فكرة هايلة
طريقة ذكية جدا للمذاكرة  

هتغير حياتك كطالب

أهلا بيكم فى الحلقة رقم ٢١ من أسلوب فى دقيقة اللى أبدا و لا يمكن تكون دقيقة بالضبط،

بمناسبة ان الامتحانات علي الابواب بيجيلنا أسئلة كتيرة جدا عن المذاكرة، و طرق المذاكرة الفعالة،

و إزاى نذاكر بتركيز وطريقة المذاكرة ليلة الامتحان .

الاسئلة بتجيلنا كالاتي:

-أنا عايز طريقة سحرية تخليني اجيب الدرجات النهائية

بس بشرط بشرط الطريقة دى ما يكونش فيها مذاكرة أبدا – طيب ازاي يا امور!!

– او أنا مش عايز اذاكر كتير، انا بزهق أنا مش بتاع مذاكرة ماليش خلق!!،

أنا يدوب بقعد و ما بكملش نص ساعة على بعض، أصل المنهج كبير و مذاكرتش من أول السنة

كده كده مش هالحق أذاكر المنهج كله طبعا.

أو- الامتحانات قربت خلاص و اللي ذاكر ذاكر و الكم كبير،

أول ما اطلع منهج مادة واحدة بس بيجيلى اكتئاب من كثر الكتب وورق المراجعة،

حاجه كده مالهاش نهاية مش قادر ابلع المناهج خلاص!!

ايه ايه ,أنت قلت ايه؟؟ سمعني كده تاني……. مش قادر أبلع؟ طيب تعلالى ايها التلميذ الغلبان.. عندى حل لمشكلتك ..طريقة فعلا سحرية (صوت سحر)، هخليك ترمى الكتب و الورق الكتييرر اللي مالوش لازمة…… أه بجد مش بهزر!

أولا هديك مثال علشان الموضوع يثبت و يوضح ليك و يتبلور فى دماغك الجميلة دي اللي مش راضية تخليك تذاكر :

لما الطفل الصغير مامته تحب تاكله الاكل اللى فيه فايده زى الجزر المهروس وو الكوسة و البطاطس و الحاجات دى اللى ملهاش طعم الطفل بيعمل ايه: بيطلعها من بؤه علي طول و ما بيرداش يبلعها،

طيب حل أى أم ذكية ايه؟   

أنها تخفى معالم الأكل ده فى حاجة تانية،

زى مثلا تعمل للطفل كيكة بالجزر، أو كوسة بالبشاميل و البطاطس مثلا،

و بدل ما الفراخ تديها لابنها مسلوقة و مالهاش طعم، تفرمها له و تخليها ناجتس مثلا، دى طرق ذكية بتلجأ ليها الام علشان ابنها يبلع الأكل الصحى و الأكل اللى ليه فايدة.

نفس الكلام بالنسبة للمذاكرة

احنا كطلبة ازاى نقدر نبلع المناهج اللى مش بتتبلع و لا بتنزل لينا من زور؟!!!،

نبلعها بسهولة لو غيرنا هيئتها و شكلها و شكل الورق والكتب اللى أدامنا،

اولا هاتجيب الكتب فى الاول و تفتح درس درس وتعمل ملخص حلو كده لكل درس بطريقتك انت و تختصر علي قد ما تقدر….

تكتب المختصر المفيد اللى يؤدي الغرض و المعنى، واللي المصحح يقبله منك ويديك الدرجة عليه……

كمان تعمل خريطة ذهنية بسيطة لكل درس فيها الافكار الرئيسية للدرس و العناوين المهمة  فقط اللي بيتضمنها الدرس من غير كلام كتيرر( زي الجايد كده ليك او المانيول, يعرفك الدرس بيحتوي علي ايه…….

الحلقة رقم ٢٢ من برنامج أسلوب في دقيقة, هاتكون كلها بالتفصيل عن الخرائط الذهنية

و زي ما الام بتحبس الاكل لابنها  بكوباية ميه…  إحبس انت كمان ب الكروت الذكية ( flash cards)

و دي بتبقي عبارة عن كروت بالشكل ده ( دينا تقطع الكروت دي و ترصها قدامها)

خلي لكل مادة لون معين علشان ما تتلخبطش..

اكتب علي الكروت الاسئلة اللي دايما بتنساها و بتغلط فيها….. و التعريفات المهمة……

و ممكن تخلي الموضوع ظريف و لذيذ و المذاكرة تكون وقت ممتع زي انك تلعب بالكروت دي كوتشينة مع حد عندك فى البيت (دينا تفنط الكروت و حد يبان فى الكدر انه بيسحب كارت)…..تختار الكارت و تسمعه لاختك او اخوك مثلا او حتي ابن الجيران……او تلعب حتي مع نفسك لعبة “عرفت وما عرفتش”

بس فيه شرط مهم جدا جدا !!

إن كل الحاجات دى انت اللى تعملها بنفسك ، لأنك و انت بتكتب و تلخص هاتحصل على الأقل ٢٠ % من المذاكرة حتي لو بس بينقل كتابة ومن غير تركيز ، و بعد كده المذاكرة فعلا هتكون سهلة و سريعة  جد اجدا و فعالة .

عايز اراجع علي درس معين؟؟ مافيش مشكلة خالص……

مش هارجع لكتاب و لا مرجع و لا اقعد اتوه بين الكتب و الورق الكتيرررر.

أنا هاطلع الملخص الملون المختصر الجميل اللي عملته بأيديا دول……عمايل ايدايا و حياة عنية و اذاكر منه و بس.

أرمى الكتب والورق الكتير اللى بتحتاس  و تتوه فيه ونكتئب قول ما تشوفه،

وذاكر بس من ملخصاتك أنت + و خريطتك الذهنية والكروت الذكية اللى هاتبدأ تعملها بنفسك دلوقتي ،

و حط ملخصات كل مادة فى فايل خاص بيها، هتوفر وقت كبير و المذاكرة هتكون سهلة و سريعة.
و هاتدمن الطريقة دى جدا جدا

و بطلب منك تعمل الطريقة دي من بداية السنة الدراسية الجديدة ان شاء الله…….صدقني حياتك كطالب هاتتغير.

عندنا فى أسلوب حلقات تانية عن المذاكرة الفعالة، أتفرج عليها أكيد هاتستفاد واكيد هاتطلع بكام معلومة تفيدك

-ملخص الحلقة :

أى حاجة فى الدنيا مش قادر تبلعها، غير الهيئة بتاعته علشان تقدر تبعلها: الأكل، المذاكرة، حتى الرياضة (الرقص رياضة – و نط الحبل رياضة برده)،  

اخر حاجة مهمة اوي جدا مش هزار:اعمل الخير لان الخير بيعود عليك بخير

لو عايزتنجح, ساعد زمايلك انهم ينجحوا و ماتوقفش الحلقة دي عندك و اعملها شير لكل زمايلك و اصحابك و قرايبك اللي عندهم امتحانات زيك و نفسهم حد يساعدهم علي المذاكرة  علشان يلحقوا يستفادوا معاك قبل الامتحانات،

و يا ريت تبعتوا فى كومنتس على فايسبوك صور للخرائط الذهنية اللي هاتعملوها مع كتابة السنة الدراسية اللى أنتم فيها …..زمايلك اللي فى نفس السنة الدراسية هايستفادوا بيها و بكده تكون كملت المهمة بعمل الخير اللي ان شاء الله يعود عليك بالخير و زي ما بتساعد الناس, ربنا هايسخر ليك اللي يساعدك.

سلام و ما تنسوش اللايك.

حلقات المذاكرة: ١- كسر الحاجز النفسي للمذاكرة:

https://www.youtube.com/watch?v=tuAOFYX8_fI

٢- مذكرات طالبة مثالية:

https://www.youtube.com/watch?v=pW52vutiifI

١- إزاي تحول وقت المذاكرة لوقت ممتع, ولعبة مسلية

https://www.youtube.com/watch?v=GK4OoBbisvs

٢- المذاكرة مع الأطفال

https://www.youtube.com/watch?v=DbKtBBkA3kY

٣- قصة هروب الطلاب من المذاكرة للنوم

https://www.youtube.com/watch?v=2n3pdmXddbY

٤- سؤال: الإمتحانات كمان كام يوم, أعمل إيه – الجزء الأول من السؤال

https://www.youtube.com/watch?v=4rFGIEFw3m4

٥- تنظيم وإدارة الوقت – من أهم الأسباب للنجاح

https://www.youtube.com/watch?v=9l4wFli_8Q4

٦- إستمتع بألم المذاكرة والإجتهاد

https://www.youtube.com/watch?v=l-lnrWmSuNg

٧- صرخة نجاح – غير حياتك

https://www.youtube.com/watch?v=_fVpUaGap0c

٨- أنا بذاكر على سطر, وأسيب سطر, أعمل إيه؟

https://www.youtube.com/watch?v=zjEsZ1KEOA0

طريقة ذكية جدا للمذاكرة هتغير حياتك كا طالب ! أسلوب في دقيقة

21 Smart Study tips osloop in a minute