حلقة جديدة من سلسلة حلقات مفاتيح النجاح و المفتاح التالت:

ما فيش حاجة بتنجح من أول مرة.

ايوه النجاح عمره ما بيتحقق من أول مرة!!

مش من أول مرة هتلعبى رياضة هتخسى، و لا من أول مرة هتشيل فيها حديد هتعمل فورمة الساحل!!

مش من أول مرة هتذاكر فيها درس من المنهج اللي عليك هتفهمه ١٠٠ %، و مش من أول سنة هتعمل فيها مشروع هينجح ويجيبلك أرباح و عائد مادى، ده حتى مش من أول مرة هتقابل فيها حد هتحبه، لازم تعاشره الاول علشان تحبه……..ريح نفسك “من أول مرة تنجح دى” مش موجودة فى قاموس النجاح…

من مفاتيح النجاح الأساسية أنك تعرف و تفهم تعريف مصطلح “الفشل” ، كلنا بنقول و فاهمين أن الفشل عكس كلمة النجاح، لكن التعريف الصح للفشل أنه جزء من النجاح، و اللحظة اللى هتدرك فيها التعريف الحقيقي للفشل بأنه جزء من النجاح، هى اللحظة اللى هتخليك ما  تزعلش لما الأمور ما تمشيش زى ما انت عايز، لأن النجاح ليه مراحل لازم كلنا نعدى بيها، و أهم و أول مرحلة فى النجاح هى انك تفشل و تتوقع الفشل.

الطفل الصغير عمره ما قدر يمشى من أول مرة، فضل يحاول و يقع أكثر من مرة لحد ما قدر أنه يمشى…ولو كان استسلم من أول مرة وقع فيها ما كنش قدر بعد كده أنه يمشى، و بعد ما قدر يمشى قدر أنه يجرى!!

و لا قدرنا أننا نتعلم القراءة من أول مرة و نقدر اننا نقرأ الكلمات الصعبة، بدأنا الاول بأننا نتعلم الحروف و بعدها الكلمات البسيطة، لحد ما قدرنا نقرأ مناهج دراسية ملهاش أول ولا أخر.

اعتبر النجاح كأنه مدرس قاسى جدا و بيعلمنا أننا نتعلم من أخطائنا.

أكيد باتفق معاكم أن الشعور بالفشل شعور مش لطيف، بس ده مش معناه أنه شعورمش مهم أننا نحس به. احنا محتاجين أننا نفشل علشان نتعلم و نتطور. أديسون بيقول “أنا عمرى ما فشلت” أنا بس جربت ٢٠ مرة لحد ما نجحت، عمرك ما هتحس بحلاوة النجاح غير لما تدوق مرارة الفشل.

الحاجات الجميلة فى حياتنا عمرنا ما بنعرف قيمتها غير لما نكون شفنا الحاجات الوحشة، علشان كده حدد أنت نفسك تنجح فى ايه فى حياتك، و ابدأ أنك تفشل و أقبل بالفشل و استمتع بالرحلة كلها……علشان فى النهاية تحس بحلاوة النجاح.

ملخص المفتاح الثالث:

    النجاح عمره ما بيتحقق من أول مرة……مش هاتعمل فورمة الساحل من اول مرة تشيل فيها حديد و لا هاتخسي من اول مرة رياضة.

لازم نفهم المصطلح الحقيقي للفشل بانه جزء من النجاح مش كلمة عكس كلمة النجاح

مافيش حاجة اسمها انا فشلت كذا مرة…..فيه حاجة اسمها انا بجرب كذا مرة و كذا طريقة لحد ما انجح.

و اخيرا عمرك ما هتحس بحلاوة النجاح غير لما تدوق مرارة الفشل.

قلنا اكتر حاجة استفدتها من الحلقة كانت ايه و فعلا حاسس انها حاجة ممكن تفرق معاك فى المستقبل و فى طريقة تفكيرك.

استنونا الحلقة القادمة و مفتاح جديد