مجمع التحرير

 

أهلا بيكم في الحلقة رقم ١٦ من برنامج أسلوب في رمضان

وحلقة بعنوان: مجمع التحرير

إشمعنى؟؟

لأننا جمعنا فيها الحلقات اللي فاتت كلها, علشان نراجع كل اللي فات

حلقة النهاردة, طويلة شوية

شدلك كرسي مريح

وهات كراستك بتاعة أسلوب في رمضان… علشان هانشوف, مين ملتزم وبيعمل الواجب

ومين … بيتفرج ويضيع وقت وخلاص

طبعا… هات قلمك الجميل… علشان لازم هاتكتب معانا 

رمضان أكبر فرصة… لكن… النهاردة… نصها إنتهى… بكل أعمالنا وإجتهاداتنا

وإحنا جايين النهاردة, علشان نتأكد إن إحنا هانعرف نحافظ على … النص التاني من الفرصة الكبيرة دي

وكمان… جايبين معانا ٥٠٠ كومنت من الكومنتس اللي إنتوا بتكتبوها لنا على قناة أسلوب على يوتيوب… هانعرضهم في آخر الحلقة… 

إستنى معانا للآخر… ممكن أوي تلاقي تعليقك موجود 🙂

كراستك بتاعة أسلوب في رمضان معاك

ويالا نبدأ

الحلقة الأولى, كانت بعنوان: الإستعداد التنيني لرمضان

إتكلمنا فيها عن القوة الكبيرة اللي بنكتشفها في نفسنا في رمضان

و إتفقنا فيها إن كلنا هانجيب كراسة أسلوب في رمضان علشان نكتب فيها النقط المهمة اللي في كل حلقة, والواجبات بتاعتنا

وكمان إتفقنا إن كل واحد يشوف أكتر داعية بيحبه… ويكتب ميعاده … ويلتزم بحلقته اليوميه

ودلوقتي… إحنا بنفكرك… إنك لازم تعمل كده دلوقتي تاني… علشان نبدأ النص التاني من رمضان… بداية قوية

في الحلقة التانية: كنافة بالمانجة

إتكلمنا عن أهمية صلة الأرحام, وأهمية إن إحنا نصل أرحامنا

ونجدد نيتنا وإحنا في أي زيارة من زيارات رمضان… إنها مش مجرد زيارة

دي صلة رحم… وعبادة لله

وكمان إتكلمنا على إننا لازم نصالح قرايبنا اللي زعلنا منهم بسبب خناقات الفايسبوك … بتاعة مين صح… ومين غلط

ومرررة تانية وتالتة ورابعة… تجديد النية… قبل كل عمل

في الحلقة الثالثة: شهادة ميلاد

إتكلمنا إن كل واحد فينا بيتكتب له شهادة ميلاد أول لما بيتولد

ما بيكونش له دخل في أي حاجة فيها…. 

وإن النهاردة… كل واحد فينا لازم يكتب لنفسه, شهادة ميلاد جديدة

بس الفرق… إن شهادة الميلاد الجديدة… هانكتب فيها اللي إحنا عاوزين نكتبه عن نفسنا

صفاتنا اللي بنحلم بيها كلها… كل حاجة وكل صفة نفسنا تكون فينا… هانكتبها في شهادة ميلادنا الجديدة

وهانعلق شهادة ميلادنا الجديدة عندنا في أوضتنا… وهانبص لشهادة ميلادنا كل يوم, علشان نعرف إحنا عاوزين نكون إزاي… وإزاي نوصل للنسخة مننا اللي بنحلم بيها

في الحلقة الرابعة: بناء عادة

إتكلمنا على إن رمضان أكبر فرصة, لبناء عادة نجاح

وإن إحنا نربط عادة النجاح بتاعتنا اللي نفسنا نبنيها …. بحاجة بتحصل يوميا ومتعودين عليها

وكمان إتكلمنا إن في فرصة كبيرة جدا أثناء تحضير الإفطار وعمل مهام المنزل, إن إحنا نحفظ قرآن عن طريق السماع والتكرار

وحطينا روابط برامج ومواقع لتشغيل عدد معين من الآيات وتكرارها… وممكن نسمعها وإحنا بنعمل مهام البيت من تحضير الإفطار وغيره

ونستفيد إستفادة مضاعفة من وقتنا

وكمان إتفقنا إننا هانشوف حلقة رقم ٤ من برنامج أفكار أسلوب: سطر وسطر… علشان نعرف إزاي نستمر على العادات اللي مش عارفين نستمر فيها

الحلقة الخامسة: التخطيط النفيخ… أجمل من ماية البطيخ

إتكلمنا, إن لو مشينا بطريقة ماية البطيخ

وبدون خطة حقيقية

هاتكون سرعتنا مش أسرع كتير من سرعة سلحفاة غلبانة… تمشي الهويني… كما يمشي الوجي الوحل… آه يا وحل يا وحل

الحلقة السادسة: عفوا… لقد نفذ رصيدكم

إتكلمنا فيها عن رصيد الخير من أعمالنا

وإننا عمرنا ما نستقل بأي عمل خير

 لا تحقرن من المعروف شيئا ولو أن تلقى أخاك بوجه طلق

وأخدنا في واجب الحلقة, إن إحنا نشحن رصيد الخير بتاعنا… ونعمل خير 

الحلقة السابعة: اشكرني شكرا

اتكلمنا فيها عن القوة الجبارة لكلمة: شكرا

وذكرنا قصة مهمة من كتاب: كيف تكسب الأصدقاء وتؤثر في الناس, عن قوة كلمة: شكرا

و آخدنا واجب الحلقة, إن إحنا نبعت رسالة فيها كلمة شكرا لشخص محتاجين نشكره

الحلقة الثامنة: العزلة

اتكلمنا فيها عن أهمية العزلة لفترة من الوقت, للناس اللي محتاجة تتميز في أي حاجة في حياتها

واتكلمنا فيها عن إن كل واحد فينا, لازم مايحرمش نفسه من فترة ولو بسيطة جدا, يعزل نفسه عن الموبايل والتشتيت وحتى الناس, لغاية لما يخلص حاجة مهمة في حياته

وكان واجب الحلقة, إن اللي مايقدرش يعزل نفسه فترة طويلة… مايحرمش نفسه من عزلة لمدة ساعة واحدة… يختلي فيها بنفسه وينجز حاجة مهمة

الحلقة التاسعة: إعمل الصح

إتكلمنا فيها عن المبدأ رقم ٩ من سلسلة ال ٢٤ مبدأ – غير تفكيرك تغير حياتك

وقولنا… إن الصح… مش صح واحد… في مليووون صح… وكلهم صح

وإن كل واحد فينا لازم يبطل تطوع في إنه يحشر مناخيره في أمور الناس… طالما بيعملوا حاجة صح

وقولنا حديث النبي صل الله عليه وسلم

من حسن إسلام المرء, تركه مالا يعنيه

الحلقة العاشرة: فكر وسيطر

إتكلمنا فيها عن إننا لازم نجذب لتفكيرنا كل الأفكار السعيدة الإيجابية

ونطرد عنا شبح الأفكار السلبية

وعرفنا فيها كمان… إن مقشة بالأسكندراني يعني: مكنسة

الحلقة رقم ١١: إضغط pause – وقف حياتك

إتفقنا فيها إننا نضغط زرار التوقيف علشان نوقف حياتنا

ونختار… إما نكمل مع بعض المشوار, ونركب أتوبيس النجاح مع بعض… وننفذ الخطوات البسيطة اللي بنقترحها في كل حلقات أسلوب

أو… تركب أقرب توكتوك… وماتضيعش وقتك وباقتك في مشاهدة الحلقات… لو مش هاتنفذ الخطوات البسيطة اللي بنتكلم عليها

وكمان حطينا معاك شوال ملل

الحلقة رقم ١٢: مذاكرة الإمتحانات في رمضان

إتكلمنا فيها أد إيه المذاكرة في وقت الصيام فرصة كبيرة جدا للإنتاجية

وإنها عن تجربة … بتكون فيها الإنتاجية أكبر بكتييير

و الحلقة دي بالتحديد, وصلنا فيها كومنتس كتيييرة جدا… عن إن بالتجربة العملية, المذاكرة والعمل الإنتاجي عموما في أثناء الصيام, ما بيكونش فيه أي تضييع وقت

وكمان قولنا فيها… لو هاتكون صايم… وهاتضيع صيامك على التليفيزيون… يبقى… حنفي (صوت تخين التنين)

الحلقة رقم ١٣… إصابة ملاعب

إتكلمنا فيها عن المشاكل والمصائب اللي بتحصل لكل واحد فينا

وإننا نقدر نقلل الإصابات اللي بتوصلنا من أي صدمة في الحياة

بإننا عند حدوث أي مصيبة مهما كانت, وقبل حتى التفكير … ندعي ونقول: اللهم أجرني في مصيبتي, وأخلفني خيرا منها.

وإزاي إننا لازم نتعلم من كل شدة وموقع صعب بيحصل لنا في الحياة

الحلقة رقم ١٤… السوبر ماركت

اتكلمنا فيها, إن كل حلم بنحلم إن إحنا نحققه… بيكون له ثمن

لازم نعرف إيه هو الثمن, ونكون مستعدين إن إحنا ندفع الثمن

من وقتنا ومجهودنا لغاية لما نحقق الحلم ده

وإننا لو عندنا أحلام كتير… نختار منهم حلم واحد… ونحط خطة إننا ننفذه لغاية رمضان اللي جاي إن شاء الله 

الحلقة رقم ١٥… الأمر بالمعروف… والناس الناصحة

ياااااارااااجل… دي حلقة إمبارح… قوم شوفها.. قوم شوفها

واجب الحلقة النهاردة… هات كراسة أسلوب في رمضان

وإكتب: أنا ها راجع الكراسة دي من الأول… وأشوف إيه الحلقات اللي ما كاتبتش الواجب بتاعها… وهاروح أكتبه… وأنفذه

يعني … كل حلقة فاتتك… أو الواجب بتاعها مش مكتوب في الكراسة… ترجع زي الشطوووور… وتشوف الحلقة وتعمل الواجب بتاعها

إكتب يا عم بقى… 

هيه… أخيرا… وصلنا للجزء التاني من الحلقة 

اللي إنتوا شايفينهم دول… ٥٠٠ كومنت … دور على التعليق بتاعك… وقولنا لما تلاقي تعليقك

دول مجرد ٥٠٠ كومنت, عينة بسيطة من الكومنتس اللي أجمل متابعين في الدنيا بيبعتوهالنا  

قررنا إن إحنا نطبع ٥٠٠ كومنت, ونحتفظ بيهم معانا طول العمر… لأننا فعلا متحتاجين إننا نقولكم: شكرا!!!!

شكرا بجد لكل الناس الجميلة اللي شجعونا تشجيع جميل جدا وشاركوا معانا في حلقات رمضان… مشاركة مختلفة عن أي حاجة عملناها في أسلوب من أول لما بدأنا

شكرا متابعينا على يوتيوب بجد, على كمية التشجيع الكبير جدا …. إحنا بعكس المتوقع… التفاعل الجميل والتشجيع الجميل من أصدقائنا على يوتيوب, أكتر من ١٠ أضعاف المتابعة والتشجيع على فايسبوك… مع إن متابعينا على فايسبوك أكتر بكتيييير جدا

إحنا بنقرأ كل الكومنتس الجميلة اللي بتوصلنا يوميا على كل الحلقات… و بيبقى نفسنا بجد إن إحنا نتصل بكل واحد ونقوله … شكرا شكرا شكرا

لكن… لأن ساعات بيكون أكبر من إستطاعتنا إننا نرد على كل التعليقات… فا لما بنرد على أحد أصدقائنا الكرام… بيكون قصدنا إن إحنا نبعت الشكر ده لكل واحد تاني يكون بيقرأ الرد بتاعنا ده.

إحنا إختارنا بعض المتابعين بصورة عشوائية جدا جدا… و عاوزين نقولهم شكرا في الحلقة دي… لكن… إحنا نقصد بالشكر ده… كل شخص أخد من وقته دقيقة علشان يشجعنا 

وكل شخص جميل أخد من وقته لحظة وعمل شير ولايك… وكل شخص إحنا بنحبه بجد جدا ومانقدرش نشكره أبدا… أخد من وقته ودعا لنا… وبنحب نقول للشخص ده… حديث النبي صل الله عليه وسلم: 

ما من عبد يدعو لأخيه بظهر الغيب إلا قال الملك ولك بمثل

جزاكم الله خيرا إخواننا الكرام  🙂

ورمضان… كريييييم