اصابة ملاعب

 

 

السلام عليكم, وأهلا بيكم في الحلقة رقم ١٣ من برنامج: أسلوب في رمضان

وحلقة بعنوان: إصابة ملاعب… 

معظم الرياضيين المحترفين في أي لعبة, بيجي عليهم مرة أو أكتر في حياتهم… ويجيلهم إصابة وهما بيمارسوا الرياضة بتاعتهم أو وهما في التمرين

لما بيجيلهم الإصابة دي, بيضطروا يوقفوا تمرين ويوقفوا ممارسة رياضتهم … ويوقفوا كل حاجة في حياتهم

الإصابات دي بتحصل تقريبا لكل الرياضيين في كل الرياضيات (بنسب متفاوتة في الخطورة طبعا)

وفي أوقات كتيرة جدا: الإصابات دي بتحصل قبل البطولات وفي أثناء أشد التدريبات… 

يعني بتحصل لهم في أكتر وقت هما محتاجين إنهم يكونوا في أعلى لياقة بدنية ليهم

مع إن دول رياضيين, والمفروض يكونوا آخر ناس يحصل لهم أي مشاكل صحية

لكن… مش هي دي سنة ربنا في الحياة

سنة ثابتة في الحياة, إن علشان يتميزوا عن أي حد تاني في مجالهم, لازم في مشوار صعودهم للقمة… تقابلهم إصابات… تقابلهم صعوبات ومعوقات… ممكن بجد توقف لهم مشوار نجاحهم…. حسب عزيمة كل واحد… وحسب حبه لرياضته… بيكون وقت عودتهم

إصابة الملاعب دي بتكون واضحة جدا في حياة الرياضيين… لكن!!!!

إحنا كلنا بيحصلنا إصابات ملاعب في حياتنا كتيييير أوي… (بنسب مختلفة في حياتنا)

دي سنة من سنن الحياة

إن إحنا نكون بنجتهد في مجال عملنا ومذاكرتنا ورياضتنا … وكل حاجة المفروض بنطلع فيها فوق

ويجيلنا إختبار كبير في الحياة… يهدد مشوار نجاحنا

إصابة ملاعب بتختلف في قوتها لكل واحد فينا…. لكن… كل واحد فينا بلا إستثناء بيحصل له إصابات ملاعب… اللي ماحصلوش إصابة ملاعب في الحياة لغاية دلوقتي…. يبقى لسه هايحصله

إصابة الملاعب دي ممكن تيجي لطالب في أهم وقت هو محتاج فيه النجاح

وبتيجي لكل واحد بيفقد إنسان غالي عليه في الحياة

وبتيجي لعائلات كتيرة بيكون فيها مشاكل عائلية

وبتيجي لناس كتيرة في شغلها… مشكلة في الشغل, مشكلة مع زميل عمل أو مدير

و بتيجي كمان لأشهر الناس في جميع المجالات… المذيع المشهور, والرياضي المشهور ورجل الأعمال المشهور والكاتب المشهور… وكككككل المشاهير

بيكون عليهم ضغط نفسي وعصبي … بيخلي الإصابات تحصل يوميا… تلاقي الواحد فيهم طالع بيرسم ضحكة أمام الكاميرا وعلى حسابه… وهو في قلبه فعلا وجع وألم

(الحمد لله إن الواحد مش مشهووووررررر)

طيب يا عم أسلوب… فهمنا إن كل الناس بيجيلها إصابات ملاعب… سواء إصابات حقيقية… أو مشاكل في الحياة

خلص حضرتك علشان إحنا صايمين و بنزهق بسرعة التنين… ولو خبطك في دماغك يا فطين… هاتقول… يامين يحوشوا عني مين (بصوت ضفدع بشري مسكين)

آه… ماشي… طيب… علشان بس  خاطر صوتك اللي زي  الضفدع المسكين… هاقولك إحنا ليه النهاردة جايين

 (صايمين … تنين… تصدق حلوة منك دي يا فطين!!!!)

إنت إنسان حبوب… وهايحصلك إصابات كبيرة في حياتك… بمزاجك أو غصب عنك

نفس عميق كده… وإسمع المعلومة دي كويس

إنت لازم تتعلم… إزاي تستقبل كل الصدمات والإصابات والمشاكل في حياتك الأول

وبعدين… إزاي تتعافى منها كويس (باونس باك يعني)

محتاج يكون عندك إير باج زي بتاع العربيات… يخلي أي صدمة توصلك… يوصلك منها أقل قدر ممكن من الإصابة

ومحتاج بعد لما تقوم من الصدمة بأقل خساير ممكنة, تتعلم إزاي تقوم وتتعافى وترجع أقوى من الأول ميت مرة

كل إصابة بترجع منها بقوة… بتخليك أقوى… بتخلي عزيمتك أقوى… بتخلي إيمانك وثقتك بنفسك أقوى ملييييون مرة

أقوى من مليون محاضرة عن إزاي إنت عندك قدرة

إنت بيكون عندك بالدليل العملي… إن إنت تقدر تقوم من أي إصابة أو مشكلة… وترجع أقوى من الأول

ده طبعا بدل ما تقعد تصوصاون تكاكي (أنا سقطت… أنا إتسرقت… أنا مشروعي باظ… أنا وقعت واتكسرت… أنا العين صابتني وبماممبا…… خلاص يا سيد )… كل الهري ده… 

هات كراستك بتاعة أسلوب في رمضان وإكتب معايا… (وممكن تشغل مخك كمان وإنت بتكتب… مفيش مشكلة خالص):

٣ أجزاء مهمين لإستقبال وعلاج… الإصابات في الحياة:

الجزء الأول: خطوات تركيب الإيرباج… أو مخفف الصدمات:

ےإن الصبر عند الصدمة الأولى

أول لما يجيلك إصابة… وقبل ما تفكر.. وقبل ما تستوعب إيه اللي بيحصل

قول: إنا لله وإنا إليه راجعون… لله ما أعطى, ولله ما آخذ, وإنا بقدر الله راضون

اللهم أجرني في مصيبتي وأخلفني خيرا منها

….. 

الدعاء ده, وفهمه وقوله عند الصدمة الأولى… هو الإيرباج… مخفف الصدمات بتاعة أي صدمة

عاوز تستخدم إير باج أو مخفف صدمات… هو ده الإيرباج بتاع أي صدمة

يقينا… دعاء: اللهم أجرني في مصيبتي وأخلفني خيرا منها

هايرجع لك من الصدمة دي… خير أكثر من الأول

والله العظيم وعن تجربة من كل الناس اللي جربوا الدعاء ده عند الصدمة الأولى من كل مصيبة

ماهو إنت ذكي… إنت خلاص … الإصابة وقعت… الإبتلاء وقع… هاتعيط وتصوصو… It’s what it is… and cannot be otherwise 

يبقى… تمتص الصدمة… علشان تاخد أقل ضرر… وترجع أقوى من الأول

إكتب تاني: عند وقوع أول إصابة ملاعب لك في الحياة… مهما كانت.. وقبل ما حتى تفكر في أي حاجة… قول: إنا لله وإنا إليه راجعون… اللهم أجرني في مصيبتي… وأخلفني خيرا منها

الموضوع ده كبيييير جدا… ولو عاوز تبقى محترف إزاي تتلقى إصابة, من إصابات الملاعب في الحياة… يبقى تروح على يوتيوب بعد الحلقة دي وتدور على: الصبر عند المصيبة

الجزء التاني بقى من علاج إصابات الملاعب… هو إن إحنا نتعلم من الإصابة دي… ونشوف إزاي نرجع أقوى من الأول (ده طبعا بعد لما نكون أذكياء ودعينا بإن ربنا يخلف علينا الخير من وراء هذا البلاء)

أول حاجة… لازم نتعلم من الإصابة اللي حصلت لنا دي… لأنها جت علشان نتعلم

١- لو أنا لاعب رياضة مثلا… وحصل ليا إصابة حقيقية… هاتعلم إيه اللي عملته غلط… علشان ما أكررووش تاني

٢- لو أنا طالب وسقطت… أو جبت درجات وحشة… أو حتى جالي بس نوبة قلبية ليلة الإمتحان من الرعب… لازم أتعلم من الغلطة دي إني ما أكررهاش تاني

٣- لو دي مشكلة أسرية حصلت ليا… ومهما كانت الإصابة … حتى لو أنهت حياتي الأسرية كلها… لازم تكون دي الدافع إني فعلا أكون إنسان جديد… وأعرف أبدأ حياة جديدة صح

٤- لو فقدت حد عزيز عليا جدا… فا دي أهم رسالة من ربنا… تفهمنا إن الحياة دي منتهية… مش هانستوعب أبدا غير لما نفقد كل اللي حوالينا واحد ورا التاني لغاية لما يجي دورنا

الحقيقة العملية… درس مررر… وهايعدي على كل واحد فينا

الجزء الثالث من الإصابة… العودة للملاعب… باونس باك زي ما بيقولوا

الحياة بتستمر

ممكن يكون إختيارك إنك تكمل بكاء على الماضي… بس صدقني… هاتكمل حياتك كلها بكاء… ومش هاترجع حاجة

ممكن تخلي الإصابة دي أجمل حاجة حصلت لك في حياتك… بإنها تكون العزيمة الحقيقية إنك ترجع تاني من الأول

مرة تانية… إنت لازم تكون كتبت في كراستك ال ٣ خطوات المهمين بتوع التعامل مع إصابات الملاعب والحياة

١- إمتصاص الصدمة, أو الإيرباج: إنا لله وإنا إليه راجعون: اللهم أجرني في مصيبتي وأخلفني خيرا منها

٢- أتعلم من الإصابة دي… مهما كانت المشكلة أو الكارثة اللي حصلت ليا… لازم أتعلم منها درس في الحياة

٣- العودة للملاعب وللحياة… ممكن أخلي الإصابة دي أجمل حاجة حصلت ليا في حياتي كلها… وأرجع أقوى من الأول مليييون مرة

وأخيرا… مفيش حد بسمعني دلوقتي… ما حصلش له إصابة ملاعب في حياته كذا مرة

إصابة حقيقية, أو إنسان عزيز عليه سابه, أو جاب درجات مش كويسة, أو حصلت له كارثة كبيرة

لكن… ال ٣ خطوات اللي قولناهم دول… بداية قوية جدا… لرجوع قوي للملاعب وللحياة

من فضلك… الحلقة دي بالتحديد… فيه ملايين وملايين فعلا محتاجين يسموعها… ومش بتوصل لحد غير لما إنت تقوم بدورك وتعمل شير للحلقة

إعمل دورك وإضغط شير…وإشترك في قناة أسلوب على يوتيوب علشان تشوف كل حلقاتنا اللي جاية

ورمضااااان كرييييم