجات اكتر بكتير من السنة اللي عدت.

السؤال التانى اللى تسأله لنفسك ؟ اكتب معايا: ايه الاخطاء اللى عملتها السنة اللى فاتت ؟ و اتعلمت ايه منها؟ السؤال ده مهم جدا اذا كنت فعلا جاد فى أنك تغير أسلوب حياتك للأحسن لأن لازم علشان حياتك تتغير انك تبدأ بتغيير نفسك الاول،  افتكر ايه المواقف اللى اتصرفت فيها بطريقة غلط و ندمت بعد كده و اتعلمت بعدها أنك تفكر ١٠٠  مرة قبل ما  تتصرف غلط تانى – اوتقول كلام يجرح اللى قدامك – أو يكون فيه ظلم لحد. أو موقف كنت المفروض تقف فيه وقفة راجل وتقول الحق فيه بس استسهلت و قلت مليش دعوة – أو إنسان احتاج ليك و أنت قصرت في حقه – أو ناس يهموك فى حياتك ومازلت مقصر في حقهم و مش مديهم أى اهتمام و عايز السنة دى أنك  تعوضهم .

أو تقصير عملته فى حق شغلك أو تقصير فى مذاكرتك خلاك ماتحصلش علي النتيجة اللي كان نفسك فيها ؟ اكتب كل حاجة و الأهم تكتب ايه الدرس اللى اتعلمته و هتصلح ايه ة ازاي من الاخطاء دي السنة الجاية او هتعمل ايه علشان متقعش فى الغلط ده تانى.

عادتا كبشر كرامتنا بتنأح علينا اوي فى اللحظة والموقف اللى بنعمل فيه حاجة غلط – اننا بسهولة نعترف أننا أخطأنا أو أن الحق علينا – بس بعد  لما بيعدى فترة على الموقف و المواضيع تهدي بنقدربسهولة اننا نستوعب أننا فعلا أخطأنا و نقدر نعترف بده.

السؤال الثالث:

” ايه اللى هتقدر تتخلى عنه أو تشيله وترميه ورا ظهرك اوي تطلعه من حياتك السنة دى ”  سواء كانت مشاعر سلبية – احساس بالظلم – احساس بالندم – احساس بالفشل – أو كلام سلبي تبطل تقوله لنفسك زي” أنك كبرت والقطر فاتك، كل الحاجات اللى معطلاك و بتشدك لورا فى حياتك، مش شرط حتى مشاعرسلبية بس ممكن كمان حاجات ملموسة – زى لبس قديم ومش بتلبسوه – كراسات قديمة زحمالك مكتبك على الفاضى – الأقلام اللى نشفت و مبتكتبش – الورق اللى لسه من السنة اللى فاتت عندك وكنت بتسمع فيه مذاكرتك – نظف كل حاجة و أخلق مساحة جديدة لحاجات تانية جديدة السنة دي

ودلوقتى معاد المفاجاة اللى وعدتكم بيها، المفاجأة ظريفة جدا هتعجبكم أوى و هتجبر كل واحد فينا أنه يلتزم بأنه يحقق اهدافه السنة دى . المفاجأة هى ” تحدى أسلوب للسنة الجديدة ”

هنطلب من كل واحد فيكم أنه يصور نفسه فيديو بموبايله يقول فيه هدف أو اتنين من الأهداف اللى نفسه يحققها في السنة الجديدة واحنا هننشر الفيدي وبتاعك ده على قناة أسلوب علشان كلنا نشهد عليك. انا بشجعكم تعملوا معانا التجربة دى – أوعدكم أنها هتفرق معاكم جدا – حتى ببساطة  أنكم بس تسمعوا نفسكم و أنتم بتقولوا أهدافكم و تبقوا مدركين كويس أوى هى ايه.

طلبنا من اصداقاء لينا انهم يبدأوا التحدي ده معانا و فعلا صوروا نفسهم و هما بيقولوا هما هايحققوا ايه فى حيلتهم خلال السنة الجديدة ونفسنا انتم تشاركوا معانا أنتم كمان…….أبعتولنا فيديوهاتكم  لاهدافكم للسنة الجديدة علي هاشتاج #أسلوب osloop#…….علي فايسبوك انستجرام سناب شات او يوتيوب

اسيبكم مع اول فيديو “لتحدي اسلوب” و ما تنسوش تعملوا لايك و شير و تاج  لكل اصدقاءكم اللي يهمكم انهم يحققوا اهدافهم و يشركوا معانا فى تحدي اسلوب.  

 

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على ‫#‏موبايلك‬ ‫#‏الأندرويد‬ من هنا:
http://bit.ly/osloop-android
وأسلوب ‫#‏أيفون‬ من هنا:
http://bit.ly/osloop-iOS-eg
وده, ‫#‏موقع‬ أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife