علاج إدمان مشاهدة حاجات مش كويسة و علاج إدمان الموبايل و يوتيوب! علاج فوري وفعال! أسلوب في دقيقة ٣٧

 

أهلا بيكم في الحلقة رقم ٣٧ من برنامج أسلوب في دقيقة

اللي بنجاوب فيه على الأسئلة في وقت أقل بكتييير أوي من دقيقة … واللي عمرها ما بتكون دقيقة عادية أبدا

هات معاك ورقة وقلم… علشان هاتبدأ تكتب معايا من أول النصف الثاني من الحلقة!

سؤال النهاردة وصلنا في تعليق على حلقة الأسبوع اللي فات من برنامج أسلوب في دقيقة … اللي عمرها ما بتكون دقيقة أبدا

و التعليق ده أخد أكتر عدد لايكس… علشان كده كان له الأولوية في الإجابة

السؤال من فاطمة حسن:

التليفون مش عارفه اسيبه من ايدي يا اسلوووب عاااا 🙋😂

و أعتقد بحدسي العبقري… إن السؤال ده مجرد كناية عن تضييع الوقت بسبب الموبايل… لأن أعتقد إن الواحد ممكن بسهولة يسيب الموبايل من إيده (لو مسك مثلا ساندوتش بإيد …وكوباية شاي بإيد تانية)… ده لواحده كفيل بإنه يخليك تسيب الموبايل من إيدك

بس سيبك سيبك… دي مجرد حلول سهلة… تعالى بقى للكلام الجد… بس طبعا تضغط زرار اللايك الجميل الغلبان ده و تخليه ينور أزرق في أيدك… آه صحيح… دا إنت منور يااااراجل

كل واحد فينا, عنده عادة سيئة محدد عاوز يبطلها بطريقة عملية من الآخر … في خطوة واحدة مش في ٦ خطوات ولا حاجة

مثلا فاطمة: عاوزة تبطل تضييع وقت على الموبايل

كل واحد فينا, عنده حاجة تانية عاوز يبطلها

اللي نفسه يخرج من إدمان يوتيوب وتضييع وقت على يوتيوب

واللي نفسه يخرج من إدمان باقي السوشيال ميديا (فايسبوك, انستاجرام وغيرهم كتيييييير)

واللي بيتفرج على حاجة مش كويسة خالص على الإنترنت ونفسه يبطل القرف ده

و اللي بيدخن و بيحلم إنه يكون زي الناس الطبيعية اللي مش بتحقن نفسها سرطان يوميا

و حتى اللي بيعمل حاجة معينة وحشة جدا يوميا… ونفسه يبطلها …. مهما كانت الحاجة دي

المخ البشري دايما دايما دايما بيحاول على أد ما يقدر يريحه

بيحاول إنه يخليه يدمن حاجة عبيطة, مش محتاجة أي مجهود ذهني أو أي مجهود خالص

و كل ما الواحد بيكسل شوية…. بيبقى أسهل إنه يكسل أكتر

يعني… الكسل … خميرة الكسل

طبعا أنا أول مرة سمعت الجملة دي “الكسل خميرة الكسل” … ما كنتش فاهم معناها خالص… كنت فاكرها زي “صميدة حميد صميدة” كده …. لكن دي طلعت حاجة بجد

كل ما تقعد أوي و تبدأ تكسل… كل ما الكسل هايجي أكتر

كل ما تقعد تتفرج على فديوهات يوتيوب … كل ما هاتبقى عاوز تقعد أكتر و أكتر

كل ما هاتتفرج على حاجات مش كويسة على الانترنت … كل ما هاتبقى عاوز تتفرج على حاجات مش كويسة أكتر و أكتر

الحل بقى بسيط … و كنا قلناه في حلقة رقم ٢ من برنامج أسلوب في دقيقة …. لكن مش بالتفصيل الممل ده

هات بقى ورقة وقلم … وإكتب معايا الكلام اللي من الآخر ده

الطرق دي أنا جربتها على نفسي كتيييير أوي قبل كده

وجربتها على ناس كتييييرة جدا جدا جدا كانت مدمنة فايسبوك و مدمنة حاجات تانية كتيرة وحشة أوي … وكلهم بطلوها بال ٣ خطوات اللي أبسط من البساطة دول

أولا:

لازم لازم لازم تحدد بالظبط و تعترف لنفسك بالحاجة الغلط اللي عاوز تبطلها

زي فاطمة كده…. حددت الحاجة اللي عاوزة تبطلها… إنها عاوزة تسيب الموبايل من إيديها … أكيد علشان ماتضييعش وقت

إكتب بقى وحدد … إيه اللي إنت عاوز تبطله….. من باب الفضول البشري… ياترى إيه اللي إنت عاوز تبطله!!

ثانيا:

قنن وقت محدد للحاجة دي تعلمها فيها لو هي حاجة مش غلط أو حرام

يعني لو الحاجة اللي إنت عاوز تبطلها دي: موبايل… إستخدام سوشيال ميديا … مشاهدة برامج ترفيهية مفيش فيها حاجة غلط أو حرام… يبقى تحدد لها وقت محدد بالساعة في اليوم

مثلا… من الساعة ٧ ل ٩ مساءا مثلا …. مسموح ليا أمسك الموبايل و أعمل بيه اللي أنا عاوزة

و طبعا لو الحاجة اللي أنا عاوز أبطلها دي حاجة غلط أو حرام… زي لو واحد بيتفرج على حاجت مش كويسة على الانترنت … أو بيعمل أي حاجة غلط أو حرام… يبقى أكيد أكيد أكيد مفيش مواعيد تقنين خالص

الحاجة دي توقفها فورا… ماتخافش خااااالص لو رجعت تاني… الحل في الخطوة التالتة دي بقى… و هي الكلام المفيد كله… وهي الحلقة كلها:

ثالثا: حقنة التركيز الفورية!

إنت لما تعمل مواعيد تقنين للحاجة اللي عاوز تبطلها دي (أو حتى لو عاوز تبطلها خالص)…. أكييييييييد أكيد أكيد مخك مش هايسيبك كده … هايبقى عاوزك تهرب من الشغل اللي وراك, وهايخليك تبقى عاوز تعمل الحاجة دي طول الوقت…

مش علشان إنت محتاج تعملها… لكن… علشان يخليك ماتعملش أي مجهود ذهني خالص

الحل بكل بساطة, هو إنك كل ما ترجع تعمل الحاجة الغلط دي – تدي لنفسك حقنة تركيز فورية

و هاقولك على شوية حقن تركيز فورية أنا جربتها في حياتي و نجحت:

أولا: كنت عاوز أبطل فايسبوك خالص من حوالي ٥ سنين كده … وجربت الخطوات دي… وحطيت لنفسي حقنة تركيز فوري إن كل مرة أفتح فيها فايسبوك: أقوم أتوضى وأصلي ركعتين فورا

والله العظيم أنا فعلا فتحت الفايسبوك بعدها مرة واحدة … و قومت صليت ركعتين … وكانت آخر مرة في حياتي أفتح الفايسبوك ده بدون وعي مني أبدا

و حتى لما كنت بحتاج إني أفتحه بعدها علشان حاجة في الشغل أو حاجة مهمة… كنت برضه أقوم و أصلي ركعتين بعدها …. مفيش مشكلة

طبعا علشان ماتفتكرش إن الصلاة عقاب أو حاجة … بس لو تعرف إنك لما “تتبع السيئة الحسنة تمحها” … يعني لما تعمل حاجة غلط… تعمل عبادة صح بعدها … تمحها

وهي فعلا محت الفايسبوك من حياتي… لدرجة إني مسحت الأكاونت بتاعي على فايسبوك من أكتر من سنة كاملة من كتر ما أنا بقيت مش بستخدمه أبدا

حقنة تركيز تانية إستخدمتها و أنا كنت عاوز أبطل ألعب ب ريويبك كيوب … هي إني كل ما ألعب بيه في قت الشغل: أروح أدفع ٢٠ جنيه أون لاين (فورا يعني) ل مستشفى سرطان الأطفال ٥٧٣٥٧

دي بقى دفعت فيها بتاع ٣ مرات … وبعدين بطلتها تقريبا خالص

حقنة تركيز تالتة إستخدمتها قريب أوي … ونفعت جامد جدا

و هي إني لما أكل آكل مش صحي أو أخرج عن نظام الأكل الصح اللي أنا عامله

أنزل من البيت بتاعي في الدور ١١ على السلم … وأطلع ١١ دور على السلم فورا بعد لما آكل الأكل ده

فا قبل ما آكل الأكل ده… بقيت أقول لنفسي: هاتتنزل ١١ دور و تطلع ١١ دور؟؟؟ موافق

على فكرة…. ساعات كتيرة كنت بوافق وأقول… أيوة هانزل ١١ دور على السلم وأطلع ١١ دور على السلم بس آكل اللي أنا عاوزه

الفكرة… إن حقنة التركيز دي مش معمولة عقاب, هي بس بتشيل موضوع الأوتو-بيلوت … أو الطيار الآلي اللي في مخك اللي بيخليك تعمل حاجة إنت مش عاوزها أوتوماتيك من غير تفكير منك

حقنة التركيز دي هاتخلي مخك يكون في وعيه وهو بياخد قررا إنك تكمل لعب على الموبايل… وهايشيل من دماغك: طيب هاتفرج على فيديو واحد كمان بس وبعدين أروح أذاكر أو أروح أعمل الشغل اللي ورايا

لأن ساعتها… هايبقى تضييع الوقت تمنه إنك تقوم و تنزل وتطلع على السلم ١١ دور مثلا لو إنت زيي… أو هايكون تمن إني أفتح يوتيوب برة الساعات المحددة ليا هي إني أدفع ٢٠ جنيه … أو إني أقوم و أتوضى وأصلي

كل حقن التركيز دي حاجات كويسة جدا… وإنت كده أو كده بتعملها في حياتك العادية… بس الفكرة إنك بتجيب الوعي لمخك قبل ما يعمل حاجة تانية بمزاجه

الطرق دي أنا بجد جربتها مع نفسي و مع ناس كتييييرة جدا جدا جدا

و بتجيب نتايج فورية و لحظية

بالنسبة ل حقنة التركيز, لازم تكون حاجة قابلة للعمل

يعني صلاة ركعتين, تدفع ٥ جنيه أو ١٠ جنيه أو ٢٠ جنيه … تطلع وتنزل على السلم… تلعب ٥٠ ضغط أو ٥٠ بطن أو اي حاجة سهلة إنها تتعمل فورا

يعني ما تخترش حاجة مش هاينفع تعملها بسهولة: زي مثلا أنا لو فتحت فايسبوك, يبقى هالعب ضغط ٢٠٠٠ مرة مثلا… لازم تكون حاجة واقعية بين السهلة أوي وبين المعقولة

لأنك أكييييد هاتحتاج تكسر القاعدة اللي إنت حاططها لنفسك لسبب مهم… زي مثلا إنك هاتفتح فايسبوك تجيب حاجة مهمة لها علاق بشغلك

ساعاتها برضه, لازم بعدها تعمل حقنة التركيز دي.

لازم تجرب فورا وتقولنا… وياريت تقولنا إيه حقنة التركيز اللي الفورية اللي هاتستخدمها إبتداء من دلوقتي حالا علشان تبطل حاجة نفسك تبطلها

وإحنا هانرد عليك ونقولك الكلام ده واقعي ولا لأه

قولنا بقى في كومنت… سؤالك للحلقات اللي جاية من أسلوب في دقيقة … وإعمل,  لايك على أكتر سؤال عجبك من أسئلة الناس علشان يكون له الأولوية في الرد

سلاااااام