جت الحزينة تفرح مالقتلهاش مطرح (بحث في سبب إن الحزينة لم تجد لها مطرحا) أسلوب في دقيقة 31

أهلا بيكم في الحلقة رقم ٣١ من برنامج أسلوب في دقيقة

اللي بنجاوب فيه على الأسئلة اللي إنتو بطلوتوا تكتبوها في كومنت…. و أنا النهاردة إضطريت أسأل السؤال بنفسي

السؤال بيقول: هو لي: جت الحزينة تفرح… ملقتلهاش مطرح؟

رحلة في بحث, سبب إن الحزينة جت تفرح, ملقتلهاش مطرح

وفي رواية… ملقتلهاش مططططرررررررحححححححححح

ولماذ لم تجد لها مطرحا؟

تعالو أحكيلكم قصة الأول

عن حد أعرفه شخصيا

مش شخص واحد… بس كذا شخص, وكلهم عندهم نفس ال سيببتمومز بالظبط

وماتسألونيش يعني إيه سيبتمومز, علشان كده إنتو تبقو “سيبتمومز” أصل الموضوع, وبتضيعوا وقت

وأنا عاوز إني أنا اللي أضيعلكوا وقتكم… مش إنتوا اللي تضيعوه بنفسكم

أنا أعرف كذا شخص, كلهم عندهم نفس الأعراض دي

يبقوا في أولى حضانة: المناهج صعبة أوي على العيال… و يقعدوا يشتكوا

ربنا يكرمهم ويدخلوا أولى إبتدائي: يقعودوا يشتكوا… الدنيا صعبة أوي… ياريتنا كنا لسه في حضانة

ربنا يكرمهم, ويدخلوا إعدادي وثانوي: الدنيا صعبة أوي… مش ممكن… هانموت خلاص … مش عاوزين تعليم

ربنا يكرمهم بقى ويدخلوا مثلا كلية حلوة كده من اللي بيتدخلها ب ٢٩٠٪ في المية

تلاقيهم ماشيين يقولو: يابختهم اللي دخلوا كلية المهلبية باللبن… إحنا الكلية بتاعتنا صعبة أوي… يابختهم هما… إهيء إهيء إهيء

مع إنهم كانوا هايموتوا ويدخلوا الكلية اللي ربنا كرمهم بيها دي

المهم طبعا يقعدوا كل سنين الكلية يشتكوا ويتمنوا إنهم يتخرجوا….

وأول لما يتخرجوا وربنا يكرمهم مثلا بشغل… إهيء إهيء إهيء إهيء… وكمان واحدة إهيء إهيء إهيء إهيء

ياريتنا كنا لسه في الكلية… الشغل والحياة صعبين أوي… هانتجوز إزاي… هو حد لاقي يخطب أو يتجوز

طبعا ربنا بيكرمهم وبيرزقهم بالخير ويتجوزوا في يوم من الأيام

إهيء إهيء إهيء… بس المرة دي مرتين

مرة: العزوبية كانت جميلة… ياريتني فضلت في بيت ماما

و إهيء إهيء إهيء إهيء… والمرة دي…. إحنا ما عندناش أطفال, مع إن إحنا متجوزين بقالنا أكتر من ٣ أيام

إهيء إهيء إهيء إهيء

ربنا يرزقهم بأطفال

مرررررررررر الشكوى…. مرررررر الشكوى بقى

من البكاء والعياط والطفل اللي مش عاوز ينام… ويابختكوا ياللي معندكوش أولاد

المهم يعني…. إنتوا أكيد أكيد أكيد تعرفوا ناس من دي

مهما ربنا رزقهم بالخير, بيلاقوا طريقة يشتكوا بيها مر الشكوى

هي دي بقى: الناس الحزينة

اللي مهما ربنا رزقها ب باب يفرحوا منه

بيلاقوا مليون طريقة يحولوا الخير والفرح ده, لمر الشكوى

للأسف الناس دي, غير إنها طبعا بتبقى طاقة سلبية رهيبة جدا للناس اللي حواليها

وبتكره الناس في نفسها

إلا إنهم للأسف بيضروا نفسهم أكتر من أي حد تاني

لأنهم طبعا بيعيشوا نفسهم في حياة كئيبة جدا

لحظات السعادة بتاعتهم فقط, هي اللحظات اللي ب   يشتكوا فيها ل حد, وهما بيبصوا في عينيه كده وهما بيشتكوا… يشوفوا هو حس بالألم والعذاب والتضحيات وال… والبتاع

وطبعا طبعا طبعا… هما مش بيكونوا عارفين, إن الناس التانية بعد فترة, مش بيكونوا مهتمين يسمعوا شكوتهم خالص… لأنهم خلصوا رصيدهم خالص

للأسف… الناس الحزينة دي, لما ربنا يرزقها باب للفرح, مش بيرضوا يدخلوا منه

بيستمتعوا أكتر بإنهم: مايلاقوش لهم مطرح

طيب… القصة خلصت عند هنا…. إيه المطلوب حرررررتك

١- أول حاجة أحب أقولهالك: إخشع ياض لا أشقك نصين….

(هي ملهاش علاقة بالموضوع أوي…. بس مفيش مشكلة برضه… إخشع ياض… ماتخشع ياض!!!!)

٢- بلاش بالله عليك تبقى من الناس دي… الناس دي فعلا بتعيش حياة تعيسة جدا طول العمر, مهما يكونوا في فضل من ربنا

٣- لما تقابل ناس من دي… إحمد ربنا على الخير اللي إنت فيه, وإدعيلهم إن ربنا يرفع عنهم… ولو تعرف تهرب منهم… إجري وماتقفش

حاول تبعد عنهم وتهرب… مش علشان هما وحشين ولا حاجة… بس علشان تحافظ على شوية الإيجابية والطاقة الصغيرين اللي عندك

٤- لازم لازم لازم لازم تبدأ يومك كل يوم, بإنك تكتب فعليا شوية نقط, من نقطة واحدة ولغاية ١٠ نقط مثلا, تحمد ربنا عليهم

دول اسمهم Gratifications

لازم لازم لازم يكون عندك زي نوتة صغيرة كده, تكتب فيها كل يوم على الأقل نقطة واحدة زي:

الحمد لله, أنا النهاردة صاحي وأنا في صحة وعافية

الحمد لله, أنا شايف الكلام اللي أنا بكتبه ده, الحمد لله عيني شغالة

الحمد لله, أهلي النهاردة بخير

الحمد لله, أنا كنت نايم في سريري

أنا متخانقة مع جوزي وإحنا الإتنين ضاربين بعض إمبارح… بس الحمد لله… أنا متجوزة الحمد لله… الحمد لله… أتخانق أوي كمان… إيه المشكلة, الحمد لله أنا متجوزة

أو تكتب: خطيبتي مقموصة عليا, مع إني كنت عازمها بره ب ٢٥٠ جنيه م ٤ شهور… إيه ده.. أنا خاطب… طيب الحمد لله, على الأقل أنا خاطب وفي واحدة قبلت ب وشي الجميل ده

لو إنت في دراسة والدراسة صعبة أوي… إكتب: الحمد لله, أنا بدرس, غيري بيشتغل وهو طفل من غير أي ذنب هو عمله

الحمد لله… أنا ربنا بيوفقني إني بتفرج على حاجات بتصحي الحاجات الحلوة اللي جوايا

بس إستنى

أنا مش عاوزك تقول الكلام ده دلوقتي بس كده

إنت لازم يكون عندك نوتة صغيرة, وتكتب فيها كل يوم كل يوم كل يوم … ولو نقطة واحدة

Start your day with gratitude

إبدأ يومك بالحمد

…. الحمد لله ياسيدى… إنت كمان وصلت لآخر الحلقة…. واااااو

طبعا إنت فاكرني هاقولك: إخشع ياض لاأشقك نصين

بس أنا مستحيل أقولك كده… لانك أكيد مش مستني أقولك إضغط لايك… وأكيد ضغطت لايك لواحدك

مش كده برضه…. ولا إيييييه؟

لايكك الجميل يا جميل يالا…

و لو مش مشترك في القناة… إضغط إشتراك

وإكتبلي دلوقتي في كومنت… إيه أول حاجة تحب تحمد ربنا عليها

يالا… سلااااااام