حلقة بقى تلوين ولعب ودلع… الخريطة الذهنية

 

أهلا بيكم في الحلقة رقم ٢٢ من برنامج أسلوب في دقيقة

واللي إنتوا حافظين المقدمة بتاعتها أكتر مني

واللي عمرها ما بتكون …. أه؟

يالا بينا

سؤال النهاردة متعلق بالخرائط الذهنية… mind maps

في ناس بتسأل إيه هي… وفي ناس تانية بتسأل إزاي أستخدمها بفعالية

الخرائط الذهنية هي طريقة جميلة ومهمة جدا لتجميع أي موضوع في رسمة, وبتكون سهلة جدا للمخ إنه يستوعب موضوع كامل لو حطيته في خريطة ذهنية

أنا هاتكلم معاكم النهاردة عن طريقتي أنا اللي بعمل بيها خريطة ذهنية

ممكن يكون فيها إختلاف أو حاجة عن طريقة الخريطة الذهنية اللي مشروحة في كتاب توني بوزان ( توني بوزان ده هو صاحب اسم وطريقة الخريطة الذهنية المعروفة حاليا mind mps(…

لكن كده أو كده أنا بشجعك إنك تخترع أي طريقة تحبها للخريطة الذهنية وتبدع فيها

أول خريطة ذهنية هاتحتاج تبدأ بيها هي: حياتك

8تحط “نفسك” في نص الصفحة…. وترسم رسمة صغيرة معبرة عنك… إن شالله حتى سمايلي فايس لو مش بتعرف ترسم كويس

أنا عن نفسي برسم واحد بشعر منكوش

وبحط حواليه دايرة

تعالى بقى أوريك أنا بعمل خريطة ذهنية لحياتي إزاي… وإنت طبعا تعمل واحدة لحياتك إنت… (صوت خافت مبحوح) إوعى تغش مني!

أنا رسمت دايرة في النص, ورسمت فيها الأشكيف المخيف في النص

وهابدأ آرسم فروع من الدايرة دي لإتجهات حياتي المختلفة

ممكن فرع يودينل على “الشغل”

وفرع يوديني على “حياتي الأسرية” وأكيد هاختصر وأكتب: “الأسرة”

وفرع على “حياتي الخاصة بي” … وهاكتب إختصار وأسميها “تنين التنين”

ولأني بشتغل في شركتين في نفس الوقت, شركة إن ويف للبرمجة, وشركة أسلوب ميديا بروداكشن, فأنا بحط دايرة على كلمة “الشغل” و بتفرع من كلمة الشغل لفرعين

فرع لشركة إن ويف, وبكتب على الفرع للإختصار “إن ويف”

وفرع لشركة “أسلوب ميديا بروداكشن, وبكتب على الفرع للإختصار “أسلوب”

وبعد كده أنا بعمل فروع من “إن ويف” أكتب فيه كل المشاريع اللي أنا المفروض بديرها, وبعمل فرع من كل مشروع بالحاجات اللي المفروض أعملها فيه

وبعمل فروع من “أسلوب” وبكتب فيها كل المشاريع اللي بديرها في شركة أسلوب ميديا بروداكشن… وبعمل فرع من كل مشروع بالحاجات اللي المفروض أعملها فيه

موضوع إني أحط دايرة على “الشغل” ده وأنا بفرع منه مش هي الطريقة اللي مشروحة في كتاب توني بوزان, أنا بشرحلك الطريقة اللي أنا بعمل بيها… وهاقولك على طريقة توني بوزان في آخر الحلقة… وإنت ليك مطلق الحرية تخترع لنفسك أي طريقة تحبها

بس يا سيدي

بعمل نفس الحكاية على الفرعين التانين… لحياتي الأسرية وحياتي الخاصة

وبفضل أفرع فيهم

وبأستخدم ألوان دايما للفروع… وأنا عن نفسي بنوع في طريقة التلوين كل مرة بالطريقة اللي تريحني (مرة تانية… مش دي طريقة التلوين المشروحة في كتاب توني بوزان)…. بس دي خريطتي أنا وأعملها بالطريقة اللي أنا عاوزها

أنا بقى… مش بعمل خريطة واحدة

لأه… دا أنا بعمل خريطة لكل حاجة محتاج أجمعها في مخي و محتاج ألم الموضوع بتاعها كله في مخي

أنا عن نفسي, بعمل خريطة ذهنية منفصلة للمشاريع بتاعتي في شركة إن ويف للبرمجة دايما

وبعمل خريطة تانية منفصلة للمشاريع بتاعتي في شركة أسلوب ميديا بروداكشن دايما

ولو عندي مشروع بشتغل فيه بإيدي … بقسم المشروع ده والحاجات اللي مطلوبة فيه بالتفصيل في خريطة ذهنية

وعادة, أنا الخريطة الواحدة بتفضل معايا شهر أو أكتر… أعدل فيها وأزود فيها وأنقص فيها زي ما أنا محتاج

لما بكون عامل خريطة ذهنية لأي حاجة… مستحيل أي معلومة أو ناحية منها تضيع من مخي

للأسف… أيام الدراسة بتاعتي ما كنتش أعرف طريقة الخريطة الذهنية دي… لكن لو كنت أعرفها كانت هاتفرق معايا كتيييير أوي

كنت هاعمل خريطة للدراسة كلها, وأحط السنة اللي أنا فيها في النص

وبعدين هاخرج منها فرع لكل مادة

ومن كل مادة هاخرج منها فروع للعناوين الرئيسية اللي تهمني فيها… مثلا: مذاكرة … واجب … درس

وبعدين كنت هاعمل خريطة ذهنية لكل مادة بالتفصيل, أكتب فيها اسم المادة في النص, وكل الدروس منها

وبعدين لو عندي موضوع معين مهم… هاعمل له خريطة ذهنية… وأفضل أزود وأعدل فيه طول السنة

وأستخدم الخرائط الذهنية دايما

طريقة توني بوزان بقى هي اللي في الصور اللي قدامك دي

فروع محددة… وكلمة واحدة ورسمة على كل فرع ومفيش دواير في النص

بس أنا بقولك… خليك براحتك في طريقة الخريطة الذهنية

مثال أخير بقى علشان أوضحلك أد إيه أنا ممكن أجمع موضوع كبيييير جدا في صفحة واحدة وما أضيعش أي معلومة

لو أنا حبيت أعمل خريطة ذهنية أجمع فيها كل حلقات أسلوب اللي عملناها (إحنا عندنا أكتر من ١٣٠ فيديو على قناة أسلوب على يوتيوب النهاردة)

تعالى كده نحاول نجمعهم

هانكتب في النص… أسلوب … ونرسم لوجو اليوتيوب

ونفرع منها أسامي البرامج بتاعتنا

أستوديو أسلوب

أفكار أسلوب

أسلوب في دقيقة

مكتبة أسلوب

صرخة

أسلوب في رمضان

سلسلة شكرا

حلقات متنوعة

ومن أستوديو أسلوب هاعمل ١١ فرع للحلقات اللي عملناها في أستوديو أسوب لغاية النهاردة

و من أفكار أسلوب هاعمل ٧ حلقات اللي عملناهم لغاية النهاردة

وهافضل أزود لغاية لما الرسمة تكون عاملة زي اللي إنت شايفها كده بالظبط

وهاحتفظ بيها وأعلقها عندي… وكل ما نزود حلقة جديدة أقدر أرجع للخريطة الذهنية بتاعت حلقات أسلوب وأزود فيها براحتي

وبكده, أقدر أرجع للخريطة الذهنية دي في أي وقت أنا أحبه

بشجعك إنك تبدأ دلوقتي حالا تعمل أول خريطة ذهنية ليك

وتستخدمها في حياتك وأشغالك ومشاريعك ومذاكرتك وحفظك للقرآن وللناس المهمين في حياتك

الموضوع ممتع جدا ومفيد جدا جدا جدا

طبعا شكرا جدا إنك وصلت معانا لآخر الحلقة الطويلة دي… اللي عمرها ما بتكون دقيقة أبدا

ولو لسبب ما … لسه ماضغطش لايك على الفيديو… إضغط ماتخافش… إضغط يا راجل

وانشر حلقة الخريطة الذهنية دي لكل الناس اللي ممكن تستيفيد منها في حياتها وفي الدراسة

وإكتبلنا أسئلتك لحلقاتنا اللي جاية

وإفتكر دايما… خليك كريم… خليك حبوب!