غير حياتك مع أسلوب صرخة رقم ١ #صرخة

إحنا في أسلوب بنتحرك مع بعض بقالنا شهووور وشهوووور… وبدأنا رحلة نجاح
عرضنا ليك حلقات كتيرة أوي في أربع برامج مختلفة… ناخد فيها بإيدك… علشان تغير حياتك

بس النهاردة… الحلقة مختلفة

  • الحلقة النهاردة برة البرامج
    الحلقة النهاردة برة الكلام
    الحلقة النهاردة … صرخة
    الحلقة النهاردة … نهاية
    الحلقة النهاردة… بداية
  • في كام واحد في حياتك قالك إنت عمرك ما هتنجح
    عمرك ما هاتخس
    عمرك ما هاتبطل تدخين
    عمرك ماهتصلح علاقتك مع ربنا
    عمر ما دمك ما هايبقى خفيف
    عمر ما صوتك هايبقى حلو
    عمرك ما هاتغير العالم كله
    عمر مشروعك اللي إنت بتفكر فيه ده ما هاينجح

كام واحد بصلك بصة رفض؟
كام واحد طردك من حياته؟
كام واحد سخر منك؟ وإستهزأ بيك؟
كام مرة قررت تمشي جوه الحيطة وتعيش تحت الأرض… محبوس جوه سجن نفسك…
لغاية إمتى هاتكمل تعيش حياة… إنت فيها السجان بتاع نفسك
إنت فيها اللي ساجن نفسك بنفسك… في تضييع وقتك… في تضييع مجهودك… في حاجات إنت بتعملها وإنت عارف إنك بتنزل بيها تحت وتحت وتحت

النهاردة يوم مختلف… النهاردة يوم الصدمة
فاجئ كل الناس.. فاجئ نفسك… فاجئ أهلك… فاجئ أصحابك… فاجئ الكون كله
إتحرك
إتجنن
إصرخ

مابقولكش تعمل حاجة حرام… إوعى تعمل حاجة حرام

بس إتجنن… طلع نار من جواك… عيط… إصرخ… ماتسمعنيش وإنتي قاعد ساكت
في مليون صورة وصورة طالعة في دماغك دلوقتي حالا وأنا بصرخ في ودنك
شايف نفسك بتحقق مستحيل
شايف نفسك بتعمل حاجات مجنونة
شايف نفسك بتثبت لمليون واحد أد إيه هما كانو غلط لما قالوا إنك ماتقدرش
لما قالوا إنك ماتعرفش
لما قالوا إنك قليل
لما قالوا إنك مجنووووون
لما قالوا إن إنت السبب في كل حاجة غلط
أد إيه هما كانوا غلط… لو حد رفضك قبل كده
لو حد وقف في طريق نجاحك وسعادتك
لو حد طردك من حياته
قوم أقف دلوقتي وإنت بتسمعني… طلع ناااااار من جواك وإنت بتسمعني

طلع ورق أبيض وإكتب عليه حاجة واحدة هاتعملها
سواء نجاح في دراسة
سواء نجاح في مشروع
سواء إنك تقف في الشارع وتصرخ
إتجنن لحظة واحدة في حياتك وقوووووووووم طلع نااااار من جواك
وأنا أول واحد هاعمل زيك
أنا هاقوم أصرخ وأقول أنا هابطل كل حاجة غلط أنا بعملها
أنا هاقوم أصرخ وأقول أنا مش هارجع تاني أبد في أي قرار صح أنا خدته… في أي طريق نجاح أنا بدأته
أنا هاقوم أصرخ وأقول:… مش هاقف ساكت وأنا شايف حق بيضيع
أنا هاقوم أصرخ وأصرخ وأصرخ وأقول مش هايهمني مين مش عاجبه شكلي
مين مش عاجبه تخني
مين مش عاجبه هدومي
مين مش عاجبه لوني
مين مش عاجبه لهجتي … مين مش عاجبه طريقة كلامي
مين مش عاجبه شعري أو حجابي أو نقابي
مين مش عاجبه دقني أو شنبي
مين مش عاجبه معتقداتي وإنتمائاتي مين مش عاجبه ديني

عيييييش مرة واحدة صادق مع نفسك… ماتعيش إمعة … ماعندكش شخصية

حلقة النهاردة مختلة
حلقة النهاردة نااااار… حلقة النهاردة صرخة… إنت اللي تصرخها مش إحنا
إنت اللي تصرخها مش إحنا
مفيش حد هايصرخ مكانك
مفيش حاجة نقولك إعملها دلوقتي حالا غير إنك تصرخ وتصرخ وتصرخ…
وبعدين إهدى تاني… وإعقل… وإمسك ورق أبيض… وقلم … وإكتب
هاتثبت لمين إنه غلط
وإكتب كل حاجة صح إنت بتعملها بس مش عاجبة اللي حواليك… إكتبها وإصرخ بإسمها وإعرف إنك هاتعيش نكرة غير سعيد… لغاية لما تحفر نجاحك بضوافرك

الناس اللي إنت شايفهم ناجحين أو أغنياء دلوقتي… سواء علماء أو رياضيين أو رجال أعمال أنقياء … وأهلهم وأولادهم عايشين حياة ماتحلمش بيها

أغلبهم حفروا بضوافرهم في الصخر لغاية لما بنوا نجاحهم بدمهم وعرقهم… إتطحنوا في التعليم
إتطحنوا في التمرين
إتغربوا بره بيتهم سنين وسنين… سكنوا في شقق تحت الأرض شركة مع ١٠ غيرهم… وفضلوا يطلعوا سلمة سلمة… يوم ورا يوم
عدا عليهم أيام بيستلفوا تمن العيش حاف علشان ياكلوا
أنا مش بقولك قصة خيالية أشجعك بيها
…روح شوف الرياضيين اللي نجحوا في كل حتة في العالم… وإنت بتحلم دلوقتي بأساميهم… كورة وسلة وملاكمة ومصارعة وكمال أجسام وكل الألعاب… كام واحد مهما كان مرفه في بيته… خرج بره بلده وحفر تحت الأرض…. ونام أيام جعان.. ونام أيام على الأرض بجد
شوف كام طالب إتغرب بره بلده سنين وسنين… ساكن مع طلبة زيه سواء في شقة أو في مدينة جامعية… حفروا بضوافرهم في الصخر لغاية لما بدأوا حياة النجاح
شوف كام واحد إشتغل وإتغرب بره بلده وعاش سنين يجمع القرش على القرش… وعاش ونحت في الصخر… وبعدين رجع رفع أهله وأولاده وعيلته للسما معاه
الألم اللي هما عاشوه ده… كان ألم مؤقت… دلوقتي هما بيشكروا نفسهم على ألمهم اللي إتألموه لغاية لما بنوا أساطير يتحكى بيها
أي ألم مهما كان… منتهي…
وأي متعة لحظية هيا كمان منتهية

قوم إنت كمان إختار إنك تتألم دلوقتي… بدل ما تتألم في يوم… ماتقدرش تتألم فيه… مش هاتتألم فيه لواحدك… قبل ما توصل ليوم… مش هاينفعك ألمك بحاجة… لأن الحياة هاتكون عدت منك… وإنت إختيارك الوحيد ساعتها إنك تبكي دم على كل لحظة عيشتها غلط في حياتك
على كل إختيار غلط إنت إختارته في حياتك
النجاح مش ببلاش… الفشل بس هو اللي ببلاش

المجهود اللي بتعمله يوم ورا يوم… يوم مالكش نفس… يوم مش قادر… وإنت بتغصب نفسك… وبتستمتع بألم الطريق
وإنت بتستمتع بألم التمرين
وإنت بتستمتع بألم مذاكرتك وإجتهادك
وإنت مارضتش تشتغل مجرد موظف … وكنت إستثنائي في شغلك في كل النواحي…
وإنت وقفت مع نفسك وققة… وإتعلمت وبنيت نفسك بنفسك وبقيت مختلف
وإنت ما إخترتش طريق سهل…
وإنت ما إخترتش طريق قصير.. .
وإنت ماسرقتش مجهود حد…
وإنت ماكذبتش علشان تخرج من موقف…
وإنت ماغشتش علشان تنجح نجاح عااااااار عليك

وقف حياتك كلها دلوقتي حالا
إختار طريقك
إنت عارف كويس إنت المفروض تكون بتعمل إيه دلوقتي… إنت عارف كويس أوي إنت بقالك أد إيه بتتدلع أوي أوي أوي
إنت عارف كويس إنك مستني لحظة في حياتك تصلح بيها كل حاجة غلط بتعملها
إنت عارف كويس إنك مستني اللحظة اللي تقوم وتغير فيها من نفسك… وتطلع ناااار من جواك

مبروك… اللحظة دي جت… اللحظة دي هي دلوقتي حالا

ربنا بعتلك واحد يصرخ فيك ويصحيك… قوم ماتكملش… الصرخة خلاص خلصت… بس حياتك إنت…. هاتبدأ دلوقتي حالا
غير حياتك كلها… وإحنا معاك في أسلوب … مستنيين نسمع صرختك… على هاش تاج صرخة
صرخة نجاحك… صرخة تغييرك… صرخة ميلادك الجديد… على هاشتاج #صرخة دلوقتي حالا

غير حياتك كلها بباقي حلقات أسلوب من هنا: http://bit.ly/osloop-sub
حلقات أسلوب كلها موجودة فيديو وكتابة على موقع أسلوب دوت كوم, وعلى برامج أسلوب للأيفون والأندرويد.
نزل ‫#‏أسلوب‬ على موبايلك الأندرويد من هنا:
http://bit.ly/osloop-android
وأسلوب ‫#‏أيفون‬ من هنا:
http://bit.ly/osloop-iOS-eg
وده, ‫#‏موقع‬ أسلوب:
http://www.osloop.com/
‫#‏شير‬ ‫#‏صرخة‬ ‫#‏مذاكرة‬ ‫#‏نجاح‬

 

الحلقة صوت فقط على ساوند كلاود:

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك حلقات أسلوب في دقيقة بالترتيب الصحيح
نزل أسلوب على ‫#‏موبايلك‬ ‫#‏الأندرويد‬ من هنا:
http://bit.ly/osloop-android
وأسلوب ‫#‏أيفون‬ من هنا:
http://bit.ly/osloop-iOS-eg
وده, ‫#‏موقع‬ أسلوب:
http://www.osloop.com

صرخة#