المذاكرة والإمتحانات في رمضان

أهلا بيكم في الحلقة رقم 12 من برنامج #أسلوب في رمضان

وحلقة بعنوان: المذاكرة والإمتحانات في رمضان

لكن … الحلقة مش للي بيذاكر علشان الإمتحانات فقط

دي لكل واحد بيشتغل أي شغل مهما كان في رمضان

أنا هاقولكم حاجة حقيقية أنا كنت بعملها في كل إمتحاناتي في كل سنين دراستي في كلية الهندسة

أنا كنت بصوم كل أيام الإمتحانات والأيام اللي بينها …. حتى لو مش رمضان

ماكنتش ببطل صيام أبدا أيام الإمتحانات بجد

سواء كانت نص السنة في البرد واليوم قصير… أو في الحر واليوم طوييييل

بس هاقولكم الموضوع بدأ معايا إزاي

وأنا في أول سنة في كلية هندسة, كان عندنا إمتحانات ميد تيرم… والإمتحانات كان نصها قبل شهر رمضان مباشرة

والنص التاني من الإمتحانات في بداية شهر رمضان وأثناء الصيام

أول ٣ مواد ذاكرتهم وإمتحنتهم قبل رمضان على طول… 

كان بيضيع مني وقت كبيييير أوي في البريكس بتاعة الشاي والقهوة… وأنا جعان وعاوز سندوتش… طيب هاكل دلوقتي… وكنت آكل وأناااام

وأول لما بدأ رمضان … و إمتحنت باقي الإمتحانات في رمضان

لقيت في فرق كبييير جدا في الإنتاجية في المذاكرة

أنا فترة الصيام كلها مفيش أدامي أي إختيار أبدا مهما كان … غير إني أذاكر.

مفيش تضييع وقت في أكل أو شاي أو قهوة أو تليفزيون

(و ماكنتش بتفرج على تليفزيون وأنا صايم… علشان ما تطلعليش واحدة فاضلة, ضاربة شعرها إزازة أكسوچين… وممعجنة وشها بوية مخلياها شبه الزومبيز… تضيعلي صيامي

ماهو ما أبقاش صايم عن الأكل الحلال… وحتة واحدة زومبي… تضيعيلي صيامي… حنفيييييي)

حلو أوي… مفيش أكل… مفيش تليفيزيون؟ 

طيب في إيه؟؟؟ في مذاكرة

بس مش أي مذاكرة… مذاكرة بدفن نفسي فيها علشان ما أحسش باليوم

كنت بضطر فعلا أخلص كمية مذاكرة مبهرة… أنا فعلا كنت بنبهر بكمية المذاكرة اللي بخلصها أثناء الصيام

أنا كنت بذاكر وأنا صايم, أضعاف أضعاف المذاكرة اللي بذاكرها بدون صيام… سواء الصيام ده كان في رمضان أو في غير رمضان

اليوم منظم جدا غصب عني… الصلاة في وقتها في المسجد… كانت بتبقى أجمل بريك… وبتدي طاقة جبارة

وتدعي بقى وإنت صايم كده إن ربنا يرزقك التركيز في المذاكرة والإنتاج

وكنت ببقى خفيف جدا وماكنش بيجيلي نوم… لأن ما كنش في حاجة في معدتي تضغط عليها

حاجة تانية كانت بتشجعني جدا جدا جدا في إني أضغط على نفسي وأقعد وقت مذاكرة أكبر من قدراتي… هي الناس اللي بتشتكي و تعيط طول الوقت

لما كنت بلاقي الناس اللي بتقعد تعيط وتشتكي من إنها مش هاينفع تذاكر وهي صايمة

الناس دي كانت بتديني طاقة مضاعفة بجد

كنت بقول لنفسي… الله… أنا فرصتي بقت مضاعفة

أولا: أنا بذاكر أحسن في الصيام… علشان باستفيد من عدم تضييع الوقت, ومن نظام اليوم غصب عني

وثانيا… أنا بتفوق على كل اللي مش فاهمين إن المذاكرة في الصيام دي فرصة كبيييرة جدا جدا لمضاعفة الإنتاج

أنا مش جاي النهاردة أقولك كلام نظري أو حتى أشجعك… 

أنا جاي أحكيلك تجربتي الحقيقية بجد مع المذاكرة في الصيام

وأنا شخص طول عمري… لما بجرب حاجة وتنجح… بفضل أكررها على طوووول

وزي ما إنت ممكن تكون خمنت, أنا كنت خلاص ببقى متبرمج… إن فترة الإمتحانات تقرب… كنت بصوم أوتوماتيك من غير حتى ما أفكر

إرتباط شرطي بجد

وكمان جاي أقولك: إنت كده أو كده صايم

مفيش أدامك أي إختيارات يعني… هاتصوم … هاتصوم

قوم إستفاد من إن وقتك مش المفروض إنه ينفع يضيع

عندك وقت صيام… إستخدم الورقة والقلم في المذاكرة

وإعمل لنفسك شوية خرايط ذهنية حلوة كده

وشوف ترسانة حلقات أسلوب عن المذاكرة و الإمتحانات والهروب من المذاكرة بحجة النوم… 

هاتلاقي الروابط كلها تحت الفيديو ده في قناة أسلوب على يوتيوب

وفي الكاردز اللي بتظهر على يمين الفيديو فوق دي… إضغط عليها ماتخافش… دي طيبة جدا

وإعرف إن عن تجربة… المذاكرة في الصيام… أكتر فرصة للإنتاج والنجاح

ولو مخك بيحاول يضحك عليك ويخليك تعتقد إنك مش عارف تركز علشان الصيام

هافكرك… إن هو ده نفس مخك برضه اللي بيقعد يخليك تضيع وقت ومجهود ويخليك تنام بعد الإفطار… مع إنك المفروض تذاكر

وهو هو نفس مخك اللي كان بيحاول يضيع عليك أي فرصة مذاكرة أو إنتاجية من أول السنة

الإمتحانات في الصيام … أجمل فرصة

إستحضر نية العبادة وإنت بتذاكر… وإنت بتعمل أي عمل إنتاجي

عندك فرص جميلة جدا لبريكس راقية

صلاة الجماعة في المسجد

قراءة قرأن

دعاء

دعاء

دعااااااء

وإستفيد من كل مميزات وقتك في الصيام

ولو كنت خلصت إمتحانات… فا إعرف إنك عندك فرصة إنت كمان لإنتاجية أعلى 

وإكتبلنا في كومنت… تجربتك مع المذاكرة (أو الإنتاجية عموما) مع الصيام

وشير الحلقة دي مع كل الناس اللي عندهم مذاكرة أوإمتحانات في رمضان

ورمضاااااان كرييييم