سطر وسطر

أهلا بيكم في الحلقة الرابعة من برنامج أفكار أسلوب …

 وحلقة بعنوان: سطر وسطر

و ٦ خطوات بسيطة لبرمجة العادات الإيجابية في مخنا

إحنا موقفين برنامج أفكار أسلوب بقالنا ١٠ أسابيع كاملين… وقولنا مش هانرجع بيه أبدا أبدا مهما حصل… إلا لما تسألوا علينا

وبما إن مفيش حد عبرنا أبدا أو حتى سأل عن البرنامج… قررنا نرجع تاني… طالما شعبيتنا طلعت كبييييرة أوي كده

حلقة النهاردة بتتكلم علينا كلنا… كل واحد فينا بيبدأ حاجة… وبيمشي عليها سطر,,, وبيسيب سطر

أنا بذاكر على سطر… وبسيب سطر

 أنا ببدأ نظام ريچيم وبمشي على سطر وبسيب سطر

 أنا بدأت أروح الچيم … ورحت مرتين… ووقفت

أنا بصلي على سطر… وأسيب سطر

أنا ببطل تدخين يوم… وأرجع تاني

حتى واحد زي حلاتي… من أكبر مشاكلي إني أنتظم في غسيل أسناني… بغسل سناني يوم… و٣ أيام لأه…

سطر وسطر أنا حياتي بقت مسطرة…

أنا بقيت إنسان سطر وسطر… أعمل إيه؟

———————————

أي واحد فينا حياته فيها سطر وسطر… بيكون ليها مميزات كبيرة… وطبعا عيوب كبيرة

تعالوا نشوف مميزات وعيوب إنك تكون إنسان مسطر

ميزة إنك تكون إنسان بتمشي على حاجة في سطر وتسيب سطر:

– إن إنت أحسن مليون مرة من الشخص اللي مش مسطر خالص و اللي مش بيحاول يحسن من نفسه أصلا… سطر وسطر أكيد أحسن من إنك تكون: …أبيض يا ورد

– الإنسان اللي بيمشي على سطر وبيسيب سطر… هو اللي بيتحول بعد كده لإنسان ملتزم على حاجات صح في يوم من الأيام

يعني… بيبقى ناقص زقة واحدة بس, وتتحول إنك تبقى أحسن نسخة ممكنة من نفسك… ماتخفش… الزقة دي عندنا إحنا وجايين نديهالك

عيب بقى إنك تكون بتمشي على سطر وتسيب سطر:

– إن الإنسان اللي بيمشي على حاجة شوية ويوقفها… بتكون حياته فعلا غير سعيدة وغير متزنة

الناس اللي بتمشي على سطر وتسيب سطر…

بتبقى مضغوطة نفسيا

ومش سعيدة في حياتها

وبيفضل قوتين كباااار جدا تشد الواحد من الناحيتين…

قوة بتأنبه طول الوقت إنه مش بيصلح ويحسن من نفسه …

وقوة تانية بتحاول تخليه يبطل محاولة إنه يحسن من نفسه… علشان يتخلص من الضغط العصبي والنفسي اللي عليه

لو إنت بتعمل أي حاجة على سطر وبتسيب سطر

نفسيتك هاتبقى مش متزنة نفسها تعمل الحاجة الصح…

وهي عارفة إنها الصح بس فيه قوة تانية بتشد الناحية التانية ….

قوة بتقولك… خلينا نبدأ بكرة…

النهاردة إنت عندك صداع وتعبان… 

إنت لازم تبدأ من أول اليوم… أو أول الأسبوع… أو أول الشهر… أو أول السنة … أو لما تكبر… أو لما تجوز… أو لما ترجع من الحج – لبيك اللهم لبيك… أو لما مصر تدخل كاس العالم (شكر خاص طبعا لكابتن مجدي عبد الغني على ضربة الجزاء اللي مضيعهاش)

وهاتفضل القوة دي وراك بتهبط فيك طول الوقت… ومش هاتسيبك غير لما تخليك تبطل محاولة…

أو إنك تنتصر على القوة السلبية دي نهائي وتنجح

بس طول ما إنت لسه على سطر وبتسيب سطر…

حياتك مستحيل هاتكون سعيدة

إحنا جايين النهاردة, وعندنا ٦ خطوات بسيطة محددة, تخليك تبطل تكون سطر وسطر في أي حاجة

بس إحنا محتاجين نضيع وقتك الأول بشوية أمثلة مملة… وبعدين نقولك خطوات الحل البسيطة…. في آخر نص ساعة من الحلقة

كل إنسان فينا … بيكون فيه منه نسختين… نسخة ممكن تكون ناجحة… ونسخة ممكن تكون إمممم… بطيخة أو راس كرومبة… وإن إحنا نكون النسخة دي أو دي… بيكون بإختيارنا

يعني لو إنت أو إنتي عاوزين تلعبوا رياضة و تنتظموا على نظام غذائي وتخسوا 

وكل شوية…

تبدأوا وتوقفوا … وتوقفوا وتبدأو…

هاتيجوا في يوم من الأيام 

يا إما هاتوقفوا خالص

يا إما هاتغيروا حياتكم كلها و هاتبنوا عادة إنكوا ماتوقفوش رياضة ونجاح طول العمر

في نسخة منك… عندها مشكلة زيادة الوزن…

والنسخة دي بتكون عبارة عن مشروع إنسان حقيقي غير سعيد وهبطان طول الوقت وعنده أمراض بسبب عدم اللياقة والسمنة…

والنسخة دي بتحاول تخليك ماتتعبش نفسك في أي رياضة أو نظام غذائي…

وبتبوظلك أي محاولة نجاح

ونسخة تانية منك… عندها عضلات في بطنها ورشيقة وجسمها مشدود…

ومشروع إنسان سعيد متناسق الجسم… نشيط طوال الوقت,

ووفر على نفسه إنه يشيل وزن وهم مش محتاجه…

والنسخة دي… إنت اللي لازم تتخيلها طول الوقت وترسمها أدام عينك…

وتموت نفسك علشان توصلها

قيس على كده, كل حاجة تانية في حياتنا…

هايكون في نسخة مننا مشروع إنسان فاشل… بتشدنا ناحيتها

ونسخة تانية… مشروع إنسان ناجح… إحنا اللي المفروض نموت نفسنا إن إحنا نوصلها

المهم… نعلم نفسنا ونهذب نفسنا إن إحنا نلتزم بالطريق اللي يوصلنا للنسخة الناجحة اللي فينا

كل واحد مننا في شغله, ممكن ببساطة يكون نسخة إنسان:

١- خايبة في شغلها

٢- غير أمينة على وقتها ووقت الشغل

٣- مش بتطور من نفسها بنفسها أبدا

٤- إحتراف في إلقاء اللوم على الآخرين… وإزاي هما مش بيعرفوا يستفادوا من إمكانياته الجبارة

ونسخة تانية, مننا …

ممكن تكون:

١- ناجحة بجد

٢- أمينة على وقتها ووقت العمل

٣- مش بتوقف تطوير من نفسها أبدا

٤- إحتراف في إنها تشتغل مع فريق عمل كامل, وتعرف وتعلم فريق عملها إن نجاحهم كلهم مشترك

للأسف… دايما النسخة الفاشلة مننا هي اللي بتحاول تشدنا ناحيتها…

لأن الفشل مش محتاج أي مجهود خالص… و زي ما إنتوا عارفين من حلقة “صرخة رقم ١ من اُسلوب” ان الفشل ببلاش…

وطريقه مريييييح جدا… بس لمدة قصيرة,,, وكوارثة حتمية….  

ودايما إحنا اللي لازم نموت نفسنا إن إحنا نوصل للنسخة الأفضل في حياتنا

لو إنت طالب أو بتدرس

أو بتذاكر حتى لنفسك بعد ما خلصت تعليم

في نسخة منك: شاطرة وبتجيب أعلى الدرجات…

وبتبنى وبتأسس إنسان ناجح هايفضل طول عمره ناجح وهايبنى نجاحه بإيده…

مش هايستنى وظيفة من حد,

أو حد يحن عليه بالنجاح

ونسخة تانية: مقضية حياتها جيمز وشات وفايس زفت على الموبايل,

وتضييع وقت وحياة في الحاجات التافهة…

وبعدين تعيش أوقات سودة أيام الإمتحانات…

وأوقات أسود بعد النتيجة

ولما بتخلص تعليم… بتبقى محترفة كلام عن إن التعليم فاشل والبلد فاشلة…

وأد إيه هو لو كان في بلد متقدمة… وبتقدر مواهبه في الكسل وتضييع الوقت…

كان زمانه بقى د. أحمد زويل أو د.مجدي يعقوب أو كابتن محمد محمد محمد أبو تريكة

طبعا معظمنا عارف كويس اوي ان …

الناس الناجحة دي ,إتعلمت نفس تعليمنا لغاية لما إتخرجوا من الجامعة

وشقوا طريق نجاحهم في الحياة بعد كده بالطريقة اللي خليتهم من أنجح الناس في العالم

و لو بتعمل نفس تضييع الوقت ده في أي بلد في العالم…

هاينتهي بك المطاف بإنك هاتكون ضمن الناس الفاشلة في البلد دي… مهما كانت البلد متقدمة

طبعا إحنا مش بننكر أهمية البلد الناجحة في بناء نجاح أبنائها … وإن إحنا بلادنا في حالة من ال…  مانتوا عارفين… بس إحنا بنوعدكوا… إن النجاح عندنا بسيط والله… بتغيير من نفسنا إحنا …

وإحنا كده ولا كده فيزة أوروبا مش محطوطة على الجزامة برة… 

فا طالما إحنا كده ولا كده هنا… يالا ننجح

النجاح بدرجة كبييييرة جدا معتمد عليك إنت بس… وبإختياراتك

لو إنت بتدخن…

هايكون في نسخة منك… أخدت قرار بإنها توقف حرق في صحتها وفلوسها

وعايشة حياتها بفرص أكتر إنها تقوم وتتحرك وتعيش حياه فيها هواء نقي

ونسخة أخرى … (لهجة خليجي) تروي بذرة الأمراض والسرطان في صدرها بأموالها وربنا يعافينا كلنا من تلك الأمراض

لو إنت بتصلي على سطر وبتسيب سطر

في نسخة منك… هاتفضل تشدك ناحيتها وتحاول تخليك توقف صلاة خالص

ونسخة تانية… مش بتفكر أصلا وقت الصلاة

متبرمجة إنها تقوم وتصلي بدون تفكير أول لما تسمع الآذان

وهي دي النقطة اللي عاوزين نوصلها من آآآآآآول الحلقة… ….

هي دي نقطة النجاح في الحياة…

إنك تكون متبرمج على عمل الحاجات الصح…

وماتحتاجش ولا تفكير ولا مجهود أبدا في إنك تختار الإختيارات الصح

الناس الناجحة في حياتها واللي بتلعب رياضة وتذاكر وتعمل كل حاجة صح…

ما بتعيششي (لا تعيش) حياتها تجبر نفسها إنها تعمل الحاجات الصح كل يوم…

لأن مفيش حد يقدر يجبر نفسه على حياة كلها إجبار نفس كده

بس الناس الناجحة بيكونوا خلاااص… متبرمجين على عمل الإختيارات الصح في حياتهم…

وطبعا حياتهم بتزيد إنتاجية وإيجابية ونجاح يوم بعد يوم… وأهم من كده… بيناموا كل يوم وضميرهم مرتاح إنهم عملوا كل اللي وراهم وعاشوا يوم صح

ومن غير مجهود ولا غصب على نفسهم ولا حاجة

نفس الحكاية للناس اللي مش ناجحة في حياتها… وبتختار إختيارات غلط…

زي إنهم يهربوا من وقت المذاكرة أو وقت العمل أو إنهم مايكلوش أكل صحي أو يتهربوا من لعب الرياضة…

هما كمان مش بيفكروا قبل ما ييضيعوا وقتهم ومجهودهم…

هما كمان متبرمجين إنهم يعملوا كده

يعني الناس بتوع النجاح متبرمجين على النجاح… والناس بتوع الفشل… متبرمجين على الفشل

والناس بتوع سطر وسطر ياعيني… لا إلا هاؤلاء ولا إلا هاؤلاء….

ودلوقتي حالا جه دورهم…

إنهم ياخدو السر القاتل

بإختصار شديد… إنت محتاج تختار الحاجة اللي إنت عاوز تبطل تكون سطر وسطر فيها… 

وتحولها إلى عادة متبرمجة في مخك وبتعملها بدون تفكير…

سامعك وإنت بتقول… يااااا لهوي… إنت بقالك ساعتين بتهري في الكلام اللي فات ده… علشان تقولنا… إنت عاوز تبني عادة وتبرمجها في دماغك

إرتباط شرطي يعني… ماتقول ياعم من الصبح يا عم… ياخسارة الباقة… صدعتنا

إممم… ماشي يا كبير… يالا بينا

مشكلة سطر وسطر دي جزئين.. وبتتحل في ٦ خطوات

الجزء الأول: إنت محتاج تبرمج عادات نجاح جديدة جوة مخك …. بحيث تعمل حاجات صح بدون تفكير وبدون مجهود

الجزء الثاني: إنك تكسر وتهد برمجة عادات سيئة جوة مخك… بحيث تبطل تعملها… برضه من غير تفكير أو مجهود

ورقة وقلم… وإكتب معايا… هانكتب الخطوات… وبعدين نطبقها على أمثلة كتييييير جدا… علشان التكرار… بيعلم الأشرار… الشطار

ورقة وقلم حضرتك… ورقة وقلم… آيوة… ورقة وقلم…. وشخبط ورايا

خطوات برمجة عادة إيجابية جوة مخنا:

١- يكون في دافع قوي وحافز لبناء وبرمجة العادة دي في دماغنا

٢- يكون في مكافئة شبه فورية في المدى البسيط

٣- يكون في حافز و مكافئة كبيرة في المدى البعيد

٤- بناء إرتباط شرطي, يخليني أعمل العادة اللي أنا عاوز أبنيها وأبرمجها جوة مخي بدون تفكير

٥- أعرف وأعي كويس أوي الضرر و العواقب المترتبة على عدم بناء وبرمجة العادة دي في مخنا

٦- ماسيبش نفسي لواحدي… لازم تشجيع مستمر سواء من أصدقاء وأهل حقيقين, أو مواقع مفيدة زي أسلوب دوت كوم وغيرها

يبق الحل هو.. برمجة العادات جوه مخنا… والخطوات هي ال ٦ خطوات دول

تعالو بقى نطبقهم مع بعض على العادات اللي لازم نبنيها

بس محتاجين بس نعرف معنى إرتباط شرطي الأول

يعني إيه إرتباط شرطي… يخليني أعمل الحاجة اللي أنا عاوز أبرمجها إنها تبقى عادة؟

مثال: لو عودت نفسك أيام كتيرة ورا بعض, إنك بعد لما تدخل البيت، تحط المفاتيح في مكان معين او تعمل حاجة معينة

مخك هايخليك تعمل الحاجة دي بدون تفكير منك بعد تكرار كتير… أول لما تدخل البيت كل يوم … ويبقى ده اسمه ارتباط شرطي… … كل ما تدخل البيت… هاتحط المفاتيح في نفس المكان

الإرتباط الشرطي: ان لما حاجة تحصل، تخليك تعمل حاجة تانية أو تشعر شعور مخصوص اول لما الحاجة الاساسية تحصل… ماتخفش ماتخافش، هاتبان في الأمثلة

تعالو بقى نطبق ال ٦ خطوات بتوع بناء العادات دي على الحاجات اللي انا فيها سطر وسطر… 

لو أنا طالب ومن مصحلتي إني أذاكر

١- يكون عندك دافع قوي للمذاكرة… مش مجرد نجاح بمقبول أو ضعيف… لازم تكتب إيه الدافع عندك من النجاح ده

٢- يكون في مكافئة شبه فورية… يا إما تعطي لنفسك مكافئة من أي نوع كل ما تذاكر… أو أفضل من كده, إنك تخلي وقت المذاكرة وقت ممتع وطريقة حياة (إرجع للحلقة الأولى من برنامج أفكار أسلوب على قناة أسلوب على يوتيوب, علشان تعرف إزاي تحول المذاكرة لوقت ممتع وطريقة حياة)

٣- يكون في مكافئة كبيرة في المدى البعيد… طبعا إنك تنجح وتجيب تقدير عالي… وخلي دايما المكافئة الأكبر اللي في ذهنك… إنك تتعلم بجد… مش مجرد درجات

٤- بناء إرتباط شرطي يخليك تبدأ مذاكرة… وهي دي النقطة الكبيرة جدا… واللي هانركز عليها دلوقتي

شوف ايه انت بتعمله كل يوم … واربط انك اول لما تعمله، تجبر نفسك انك تذاكر

مثلا، لو انت بتنام ساعة بعد لما بتروح البيت علشان ترتاح، اجبر نفسك بعدها انك تذاكر…

الاجبار هايكون في الاول بس ماتخافش… بعد كده, إنت هاتتبرمج إنك تذاكر بعد لما تصحى من النوم كل يوم… لما تنتنظم على ال ٦ خطوات مدة كافية

٥- أعرف كويس أوي إيه الأضرار اللي هاتحصل لو ما برمجتش مخي على عادة المذاكرة

مثلاا المذاكرة هاتكون صعبة ووقت صعب ومؤلم… 

وكل يوم في حياتي هايكون يوم خنقة… لإني مش هاقدر أذاكر وهاتضايق من نفسي إني مش بذاكر

ده طبعا غير اللي الحاج هايعمله فيك يوم النتيجة… وسيبك طبعا من قصة الإمتحانات كانت صعبة والدفعة كلها شايلة يا حاج… الكلام ده خلااااص … بلح من زمان أوي

٦- ماتسيبش نفسك لواحدك… لو ليك أصحاب شاطرين ممكن يشجعوك… ودي حاجة نادرة… شجع نفسك بيهم وشاركوا بعض رحلة النجاح

لو زي باقي الناس الطبيعية وأصحابك هم سبب عدم مذاكرتك… يبقى صاحب قنوات مفيدة على يوتيوب, زي قناة أسلوب وغيرها كتير, تديلك شحنة طاقة وتحفيز يومية…

وشارك إنت أصحابك كل الحاجات الإيجابية اللي تلاقيها … وخليك إنت القدوة ليهم

لو عاوز تبني عادة انك تلعب رياضة وتآكل اكل صحي

١- الدافع : إنك يكون عندك جسم مثالي… وتبني شكل جميل وجسم صحي

٢- المكافئة الفورية : إخترع لنفسك مكافئة فورية تاخدها لما تمارس الرياضة… وأجمل من كده, لو حولت الرياضة لوقت ممتع, هاتكون هي نفسها مكافئتك

٣- المكافئة في المدى البعيد : أكيد المكافئة في المدى البعيد هاتكون جسمك المثالي الجميل

٤- الإرتباط الشرطي : لازم تربط ميعاد الرياضة بحاجة بتعملها… مثلا أول لما تروح البيت كل يوم تلعب الرياضة… أو تنزل الجيم أو التمرين في أي حتة

٥- إكتب الأضرار لو ملعبتش رياضة : لازم تتصور نفسك في المستقبل وإنت عندك ترهلات ووزن زائد… وتكره نفسك في الشكل ده

٦- ماتسيبش نفسك لواحد : تاني… شوف حد من زمايلك يكون منتظم في الرياضة وإنتظم معاه… لو ماعندكش, صاحب قناة رياضية على يوتيوب… هاتلاقي آلاف القنوات اللي متخصصة في ممارسة الرياضة اليومية

لو عاوز تبرمج الانتظام على الصلاة أو أي عبادة

١- الدافع : أكيد إنك ترضي ربنا وتؤدي أوامره  

٢- المكافئة الفورية : هاتحس بسعادة لحظية أول لما تعمل أي عبادة صح

٣- المكافئة في المدى البعيد : أكيد رضا ربنا 

٤- الإرتباط الشرطي : أول ماتسمع الأذان, ماتديش لنفسك فرصة إنك تفكر أصلا… تقوم تصلي حالا

٥- إكتب الأضرار لو ما إلتزمتش في الصلاة أو العبادة: أكيد أكيد هاتلبس في التلاجة بوشك لبسة التنين المسكين… إنت اللي محتاج العبادة والله

٦- ماتسيبش نفسك لواحد : إتصاحب على قناة داعية بتحبه على يوتيوب, وشوف حلقة تشجعك كل يوم… وشجع إنت أصحابك

أي حاجة عاوز تبرمجها بقى في مخك مهما كانت… طبق عليها ال ٦ خطوات دول بالورقة والقلم

لو عاوز تبرمج عادة انك تتعلم حاجة جديدة

لو عاوز تبرمج عادة القراءة

اي عادة اي عادة مهما كانت، تقدر تبرمج نفسك عليها بال٦ خطوات البسيطة دي

من الاخر… اي حاجة نفسك تعملها… ريح نفسك وبرمجها جوة مخك وسيبها تشتغل بعد كدة لواحدها بطريقة الطيار الآلي 

طيب بالنسبة للجزء التاني… اللي هو بتاع كسر عادة سيئة

سواء تدخين, أو مشاهدة حاجات مش كويسة … أو أي حاجة وحشة مهما كانت

هما نفس ال ٦ خطوات اللي فوق بالظبط بس بدل المكافئة عقاب… 

١- الدافع : لازم توضح لنفسك الدافع من إنك تبطل العادة السيئة دي

٢- عقاب فوري : أكيد هاتعمل العادة دي… بعدها تتبرع ب ٢٠ جنيه لجميعة خيرية مباشرة… شوف التفاصيل في الحلقة رقم ٤ من برنامج أسلوب في دقيقة على قناة أسلوب على يوتيوب وبرامج أسلوب للأيفون والأندرويد

٣- عقاب في المدى البعيد : شوف إيه الأضرار اللي هاتحصلك في المدى البعيد من العادة السيئة دي … لو تدخين مثلا… إحنا مش محتاجين نقولك إيه الأضرار اللي بتيجي منه… مكتوب على العلبة… إبقى إقرأه

٤- الإرتباط الشرطي : أكيد العادة السيئة دي مرتبطة إرتباط شرطي بحاجة معينة… مثلا لما تكون لواحدك, أو صديقك صديق السوء أو أي حاجة بتخليك تفتكر العادة الغلط دي… حاول تكسر وتلغي الإرتباط الشرطي.

٥- إكتب الفوايد اللي هاتحصلك لما تبطل العادة السيئة دي: لو بطلت تدخين مثلا… صحتك هاتكون أفضل إن شاء الله… وفوائد كتيرة

٦- ماتسيبش نفسك لواحد : دور على أصحاب كويسين مش بيعملوا الحاجة الغلط دي يشجعوك… أو شجع إنت حد… بس المهم… سيب كل أصحابك اللي بيعملوا الحاجة الغلط دي

الخطوات فعلا بسيطة جدا جد جدا والله

ورقة وقلم بس… وإكتب الخطوات بالترتيب… وإبدأ نفذ من دلوقتي حالا

حاجة أخيرة مهمة جدا… مستحيل حد فينا يقدر يحصل الفوائد اللي من حلقات أسلوب دي لما يشوف الحلقة مرة واحدة

علشان كده, إنت فعلا محتاج تتفرج على الحلقة دي تاني, وأي حلقة محتاج تستفاد فعلا منها… كل مرة هاتشوف الحلقة مرة تانية… هاتلاقي معلومات جديدة كأنك أول مرة تشوفها

والحلقات كلها بلا إستثناء, موجودة فيديو وكتابة وساوند كلاود على موقع أسلوب دوت كوم, وعلى برامج أسلوب للأيفون والأندرويد

وكمان الحلقات موجودة على قناة أسلوب على يوتيوب وجوجل بلص

وللناس اللي بتحب الحلقات صوت بس… هاتلاقيها على ساوند كلاود

يوتيوب وساوند كلاود دلوقتي بيسمحولك إنك تعمل داونلود للحلقات على موبايلك وعلى الكمبيوتر…. وإحنا فاتحين الداونلود لكل الناس… فا إنت ممكن تعمل داونلود لو عندك باقة إنترنت محدودة… وتتفرج كذا مرة

إحنا جالنا أخبار إن في ناس بتشوف آخر ٣٠ ثانية بس من الحلقة, علشان تعرف إحنا هانقول إعملوا سابسكرايب ولا لأه

إحنا بصراحة, المرة دي كمان مش هانقول إعملوا سابسكرايب, لإن إحنا الحمد لله المتابعين بتوعنا بقوا كتار جدا… غير نصر إبن خالي والأربعة اللي شافوا الحلقة الأولى من برنامج أفكار أسلوب… في ٢ تانيين عملوا سابسكرايب من شهرين… أكتر من كده يبقى طمع بصراحة 

وإنت كمان…. ممكن توفر الوقت اللي هاتضغط فيه لايك وسابسكرايب ده, وتعمل في الوقت ده أي حاجة مفيدة

ممكن مثلا…. تتعلم السباحة أو الغطس… دي رياضة جميلة جدا, خاصة علشان لما يكون عندك فيلا كبيرة جدا وحمام سباحة أوليمبي إن شاء الله…

ويقع الموبايل بتاعك في حمام السباحة, تعرف تغطس وتجيبه

و ممكن كمان تتعلم لغة أجنبية… ممكن تتعلم إنجليزي…. علشان لما تجيب غطاس أجنبي يجيبلك الموبايل اللي وقع في حمام السباحة…

تقدر تقوله بعد لما يجيب الموبايل من حمام السباحة… ربنا يخليلك الحاجة … بس بالإنجليزي طبعا

ممكن كمان تتعلم ال…..طيران… وحاول تخلي الموبايل يقع في حمام السباحة برضه… علشان مايتكسرش

حاجات كتيييييييرة جدا جدا ممكن تعملها بدل ما تعمل لايك وسابسكرايب وشير… الحياة قصيرة أصلها… يارااااجل لسه هاتضغط… كبر مخك

ماتنساش طبعا أول لما تجيب الموبايل بتاعك وتنشفه, تنزل برنامج أسلوب للأيفون والأندرويد على موبايلك… وتعمل لايك وشير للحلقة… مش علشان إحنا عاوزين… لأه… إطلاقا… دي حلاوة رجوع موبايلك بالسلامة

خليك كريم… خليك حبووووووب

الحلقة صوت فقط على ساوند كلاود:

 

osloop thoughts screen shot eps 04