إحنا عندنا رسالة قوية محتاجين إن إحنا نوصلها ليك

هاتغير حياتك… … بس إحنا بندور على طريقة قوية نوصل الرسالة دي ليك

بس نقولك… إحنا مايفرقش معانا الطريقة… خلي الرسالة دي توصلك وإستوعبها كويس أوي… و عيش بيها

بنصرخ بالرسالة دي فيك وفي نفسنا: إستمتع بالألم

حلقة النهاردة هي إختصار لقصة حياتنا كلها في جملة واحدة: الهروب من الألم

كل واحد فينا, من أول لما بيبدأ يصحى من النوم الصبح

من أول لما بيبدأ يطفي المنبه علشان ينام كمان عشر دقايق بس…
بيبدأ رحلته اليومية
رحلة… الهروب
… الهروب من الألم
الهروب من الحياة

كل خطوة بنعملها من أول لما بنصحى من النوم الصبح… إن إحنا بنبدأ رحلة الهروب من الألم

من كل ألم ممكن يكون سبب في نجاحنا
من كل ألم ممكن يكون هو الطريق لسعادتنا

بنختار إن إحنا نضيع ساعات من وقتنا… على الموبايل وغيره… علشان نهرب من ألم إن إحنا نعمل الشغل اللي ورانا

بنختار كل طريق سهل وقصير ممكن, وإحنا عارفين إنه بيبعدنا عن النجاح

هروب من الألم

بنختار إن إحنا مانعملش شغلنا بضمير وإتقان وإحسان… علشان الشغل بضمير فيه مجهود … وإحنا بندور على طريقة نهرب بيها من الألم اللحظي

بنختار إن إحنا مانهتمش بدروسنا… علشان نهرب من ألم المذاكرة والإجتهار

بنختار إن إحنا نبوظ الريجيم اللي بدأناه …. علشان الموضوع صعب… مؤلم… مش سهل

مش هالعب رياضة النهاردة ومش هاروح التمرين

علشان ضهري بيوجعني
ورجلي بتوجعني
وركبتي بتوجعني
هابدأ بكرة
هابدأ بعده
هروب ورا هروب ورا هروب

بس أقولك حاجة… إنت مش بتهرب بعيد

إنت بتهرب خطوتين بس … الألم اللي بتهرب منه النهاردة
بيرجعلك ضعف بكرة
وضعفين بعده
وتلات أضعاف بعد بعده
والموضوع بيفضل يكبر ويكبر ويكبر

عارف حياتك هاتتغير إمتى؟

لما تقرر إنك ماتهربش من الألم,
لما تقرر إنك تبص للألم في وشه
وتبتسم للألم… وتقوله… أنا جايلك… أنا مستعد لك… يا ترى إنت قابلت حد زيي قبل كده… فاهم اللعبة وعارف إنه ممكن يستمتع بالألم وينتصر عليه على أرضه

حياتك هاتبدأ فعلا تبقى حياة نجاح… لما تختار إنك تستمتع بالألم…. لأنه طريق نجاحك

لما تختار إنك تستمتع :
بألم الإلتزام بعبادتك كلها
وألم إختياراتك الصح في الحياة
وألم مذاكرتك وألم إجتهادك
وألم تمرينك وألم إنتظامك في نظام غذائي صحي
وألم تنظيم وقتك ومراقبته وكتابة إنت بتعمل إيه في كل لحظة علشان وقتي مايضيعش منك

وألم إنك توقف كل حاجة غلط في حياتك

عارف…. بعد أول قرار بإنك هاتستمتع بالألم
هاتبدأ فعلا حياة السعادة

حياة النجاح بتبدأ بأول خطوة في طريق الألم
والسعادة … بتبدأ من أول لحظة بتقرر فيها إنك تستمتع بالألم
وسعادتك ممكن تزيد يوم بعد يوم, كل ما إنت بتزود في التحدي وتستمر في إستمتاعك بألم الطريق

السعادة والنجاح رحلة… يا إما تتعلم فيها إنك تستمتع بألم الطريق…
يا إما تتألم كل يوم ميت مرة بألم الهروب اللحظي…
والألم الأكبر لما توصل لآخر الحياة وتكتشف إنك ضيعت حياتك في هروب من الحياة نفسها

لو إنت مستنى اليوم اللي يجيلك فيه نفس تقوم وتتغير وتنجح
فإعرف إن اليوم ده مش هايجي غير لما العمر يكون راح منك
هايجي لما تبقى دفنت نفسك في قيود وقيود
هاتصعب عليك المهمة
إختار إنك تكسر قيودك كلها النهاردة
لأنها كل يوم بتزيد قيد

إختار أكبر قيد إنت عارفه عن نفسك كويس
وحطه أدامك
وبص له بصة تحدي
بنظرة قوة
بنظرة إنتصار
وتخيله مجسم مادي أدامك… وإكسره

وإكسر قيودك قيد ورا قيد
إكسر عاداتك الغلط
إكسر كسلك
إكسر أخطائك
إكسر الشخص اللي جواك اللي بيحاول إنه يكسرك

صدقني… هاتكسر حاجة… وهاتبني ١٠٠ حاجة تانية مكانها… كلها طريق سعادتك

أقولك حاجة كمان….

إنت هاتعيش مرة واحدة بس
مرة …. واحدة… بس
مش هاينفع تعيشها بتهرب كل يوم من الألم
مش هاتقضي حياتك هربان من نفسك
مش هاتعيش حياة سعيدة أبدا وإنت بتهرب فيها من الحياة نفسها

لو النجاح المفروض يكون سهل
كانت كل الناس نجحت… وماكنش النجاح هايكون له أي معنى

أكيد سمعت عن ناس كتير بدأت حياتها من غير أي مقومات مادية … ومن غير أي مواهب في الحياة
الناس دي كان عندهم قدرة واحدة بس… إنهم ماكنش عندهم أي حاجة يخسروها
ماكنش عندهم رفاهية إنهم يهربوا من الألم
الناس دي كان عندهم قدرة رهيبة على الإستمتاع بألم الطريق

كلنا قابلنا ناس كتير جدا في حياتنا
أقل من معظمنا مليون مرة في التعليم… وفي الذكاء … وفي المستوى المادي والإجتماعي
والناس دي نجحت نجاحات إستثنائية … نجاحات أكبر من أي نجاح إحنا حققناه لغاية دلوقتي
عارف ليه؟… عارف ليه الناس دي نجحت مع إنها ماعندهاش مقومتنا على النجاح؟
لأن النجاح من حق كل الناس… مهما كان الواحد فقير… مهما كان الواحد قليل في التعليم… مهما كانوا محدودين الذكاء

النجاح… من حق كل واحد بيعمل خطوات النجاح
وبيوافقوا يدفعوا تمن النجاح … بسهر ومجهود وضغط وتركيز وتعليم…
للي بيوافقوا إنهم يسيبوا كل المتع اللحظية
للي بيوافقوا إنهم يسيبوا كل حاجة بتضيع وقتهم النهاردة… علشان ينجحوا بكرة
للي بيوفقوا إنهم يتألموا… ويختاروا إنهم يستمتعوا بالألم

نصيحة مني ليك
قوم إختار إنك تستمتع بالألم
وشوف إيه أكتر حاجة بتألمك… وإعملها
وإبتسم وإنت بتعملها … وعلم نفسك إنك تبتسم
وعلم نفسك إن كل ما الطريق كان صعب
كل ما فرصك في النجاح هاتكون أكبر من أي حد تاني

لأن زي ما إنت كنت بتهرب من ألم الطريق … قبل الحلقة دي
كل الناس التانية برضه بتهرب من الألم
إبدأ لاحظ وشوف وإنت بتختار إنك تمشي في طريق صعب, وبتستمتع بالألم في الطريق ده
هاتقابل ناس كتير جدا … راجعة من الطريق الصعب ده ومش هايكملوا فيه… لأنهم مش هايقدروا يتألموا … لأنهم هما كمان هايهربوا من الألم
منهم ناس المفروض إنهم يكملوا فيه ويقدروا… بس هما مش فاهمين اللعبة كويس…
اللي فاهم بس نقطة الإستمتاع بالألم… هو اللي هايكمل
إنت اللي ممكن تكمل… طول ما إنت بتستمتع بالألم
يوم ورا يوم
وكل ما الألم يزيد … كل ما إبتسامتك بتكبر وعزيمتك بتشد
لأنك بتكون فاهم إن طريق النجاح بيفضى ليك إنت لواحدك … علشان غيرك مهما كان مؤهل… هايهرب من الألم لأنه ما إتعلمش إنه يستمتع بالألم

هدف مشروع أسلوب كله إنه يساعدك تغير حياتك وتنجح وتعيش حياة سعيدة, بس إحنا مستحيل نساعدك … إلا لما تقرر بنفسك إنك تقوم وتتغير وتنفذ

مفيش أي حد ممكن يساعدك , لو ما قومتش وإختارت إنك تنفذ خطوات النجاح
وتستمتع بألم التنفيذ… والإتقان … والضمير

صرخة النهاردة كانت صرخة: الإستمتاع بالألم
ألم إلتزامك
ألم مبادئك
ألم عزيمتك
ألم حريتك
ألم كرامتك
ألم مذاكرتك
ألم رياضتك
ألم تمرينك
و وعد مننا … إن كل ده… مجرد ألم مؤقت … وهاتشكر نفسك مليون مرة على كل لحظة ألم إختارت إنك تتألمها وتتحداها وتبتسم لها وتستمتع فيها بالألم

صرخة رقم ٢ … صوت فقط على ساوند كلاود من هنا:

 

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على #‏موبايلك #‏الأندرويد من هنا:
http://bit.ly/osloop-android
وأسلوب #‏أيفون من هنا:
http://bit.ly/osloop-iOS-eg
وده, #‏موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/