بناء العادات

 

أهلاً بيكم وثالث يوم رمضان

و الحلقة رقم أربعة من برنامج أسلوب في رمضان.

و حلقة بعنوان:  “بناء عادة نجاح خلال شهر رمضان”.

أثبتت الدراسات إن علشان تبني أي عادة في حياتك وتستمر عليها

لازم تداوم عليها و تكررها كل يوم و لمدة 21 يوم علي الاقل

علشان تقدر تثبت العادة دي في حياتك.

و رمضان عندنا ٣٠ يوم…. يعني يكفي وزيادة.

“تايم لاين محدد بيجيلنا كلنا و لحد عندنا مرة واحدة في السنة”

.اليوم فى رمضان بيكون منظم جدا من غير أي مجهود نعمله.

كلنا نفسنا نخلق عادات جميلة في حياتنا…. رمضان بقى… فرصة كبيرة بالنسبة لينا إننا نقدر نحقق ده.

ولازم نستغل فرصة رمضان ونبني عادة إحنا محتاجينها… وتستمر معانا طول عمرنا إن شاء الله.

تعالوا نجيب ورقة وقلم … ونكتب مع بعض كل العادات اللي نفسنا إن إحنا نداوم عليها في حياتنا

وبعدها… نختار منهم عادة واحدة بس

ايوة عادة واحدة بس نختار أننا نعملها كل يوم في رمضان و لمدة ٣٠ يوم كاملين.

حدد اي عادة جميلة نفسك أنها تكون جزء من حياتك

مثلا: عادة القراءة،

قراءة لمدة نصف ساعة كل يوم أو أنك تتفرج على فيديوهات تعليمية لمدة معينة كل يوم، أو أنك تلعب رياضة لمدة١٠ دقايق يوماً.

و إنك تبدأ تكتب لستة كل يوم الصبح لاعمالك و مهامك اليومية و تلتزم بيها و تنفذها بجد-

أو أنك تداوم علي قراءة الأذكار….كل الاعمال دي ممكن نعملها خلال نهار رمضان و قبل الفطار.

وكمان حتى ممكن يكون ليكي عادة يومية للاعتناء ببشرتك , و كمان تبدأي تشربي 2 لتر مياه علي الاقل فى اليوم.

من الحاجات اللي هاتسهل عليك كمان انك تبني عادة جديدة فى حياتك هى ربط العادة الجديدة دي بعادة تانية بتعملها و موجودة فى حياتك اليومية أصلا.

ممكن مثلا يكون ليكي روتين يومي للاعتناء ببشرتك تعمليه بعد غسيل الاسنان مثلا.

و ست البيت اللي ليها روتين يومي للطبيخ تقدر و هى بتطبخ انها تحفظ قران كمان في نفس الوقت عن طريق السماع وتكرار السماع ….

لو دورتي فى صديقنا جوجل على جملة “برامج تحفيظ القرآن” …. هايظهرلك موقع تقدري من خلاله تحددي بداية و نهاية الأيات اللي عايزة تحفظيها وتكرري عدد الايات دي بأي عدد من المرات تختاريه.

و كمان ممكن تختاري قراءات لشيوخ مختلفين و تحطي كمان سكتات بين كل آية و آية لو حابة تكرري السور وحاجات تانية كتيرة ….

وهاتلاقي برامج تحفيظ قرآن زي كده على موبايلك … هانحط روابط المواقع والبرامج اللي جربناها وكانت كويسة في الديسكريبشن تحت الفيديو على قناة أسلوب على يوتيوب.

المهم … تجيبي الموبايل أو اللاب توب بتاعك فى المطبخ…  و تشغلي ورد الآيات اليومية لحفظك و تطبخي فطار الصايمين كمان فى نفس الوقت………..الثواب ثوابين اهوه فرصتك كبيرة جدا.

و لو عندك عادة يومية انك تمشي…  يبقى امشي و اسمع درس او كتاب فى نفس الوقت……

ربط العادة الجديدة بعادة تكون قديمة….  بتسهل عليك جدا الاستمرار و المداومة علي العادات الجديدة.

30 يوم إلتزام…….30 يوم ما فيش هزار

هما 30 يوم تدرب فيهم نفسك…  على انك تجبر نفسك علي تأديب نفسك بنفسك ……

كرامتك محفوظة انت اللي بتأدب نفسك مش حد غريب…..

إجبار النفس ده فى حد ذاته عادة لازم نخلقها فى حياتنا و نتدرب عليها….

حياتنا هاتتغير بدرجة كبيرة جدا جدا

واجب الحلقة النهاردة:

هات كراسة أسلوب في رمضان اللي بقالنا ٤ حلقات بنقولك عليها

وإكتب واجب النهاردة… ونفذه

تكتب كل العادات اللي بتتمنى إنك تبرمجها في نفسك

وإختار منهم عادة واحدة… وحط خطة إنك تنفذها يوميا

وكمان… شوف الحلقة رقم ٤ من برنامج أفكار أسلوب… بعنوان: سطر وسطر على قناة أسلوب على يوتيوب

علشان تعرف بالتفصيل إزاي تبرمج العادات جوه مخك

ورمضاااان كريم

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
——————————
موقع نفضله لتحفيظ القرآن:
http://www.houseofquran.com/arabic.html

تطبيق أندرويد لتحفيظ القرآن:
https://play.google.com/store/apps/details?id=com.simppro.tahfiz&hl=ar

تطبيق أيفون لتحفيظ القرآن:
https://itunes.apple.com/sa/app/hfz-alqran-alkrym/id413488743?mt=8