توضيح هام واعتذار عن سوء التوضيح السابق
كنّا نشرنا بوست مهم جدا على صفحة اُسلوب وعلى تطبيقات اُسلوب على ايفون واندرويد وعلى موقع اُسلوب دوت كوم بنتكلم فيه عن أهمية انك تبعد عن أصدقاء السوء وعن الناس اللي بتنشر طاقة سلبية
وللأسف في ناس فهمت الموضوع غلط وافتكرتنا بننصحهم ان لو ليه صديق مثلا بيدخن وبيعلمهم الصفات السيئة، ان ده معناه اننا نقطع علاقتنا بيه
وبرغم اننا بنحاول ان كلامنا يكون واضح على قدر المستطاع، الا ان احنا هانحاول نوضح الكلام ده تاني وبنعتذر لو اتسببنا في لخبطة للناس
احنا ما نقصدش ان لو ليك صاحب بينشر على طول الطاقة السلبية طول الوقت وبيشدك تحت وبيعلمك كل البلاوي السوداء اللي بقيت متحاوط بيها دي انك تقطع علاقتك بيه ولا حاجة
لأن قطع علاقتك بيه مش كفاية، دا انت تقطع علاقتك بيه مليوووووووون مرة وبكل بجاحة وبكل قلة ذوق وبكل ندالة وبقلب جامد قوي وقلب ميت اوي
الموضوع ده بالذات ماينفعش فيه أيد طرية ولا قلب طري ولا حل وسط ولا هزاااار ابدا
كان غيرك اشطر
ولو ربنا رزقك بواحد يقولك: انت كده ندل ولا خير فيك وشوية كلام ملوش معنى أصلا، يبقى الشخص ده عاوز منك ايه مثلا؟ عاوزك تحاوط نفسك بالناس اللي بتنشر سلبية وشر وحاجات غلط؟ لا شكرًا حضرتك، انت ممكن تكون جميل وشاطر، إنما احنا لِسَّه بنبدأ طريق الحياة والنجاح، لما نكبر ونبقى شاطرين زيك كده… مش هانحاوط نفسنا برضه بأصدقاء السوء… علشان حتى نقدر نساعد الناس مش علشان نتحول احنا كمان لجراثيم بتنشر الشر.
انت هاتعيش مرة واحدة في حياتك كلها، اعمل في نفسك خدمة وحاوط نفسك بالناس الإيجابية والنَّاس اللي قلبها فيه خير والنَّاس اللي بتنشر السعادة والضحكة والابتسامة والأمل والنجاح
بعد فترة من وجودك بجانب الناس الإيجابية والنَّاس اللي بتنشر خير، هاتقدر تساعد ناس تانية كمان انها تعيش حياة اجمل… وهاتكون انت الطاقة الإيجابية والأمل والخير والسعادة لكل الناس.
صديقك بينشر الشر؟ سيبه واطلع اجري
اقطع علاقتك بيه… بوضوح و ببجاحة
لازم يكون واضح اوي لكل اللي حواليك انك مش هاتبدأ علاقة من اي نوع مع شخص بينشر السلبية والشر والحاجات الغلط
مفيش حل وسط
ياريت يكون قلبك وعقلك حاضرين معاك وماتفهمش الكلام غلط وماتفتكرش اننا بنقول ان لو شخص زعلك اقطع علاقتك بيه، او لو حد من أصحابك عنده ظروف مؤقته ومحتاج مساعدة ومحتاجك تقف جانبه انك تسيبه وتقطع علاقتك بيه… بالعكس، لازم تكون انت الأمل والطاقة الإيجابية لصاحبك ده
ولأن الأمثلة اسهل، دي ممكن تكون علامات واضحة انك المفروض تقطع علاقتك بالشخص ده:
والأجمل، ان انت لو بتعمل اي حاجة من دي، تبطلها فورا علشان انت جميل وحبوب واحنا بنغششك ان انت كده مش سبب خير وبتضر نفسك وبتضر اللي حواليك
١- الشخص اللي دايما بينشر طاقة سالبية طول الوقت… اقطع علاقتك بيه.
٢٢- صاحبتك اللي كانت هاتموت وتتخطب وأول لما اتخطبت قالتلك، يابختك مش مخطوبة ومحدش بيغلس عليكي… اقطعي علاقتك بيها
٣- صاحبك اللي كان سبب انك تتعلم التدخين، اقطع علاقتك بيه.
٤٤- صاحبتك اللي كانت هاتموت وتتجوز ان شالله حتى تتجوز دبدوب، وبعد لما اتجوزتك ماشية تقول: يابختكوا ياللي لِسَّه ما اتجوزتوش، عايشين حياة الحرية، اقطعي علاقتك بيها
٥٥- صاحبك اللي بيبعتلك حاجات وحشة ومواقع مش كويسة علشان تتفرج عليها، اقطع علاقتك بيه فورا وببجاحة
٦٦- صاحبتك اللي ربنا رزقها بأطفال، وماشية تقول: يابختكوا ياللي مافيش عندوكو اطفال، بتعرفوا تناموا وتعيشوا حياتكم… بالله عليكي… في حد يطيق الكلام المستنفذ ده، اعمليلها بلوك المستفذة دي… بلوك تنييين
٧- صاحبك اللي بيخليك متذاكرش وبيحبطك وبيفشلك وبيعلمك حاجات زفت… اقطع علاقتك بيه
٨٨- الشخص اللي دايما بيشوف الحاجة الوحشة في كل موقف ادامه وبيترجم كل حاجة للشر، اقطع علاقتك بيه
———–
طيب تصاحب مين؟
١- اللي دايما بينصحك بالخير…. صاحبه
٢- اللي دايما مبتسم … صاحبه مرتين
٣- اللي مش بيبخل بمعلومات وعلم في اي حاجه، بوسه وصاحبه
٤- اللي بيشدك معاه وهو رايح يعمل حاجة كويسة، صاحبه
٥٥- اللي لما بيلاقي فيديو مضحك ومفيش فيه اي إسفاف وسفالة، بيبعتهولك علشان هو نفسه انك تضحك…. يابختك… تصاحبه وش
٦- اللي لما بيلاقي فيديو او بوست للإيجابية والخير بيبعتهولك… تصاحبه غصب عنه
٧- اللي ملتزم بالرياضة … تصاحبه وتروح معاه الچيم
٨٨- اللي بيعزم عليك دايما بسجاير من العلبة المالييورو يتاعته، اقطع علاقتك بيه وقطعله علبة السجائر المستفذة والمقرفة بتاعته دي.
٩- اللي ملتزم بعباداته وبأخلاقه وبمبادئه… جميل اوي ده، تصاحبه
١٠٠- اللي خيره اكتر من شره ومفيش منه ضرر ومحتاج مساعدتك من غير ما يشدك تحت… تساعده وتمد ليه إيدك وتصاحبه
….
وفي الختام، الموضوع كبيييييييير جدا جدا، وان شاء الله هانتكلم عنه مليون مرة، وانت جميل وحبوب والله انك كملت معانا لغاية هنا 😊
سلاااام