حلقة رقم ٢: كنافة بالمانجه

 

أهلا بيكم في الحلقة رقم ٢ من برنامج أسلوب في رمضان –

وجينا لكم بعد أول يوم صيام – وحلقة بعنوان : كنافة بالمانجة

طبعا…. خطة رمضان الثابتة في رحلات عزومات الإفطار

هي إنك أول يوم بتفطر عند باباك ومامتك

وتاني يوم عند حماتك (دا لو رضت تعزمك طبعا)

وتالت يوم عند خالتك أو عمتك… حسب مين فيهم طبيخها أحلى… ومين بتحط مكسرات أكتر على الرز

هو الترتيب نفسه بتاع الفطار بتاع كل سنة في رمضان

ودي طبعا فرصة جميلة إنك تتعزم وتاكل أكل عمتك اللي وحشك… والحمام المحشي بتاع خالتك… والمكرونة البشامي بتاعة حماتك (دا لو عزمتك طبعا)

بس الأهم من ده كله, إنها فرصة إنك تشوف قرايبك اللي بقالك زمان ماشوفتهومش

كلنا بنكون فرحانين جدا بلمة رمضان العائلية

وبنلبس ونتشيك ونلبس ولادنا أحسن لبس

وبننسى أهم حاجة… إن إحنا نجدد نيتنا وننوي إن العزومات دي تكون بنية: صلة الأرحام

وفرصة جميلة جدا إن إحنا ندخل البهجة والسعادة في قلوب قرايبنا … ولأن الأقربون أولى بالمعروف … يبقى ممكن نكون شاطرين, ونعمل حاجات مختلفة في زيارات رمضان السنة دي

ممكن وإحنا رايحين نفطر عند قرايبنا السنة دي, وبدل ما ندخل عليهم بالكنافة اللي بالمانجة … واللي بنفضل نتباهى إن إحنا جايبينا من أغلى حلواني في البلد كلها

ياريت ندخل عليهم بهدايا من نوع تاني في رمضان السنة دي… هدايا تكون أجمل وأبقى

وبعدين أصلا أصلا أصلا الناس اللي إنت رايح تزورهم دول عاملين كنافة في البيت, وحارقين نصها اللي فوق وسايبينها سايحة من تحت… يعني الكنافة اللي بالمانجة بتاعتك دي… هاتعمل فتنة وثورة وإنقلاب

إمشي جوة الحيط أحسن لك

إنت السنة دي, تجيب هدايا مختلفة – هات مصاحف مثلا, تكون مصاحف مميزة وليها طباعة مميزة

أو سبح شكلها حلو

أو بخور تكون ريحته حلوة …

أو سجاجيد للصلاة …

فعلا هاتدخل علي قلبهم السرور والفرحة, وكمان الهدايا بتاعتك هاتكون مميزة جدا, لأنها هاتفكرهم دايما بالعبادة… وهاتفضل عندهم طول العمر … خاصة لو ما أستخدموش البخور … هايفضل عندهم كتير

نصيحة أخيرة… بلاش تجيب تمر وإنت رايح تزور حد… علشان ممكن تلاقي صاحب البيت … خبطك في وشك بعلمة التمر… لأنه أكيد مش عامل العزومة دي كلها… علشان تيجي إنت في الآخر وتحاول تاخد ثواب إفطار صائم بالتمر بتاعك يا ناصح… بس على العموم جرب… … و أكيد بقى وإنت بتعزم حد… تفتكر تجدد نيتك وتفتكر إنك مش بتعزم حد على الفطار علشان تعرفه إنك حاطط مكسرات على الرز

إنت بتعزم الناس على الإفطار بنية تأليف القلوب, وصلة الأرحام… وإفطار صائم… وكل ما كنت شاطر في إيجاد نوايا خير… كل ما كان الفضل إن شاء الله أكبر بكتير

عزومات رمضان كمان فرصة جميلة جدا إنك تصالح أي حد مقاطعة من قرايبك… إحنا عارفين إنك خسرت نص قرايبك في خناقات الفايسبوك بتاعة مين صح ومين غلط

فرصة إنك تصالح كل قرايبك حتى لو هما اللي غلطانين… إنتوا أكيد مختلفين في حاجة واحدة, ومتفقين في ١٠٠٠ حاجة تانية

خد إنت الثواب… وإبدأ إنت بالصلح… وخد ثواب مضاعف… وتبقى جامدة دي منك يا كبير… ولو هاتصالح حد… يبقى كأستثناء للقاعدة السابقة, هاتلوا هدية طبق كنافة… بس بلاش كنافة بالمانجة علشان النوى بتاعة المانجه بيكون كبير شوية… هات سندوتشات كنافة بالقشطة واللب السوري … وماتنساش … النية أهم حاجة… جدد نيتك… وصفي قلبك

ولو لقيت الكنافة سعرها ضعف السنة اللي فاتت… فا ده بسبب إرتفاع سعر الدولار…

طب … مال الكنااااافة… ومال الدولار!!!!!! أهو أي فتي وخلاص

وأخيرا… في العزومات… مش هانوصيك… خليك إنت النجم في وسط قرايبك… بإيجابيتك وتشجيعك وروحك الجميلة يا حبوب

واجب النهاردة:

١- جدد نيتك قبل كل الأعمال

٢- جدد نيتك وإنت بتجدد نيتك إنك بتجدد نيتك علشان تاخد ثواب

٣- تجديد النية قبل كل عمل…

٤- إعمل شير للحلقة دي دلوقتي… وطبعا لازم تكون نيتك وإنت بتعمل شير هو نشر الخير والإيجابية والسعادة… وياسيدي مساعدة لأصدقائك في #أسلوب