study
سؤال مهم جدا جدا جدا: إزاي ما أنساش أي حاجة أذاكرها أبدا 
الإجابة بكل بساطة… التكرار التكرار التكرار… وخليني أوضح لك الموضوع بالتفصيل
إنت… أي حاجة مهما كانت هاتذاكرها… لازم هاتنسى التفاصيل الدقيقة بتاعتها بكل تأكيد
ممكن تكون فاكر اسم الموضوع, ونقطة أو نقطتين عنه … ولما تشوف المعلومات دي مرة تانية… هاتقول: أنا شوفت الكلام ده في حتة قبل كده
لكن مستحيل هاتفتكر تفاصيل الموضوع لما تذاكره مره واحدة … مهما كنت مذاكره كويس جدا 
الحل النهائي لمشكلة النسيان … هي التكرار 
وأنا عن نفسي, بحب أوي أضيف لموضوع التكرار ده… الكتابة… يعني أكتب… مع التكرار
لكن إنت مش لازم بالضروروة تستخدم سلاح الكتابة كل مرة كل مرة كل مرة
لكن اللي لازم تعمله… هو التكرار
وخليني أقولك تعمل إيه بالتفصيل
خد أي مادة مثال
عربي
تاريخ
كيمياء
رياضيات
فيزياء
لغة أجنبية
أي مادة أي مادة أي مادة
خد درس رقم واحد… وذاكره بضمير جدا… كتابة وتكرار للمعلومات اللي فيه
الموضوع ده ممكن ياخد منك ساعة مثلا علشان تذاكر الدرس ده… كتابه وتكرار
لما تذاكر درس أول مرة… ممكن ماتفهمش منه أي حاجة خالص
وممكن تستوعب منه نسبة بسيطة
وممكن تفهمه كله… 
كل ده مايفرقش
في كل الأحوال… لازم هاتنساه لو ما كرررتش مذاكرته في يوم ثاني 
تيجي بعدها ب يوم أو بكام يوم, حسب جدول مذاكرتك للمادة دي… وتذاكر نفس الدرس تاني بنفس الطريقة
بس تاني مرة… بدل ما هاياخد منك ساعة… ممكن ياخد منك ١٠ دقايق بس 
وهاتفهم كل اللي إنت ما فهمتوش من الدرس 
وهايبدأ يتحفر في ذاكرتك
وتذاكر بعدها بقى الدرس رقم ٢ من المادة دي… أو حسب جدول مذاكرتك للمادة دي 
… بس إستنى… ما تستعجلش أوي كده… الموضوع لسه ما إنتهاش
لازم كمان مرة تالتة
تيجي في اليوم اللي بعد كده اللي هاتذاكر فيها نفس المادة
وتذاكر درس رقم ١ مرة تانية… المرة دي هاياخد منك بدل ١٠ دقايق… ممكن ياخد منك ٥ دقايق بس
وتذاكر درس رقم ٢ مرة تانية… والمرة دي بدل ما هاياخد منك ساعة… ممكن ياخد منك ١٠ دقايق بس
والدرسين هايبدأوا يتحفروا في ذهنك كويس أوي
وبعد كده تذاكر الدرس رقم ٣… ممكن ياخد منك ساعة مثلا أو حاجة ( إنت وشطارتك وتركيزك بقى)… المهم… كتابة وتكراااار
وتفضل على الوضع ده لغاية آآآآخر السنة 
بحيث إنك تكون كررت مذاكرة كل الدروس بتاعتك كتير جدا 
وحولت كل درس بيتذاكر في ساعة… إنه يتراجع فقط في ٥ دقايق 
مش قادر أوصفلك هاتحب المذاكرة بجد بالطريقة دي إزاي
خصوصا إن بس لما توصل ل ثالث مرة تذاكر فيها نفس المادة (اللي هي ممكن تكون على طول بعد اسبوع مثلا من بداية الطريقة دي) 
هاتكون فهمت و إستوعبت و إمتصيت وشربت وحفظت أول درسين… وأكيد هايكون عليهم إعتماد كبير جدا إنهم يسهلوا فهم وإستيعاب وحفظ الدرس اللي بعد كده 
… وإوعى حد يخوفك من كلمة “حفظ” المناهج دي… دي مش شتيمة ولا حاجة 
إنت لازم تكون فاهم المناهج كويس جدا 
ولازم تكون مستوعبها كويس جدا 
ولازم كمان تكون “حافظ” المناهج… “حااااافظ””” وفاهم طبعا
الحفظ مع الفهم طبعا… هو شربك للمعلومات… وهو اللي هايخليك تعرف تستخدمها بعد كده
أنا عن نفسي, حافظ جدول الضرب جدا…. لدرجة إنك تسألني أي مسألة حسابية… مش برجع أقولك: على فكرة… أنا فاهم بس مش حافظ
علشان كده أنا لازم أعد على صوابع إيدي ورجلي علشى أعرف حاصل ضرب ٤ في ٤ يطلع كام
ولا عمرك هاتروح ل دكتور… مش حافظ و فاهم أسماء الأدوية اللي هايوصفها 
أو عمرك هاتشوف واحد مؤرخ كويس, مش حافظ وفاهم التواريخ كويس أوي 
نفس الطريقة بقى اللي أنا شرحتهالك دي, تشتغل مع المواد النظرية والمواد اللي فيها مسائل
حتى الرياضيات
تذاكر الدرس الأول… وتحل المسائل بتاعته بالكتابة والتكرار كل مرة 
حتى لو بتحل نفس المسائل التافهة بتاعة أول درس بنفس أرقامها 
التمرين ده هايخلي عقلك وجسمك يشربوا الطرق الرياضية في حل المسائل
وهايسهلوا عليك جدا مذاكرة وفهم وحفظ الدروس الرياضية المتقدمة بعد كده وطرق حلها 
نفس الحكاية برضه في دروس اللغات الأجنبية
تحفظ كلمات أول درس … ممكن الموضع ياخد منك ساعة حفظ كلمات مثلا (مثلا… الموضوع بيفرق حسب تقدمك)
وتعيد عليهم تاني مرة وإنت بتحفظ كلمات تاني درس… الموضوع هاياخد منك ١٠ دقايق مثلا
وبعدين تعيد على كلمات أول درس, وكلمات تاني درس … وإنت بتذاكر الكلمات الجديدة بتاعة تالت درس 
وبعدين تعيد على كلمات أول درس, وكلمات تاني درس, وكلمات تالت درس… وإنت بتذاكر الكلمات الجديدة بتاعة رابع درس
وتفضل ماشي كده
المفاجئة بقى: إن وقت المذاكرة بتاعك بعد كام مرة هايكون بدأ يكون أقصر بكتيييييير
والناس اللي بتشتكي إنها بطيييييئة جدا في المذاكرة…. بعد فترة هايكونوا بنوا طريقة تخليهم أسرع من أسرع واحد في المذاكرة
الموضوع بالظبط عامل زي اللي بيبدأ يتعلم الجري
آخره في السرعة إنه ممكن يجري بسرعة ٨كم في الساعة… ومش هايقدر يجري أكتر من دقيقتين وهايموووووت من التعب
نفس الحكاية في سرعة المذاكرة في الأول… وفي مدة المذاكرة في الأول
بالنسبة للي بيجري… لما بيستمر على التمرين… بيوصل بعد كده إنه يقدر يجري لمدة ٣ ساعات على سرعة ١٤ في الساعة… زي الناس العادية (مش المحترفين) اللي بيجروا ماراثونز
وبالنسبة للمحترفين بقى… بيقدروا يجروا على سرعة ٢٠ كم في الساعة لمدة ساعتين متواصلين 
نفس الحكاية بالنسبة للمذاكرة… وبالنسبة للناس اللي بتشتكي من بطئ المذاكرة
نفذ الخطوات اللي شرحتها في حلقة النهاردة …. وإنت سرعة مذاكرتك هاتتضاعف أضعاف كتيرة جدا بعد كل يوم مذاكرة
بالمرة بقى نجاوب على السؤال اللي بيجلنا على طول:
لسه فاضل وقت بسيط جدا على الإمتحانات… أنفذ الطريقة دي إزاي
بسيطة جدا… أدامك حل من إتنين
لو إنت شايف إن المدة كافية إنك تبدأ تذاكر المناهج من أول السنة… إبدأ ونفذ من دلوقتي حالا على الدروس بتاعتك من درس رقم ١ … لغاية لما توصل للدرس اللي إنت وقفت عنده بعد مثلا أسبوعين أو حاجة
و لو الوقت مش كفاية إنك تبدأ مذاكرة من أول السنة
على الأقل: إبدأ نفذ الطريقة دي على الدروس الجديدة درس بعد درس… ومع مذاكرة كل درس جديد في مادة… لاززززم تجيب معاه درس قديم
و لو الإمتحان بكرة إن شاء الله… يبقى إنت ممكن تطبق الطريقة دي لو كنت مذاكرة كويس أوي من أول السنة, لأن كل درس المفروض ياخد معاك مذاكرة دقايق معدودة
ولو إنت ليلة الإمتحان, وماذاكرتش من أول السنة, يبقى تروح تجيب سندوتش جبنة رومي, مع كوباية شاي فيها ٤ معالق سكر… وتقعد تعيط شوية وتقول
إهيء إهيء إهيء… ياريتني كنت ذاكرت من أول السنة 
سلااااام