غير حياتك – أسلوب في دقيقة – الحلقة الثامنة – إيه خطوات تعلم وإتقان لغة أجنبية؟
أهلا بيكم في الحلقة رقم ٨ من برنامج أسلوب في دقيقة
سؤال وصلنا كتير جدا
أنا عندي عقدة في إني أتعلم لغة أجنبية… سواء علشان الدراسة أو علشان فرصي في الشغل تتحسن… أعمل إيه؟
إحنا هانتكلم عن اللغات كلها عموما… بس بالخصوص الإنجليزي… لأنه هو لغة التواصل المتفق عليها حاليا في جميع أنحاء العالم:
في فرق جوهري بين إنك تتعلم لغة أجنبية لمجرد الإمتحانات… وإنك تتعلم لغة أجنبية… علشان تحسن من كل حاجة في حياتك:
إحنا مهتمين بإنك تتعلم لغة أجنبية بجد… مش لمجرد الإمتحانات… حتى لو إنت طالب… الموضوع هايخلي الدراسة أسهل بكتييير
بس من الحاجات البديهية اللي هاتحسن حياتك لما تتعلم لغة أجنبية هي إنك
-هاتقدر تتفرج على فيديوهات تعليمية بالإنجليزي
– هاتحسن فرصك في الشغل والوظيفة
– تقدر تسافر لأي بلد في العالم… لأن اللغة المشتركة في العالم دلوقتي هي الإنجليزية
تعلم لغة أجنبية… من الحاجات اللي لازم تتعمل على مدى طوييييل… مفيش حاجة إسمها تحفظ كلمات كام يوم وتعيش حياتك بيهم
لازم ممارسة يومية طول العمر…
الخطوة الأولى: أبسط حل ممكن تبدأ بيه… هو إنك تروح معهد موثوق فيه ل تعليم لغة أجنبية
وتحدد مستواك… وتخليهم يحطولك خطة تمشي عليها…
بالرغم من إن الحل ده مكلف… بس ده فعلا من أهم الإستثمارات اللي لازم تستثمرها في نفسك …
وإنت ممكن تخلي الإستثمار ده ينجح بإنك تجتهد في إنك تتعلم بجد… مش يبقى الحضور المشرف وخلاص
الخطوة الثانية: في قنوات كتييييرة جدا على يوتيوب بتعلم لغات كتيرة جدا
إشترك بقناة واحدة تكون مشهورة… وإلتزم بإنك تشوف فيديو يومي … وتعود ودنك على سماع اللغة كتير
الخطوة الثالثة: لازم لازم لازم تحدد وقت يومي تمارس فيه اللغة…. الحلقات اللي هاتشوفها على يوتيوب… حاول تكتب الكلام اللي فيها ويكون عندك كراسة تكتب فيها كل الحلقات اللي بتشوفها
الخطوة الرابعة: إحفظ جمل كاملة على بعضها… إكتب جمل كاملة في كراسة مخصوص وإحفظ الجمل على بعضها… مش كلمة كلمة
إكتبلنا في كومنت دلوقتي… إيه طريقتك المفضلة في تعلم لغة أجنبية… وإيه أسئلتك لحقاتنا اللي جاية
وساعدنا في نشر الحلقة دي… لأنك ممكن تشجع ناس كتير في إنها تاخد خطوات إيجابية في حياته
الحلقة صوت على ساوند كلاود:
13 Responses to “غير حياتك – أسلوب في دقيقة – الحلقة الثامنة – إيه خطوات تعلم وإتقان لغة أجنبية؟”
طيب بالنسبة لواحد مثلا مسافر ع شهر 9 يكمل دراسته و مش عندة الإمكانيات انه يروح مركز تعلم لغه و في نفس الوقت عندة ع شهر 8 امتحان توفل و في البلد الي هيروحها حياته كلها انجلش من تعليم من أهل البلد و السفر دى منحه كامله بس مهم اللغه جدا
انا كتيررر هادية وشخصيتي ضعيفة ومعروفة في المدرسة بالبنت الهادية وعايزة تكون ليا شخصية قوية وسيطرة على الناس الحوليا
طيب ما تعملو انتو حلقات لتعليم اللغه الانجليزية .. حتى ولو حلقه كل اسبوع .. ع فكرة ده هيساعد ناس كتيير .. ولو مش هينفع تعملو حلقات قولو لينا ع قناة يوتيوب تكون حلوة ومعرفة وموثوق فيها :)
إحنا نتمنى نعمل حلقات
لكن… في ناس كتيرة جدا جدا جدا عاملة مجهود كبير جدا في حلقات كتيرة موجودة دلوقتي, وهاتكون أكيد أفضل من حلقاتنا
وكمان… إحنا لو عملنا فيديوهات إنجليزي… هانضطر نوقف فيديوهات برامج أسلوب … فريق العمل بيشتغل ليل ونهار جميع أيام الأسبوع علشان يقدر يطلع حلقات أسلوب 🙂
طيب ما تعملو انتو حلقات لتعليم اللغه الانجليزية .. حتى ولو حلقه كل اسبوع .. ع فكرة ده هيساعد ناس كتيير .. ولو مش هينفع تعملو حلقات قولو لينا ع قناة يوتيوب تكون حلوة ومعروفة وموثوق فيها :)
اي الحل لمشكلة املاء اللغة العربية للكبار والرياضيات وشكرا يا احلا اسلوب
ممكن في العاب math
نفسي فعلا اتعلمها..بس مش عارفه أرتب وقتى ممكن التزم كام يوم وبعدين ما ا عرفش ابتدى تانى.او أكسل..والله ما عارف.بس نفسي😊
طيب ايه افضل طريقه لحفظ الكلمات الانجليزي بسرعه وحفظ تااام منوغير نسياان☺☺
ليس هناك حفظ من غير نسيان وإنما هناك ممارسة وتكرار
فيه برنامج على الاب ستور اسمه mondly فيه اغلب اللغات
يعرض الكلمة بنطقها وبعدين يحطها بجملة وفيه تمارين عليها مرا مفيد 👍
نقطة جوهرية في تعلم اللغات تعتبر السر في ادراك اللغات .. وهي التفكير والكلام النفسي بتلك اللغة فلو اردت ان تتعلم الانكلزية بسرعة وبكفاءة عود نفس التفكير واللام مع النفس باللغة الانكليزية وهذا سيوفر لك نص الوقت ويسرع تغليمك لان المفردات حتكون حاضرة في ذهنك وتستعملها دائما.. شكرا لكم يامبدعين!
ياريت تعرفونا علي قناة معينة موثوق منها علشان نقدر نستفيد وفي وقت اسرع