قواعد اللعبة

 

أهلا بيكم في الحلقة رقم ٢١ من برنامج: أسلوب في رمضان

وحلقة بعنوان: قواعد اللعبة
عاوز أسألك سؤال الأول
إنت لو بتلعب كورة… هل صح إنك تلمس الكورة بإيدك؟
الجواب: حسب اللعبة اللي أنا بلعبها دلوقتي حالا
لو هي كورة قدم… يبقى غلط جدا إني ألمس الكورة بإيدي
لكن… لو بلعب كورة يد أو كورة سلة أو كورة طايرة… أو حتى كورة ماء… يبقى صح مليييييون في المية إني أمسك الكورة بإيدي
وحتى لو بتلعب كورة قدم… بس على البلاي ستايشن أو الكمبيوتر…. يبقى إوعى تمسك الدراع برجلك… بإيدك برضه… بإيدك يا كبيييير
إمممم…. طيب عاوز إيه يا عم أسلوب التنين … إحنا لسه فاطرين… ولألغازك مش فايقين
إحنا جايين نقولك حاجة مهمة جدا النهاردة… مهمة جدا إنك تستوعبها كويس… وتخليها في دماغك على طول
في الحياة كلها… قواعد اللعبة مش ثابته… قواعد الفوز في الحياة مش ثابتة
كل أيام, وكل ظروف… وبيكون لها قواعد لعبة مختلفة … واللي عاوز يكون ذكي… ويكسب في الحياة
لازم يقف مع نفسه ويفكر… ويشوف … في الوقت والظروف اللي هو عايش فيها دلوقتي… إيه قواعد اللعبة اللي هاتخليه يكسب
يعني مثلا… لو أنا طالب… هل أموت نفسي في المذاكرة ليل نهار ليل نهار
ولا… أذاكر شوية, وآخد بريك شوية؟
الإجابة… حسب الوقت اللي إنت فيه… قواعد اللعبة بتختلف
لو إنت مفيش عندك ضغط مذاكرة وإمتحانات… يبقى الذكاء إنك تذاكر بإجتهاد وتركيز شوية, وتاخد بريك شويتين
ولما توصل لأيام الإمتحانات… يبقى قواعد اللعبة ساعتها… إنك تجتهد أكبر بكتير في المذاكرة… حتى على حساب الراحة لو تقدر
ولو إنت عندك هدف كبير بقى… إنك تجيب تقدير في الجامعة… أو إنت في ثانوية عامة وعندك حلم بإنك تجيب درجات عالية جدا
يبقى قواعد اللعبة ساعتها … إنك تكون ذكي جدا ويوميا تحط خطة متجددة ذكية للمذاكرة والمتابعة والنجاح
قواعد اللعبة… بتتغير… والفوز في الحياة… بيكون للشخص الذكي اللي بيتحرك في الحياة… حسب قوانين اللعبة في الوقت الحالي والظروف الحالية
لو أنا أب أو أم… هل الصح إني أدلع أولادي وألبي كل طلباتهم مهما كانت؟
ولا… الصح إني أضغط عليهم وأحطهم في تحدي مع نفسهم على طول؟
أكيد… في أوقات هايكون الصح فيها إن إحنا ندلعهم بزيادة… وأوقات تانية هايكون الصح إن إحنا نكون بنشجعهم على الإجتهاد وتحدي نفسهم وقدراتهم.. علشان يكبروا في الحياة
لو أنا موظف … هل أموت نفسي في الشغل وأبات في الشغل ٢٤ ساعة علشان أخلص شغلي؟
ولا… المفروض يكون في توازن بين الشغل والبيت؟
الأصل طبعا… إن لاااازم ولاابد إنه يكون في توازن بين البيت والشغل
لكن… لو أنا لسه بادئ شغل جديد, ومحتاج أثبت نفسي… أو في ظروف مؤقته في الشغل … محتاجة مني مجهود مضاعف… هاينجح الشغل بتاعي… وكمان هايرفع من قيمتي في عملي
يبقى ساعتها… الذكاء إنك تفهم إن قواعد اللعبة في الوقت ده… إن الواحد يجتهد أكتر من الطبيعي في شغله … لأنه بيبني نفسه ومستقبله
حتى سؤال بسيط زي : هل ألغي الشغل كله من حياتي, وأفرغ حياتي للعبادة ٢٤ ساعة؟
حتى السؤال البسيط ده… إجابته… حسب قواعد اللعبة اللي إنت فيها دلوقتي
طبعا, غير مقبول أبدا إن واحد يفرغ حياته للعبادة, وحد تاني هو اللي يصرف عليه و يدير حياته بداله
لكن… لو إحنا مثلا… مثلا ياعني… في العشر الأواخر من رمضان… يبقى صح مليييييون في المية إن الواحد يفرغ حياته ٢٤ ساعة في ال١٠ الآواخر للعبادة 
لو هو عاوز يعتكف, ويتبع سنة النبي صل الله عليه وسلم
قواعد اللعبة في الحياة… مش ثابته خالص… عندك وعند غيرك
ممكن كمان… تكون قواعد اللعبة دلوقتي إنك تجتهد في لعب الرياضة علشان تخس… وقواعد اللعبة عند واحد تاني رفيع… إنه عاوز ياكل كتير علشان يتخن
كل واحد فينا … بيكون عنده قواعد لعبة… مختلفة عن الشخص اللي أمامه
يبقى الأفضل إن إحنا نركز مع نفسنا… ونشوف إيه اللعبة اللي بنلعبها دلوقتي… ونفكر بذكاء… إيه قواعد اللعبة اللي بنلعبها… اللي هاتخلينا نكسب في الحياة
واجب الحلقة النهاردة
كراستك المتينة بتاعة أسلوب في رمضان
وإعمل جدول
إكتب في الجدول ده… الأجزاء المهمة في حياتك
الدراسة
الرياضة
الشغل
العائلة والأولاد
وكل حاجة تانية مهمة عندك في الحياة
وحاول تفكر بذكاء… إيه قواعد اللعبة اللي المفروض أتبعها مع كل حاجة مهمة في حياتي في الوقت الحالي… علشان أطلع بأكبر إستفادة ممكنة
وإكتبلنا في كومنت…إيه الحاجة اللي المفروض تعملها… وقواعد اللعبة اللي هاتخليك تكسب بذكاء إيه هي
وأكيد… إعمل شير للحلقة دي بكل الزراير الجميلة الملونة اللي عندك دي
فايسبوك, واتس آب, جوجل بلس, تويتر.. بطييييخ… …. شير ومنشن… وخليك حبوب
و رمضااااان… كرييييييييم