قهوة الصباح: أوقات هاتحتاج تشجع نفسك… وأوقات هاتحتاج إنك تدي نفسك على دماغك وتشد نفسك من قفاك وتقوم نفسك غصب عنك
أيوة… بالظبط كده
أيام… هاتحتاج إنك تفتح نفسك على الحاجة اللي المفروض تقوم تعملها وتقربك من سعادة ونجاح في الحياة
وأيام تانية… هاتحتاج إنك تغصب نفسك, و تقوم تشد نفسك غصب عنك.. غصب عنك … غصب غصب غصب عنك
زمان… وإنت طفل… كان موضوع غصب عنك ده بيتولاه عنك مامتك وباباك
لكن عند نقطة معينة, هاتحتاج إنك تكبر وتبقى إنت أب نفسك… وهاتحتاج إنك تكون أم لنفسك… وهاتحتاج تشد نفسك غصب عنك وتقوم بقى
وتقول لنفسك: ماتقوم بقى… زهقتني… هاتقوم ولا والله أعرفك تقوم إزاي
صدقنا… متعة الدنيا كلها لما تقوم وتتحرك بقى وتعمل الشغل اللي وراك وتتحرك و تعمل أي حاجة
متعة الدنيا كلها لما تغصب نفسك على حاجة, هاتقربك لنجاح
بداية النجاح والسعادة, لما يكون الإجبار ده جاي من جواك إنت
ودي حاجة بتتبنى واحدة واحدة
بتحاول تجبر نفسك مرة
و ممكن تنجح مرة
و ممكن تحاول مرة و مرتين
وبعد كده تنجح مرتين تلاتة
وبعد كده تحاول كمان مرة
وبعد كده النجاح ده يبقى عادة وإدماااااان
صباحك جميل أوي
إوعى تنسى تبدأ يومك بإنك تحمد ربنا على ٥ نعم بس من نعم ربنا عليك, إكتشفت النهاردة إن إنت مستحيل كنت تفتكرهم
وقولنا بقى… هاتجبر نفسك؟ ولا إيه الكلام؟