إبدأ يومك مع مبادئ أسلوب

إبدأ يومك مع مبادئ أسلوب, والمبدأ الرابع من سلسلة ال ٢١ مبدأ, لحياة أكثر إيجابية

إحسب الأثار المترتبة على قيامك بمهامك اليومية

كل حاجة بتختار إنك تعملها أو بتأخر عملها… بتتحكم مليون في المية في نجاحك

شوف خطتك اليومية…اللي هي التودو ليست اللي إتعلمنا نعملها في حلقة المبدأ الثاني من سلسلة ال ٢١ مبدأ لحياة أكثر إيجابية من أسلوب

شوف بقى خطتك اليومية دي, وإحسب لنفسك كل حاجة في الخطة, إيه الأثار الإيجابية  اللي هاتحصل لما تخلص كل عمل مكتوب في خطتك اليومية , وإيه كمان الأثار السلبية لو معملتش كل عمل من الأعمال دي

*يعني عندك مثلا في خطتك اليومية: *مذاكرة

إكتب جنب المذاكرة … إيه الأثار الإيجابية اللي هاتحصل لما تذاكر كويس دلوقتي حالا…

أولا :هاتتبسط آخر اليوم إنك ذاكرت,

وأكيد هاتخفف عن نفسك هم ومجهود المذاكرة أيام الإمتحانات…

وأكيد هاتنجح إن شاء الله وهاتفرح  وهاتفرح أهلك بيك…

وإكتب برضه الأثار السلبية لما ما تذاكرش…

إنك هاتنام متضايق إن اليوم ضاع منك… زي كل يوم,

وأكيد المواد هاتتكدس فوق راسك…

وكمان السيد الوالد هايعلقك من هدومك يوم النتيجة…

وهايقطع عنك باقة الإنترنت

إكتب الأثار الإيجابية والسلبية جنب كل حاجة في خطتك اليومية

الرياضة اللي إنت هاتلعبها

و الدايت اللي مش هاتلتزمي بيه …  هايضيع عليكي الفستان اللي إشترتيه لفرح صاحبتك

المشواير اللي هاتخلصها

مشروعك اللي هاتعمله وتخلصه

شغلك

كل حاجة عندك, إكتب جنبها الأثار الإيجابية والسلبية, بتاعتها… هاتساعدك جدا إنك تتشجع إنك تخلص الشغل اللي وراك

ونفس الحكاية, لكل حاجة غلط بتعملها… إكتب الأثار السلبية بتاعتها… وإكتب الأثار الإيجابية لما تبطلها

الفكرة المهمة… إنك لازم لازم تكتب بإيدك, بورقة وقلم

لو ماعندكش ورقة وقلم… يبقى تنزل برنامج أسلوب للأيفون والأندرويد على موبايلك, وتعمل شير للحلقة دي, وبعدين تنزل تشتري ورقة وقلم…. وعيش ولبن للبيت … وتطلع تكتب الأثار الإيجابية والسلبية للأعمال بتاعتك

قولنا في كومنت, إيه أهم الأعمال اللي هاتبدأ تكتب جنبها الأثار الإيجابية والسلبية … وكلنا نشارك بعض أفكارنا وإقتراحتنا وتجاربنا