“التسامح” كلمة كبيرة أوى

قهوة الصباح
“التسامح” كلمة كبيرة أوى
مفيش حد عنده القدرة على أنه يسامح بسهولة – 
مش بسهولة نسامح الناس اللى أذونا فى حياتنا – 
مش بسهولة نسامح الناس اللى ظلمونا و اللى بسببهم قضينا أيام صعبة نبكي فيها بدل الدموع دم من القهرة و الاحساس بالظلم. 
ناس وقفوا فترة من حياتنا و كانوا السبب فى استنفاذ طاقتنا فى الزعل و الهم.

تسمع الناس اللي حواليك تقولك “حرام عليك نفسك” – “حرام عليك صحتك” – “أولادك عايزينك” – “عيلتك محتجاك” يا بخت من بات مظلوم ولا باتش ظالم !!

بس اللى ايده فى المية مش زى اللى ايده فى النار – 
اللى أتأذى فى مشاعره هو انت مش الناس –
اللى بات أيام دموعه على خده هو انت مش الناس – 
اللى اتحمل فى قلبه وذهنه القهرة ا نت مش الناس، 
ماحدش بيحس بالنار و القهرة و الظلم غيراللي اتظلم – 
حتى أقرب الناس ليك اللى بيحاولوا يساعنك،لكن عمرهم ما هيحسوا بمشاعرك و لا بكمية الظلم اللى أنت حاسس بيه

بس لو وقفت فى يوم مع نفسك 
هاتكتشف انك مضيع حياتك فى الألم و الحسرة، 
عمرك بيضيع منك فى القهرة و العذاب النفسي، و نظرك بيضعف من كتر البكاء

وأسال نفسك مين اللى بيخسر

انت ولا الناس اللى أذوك؟ 
أنت ولا الناس اللى ظلمتك؟

أنت زي بالضبط اللي بيشرب نفسه سم قاتل و مستني الناس اللى ظلموك هما اللي يموتوا –

بتقتل نفسك كل يوم فى حسرة و ألم و مستني ان حد تاني هو اللي يموت!!؟

في الحقيقة: لأه… إنت بس اللي وإنت الوحيد اللي بتنضر بإنك مش قادر تسامح

و هاتكشفت أنك لازم فى الاخرتسامح و تبدأ تعيش………
تسامح و تبدأ تفوق……. –

بس ايه الدافع اللي المفروض يخليك تسامح؟

هل علشان خاطر هما يستاهلوا إنك تسامحهم؟ 
هيييييللللل نوووو لأ طبعا – 
ميستهلوش إنك تسامحهم

خصوصا إنهم كمان مطلبوش منك حتى السماح !!

هاتقولي ” أسامح و أنسى ازاى” بسهولة تقول الكلام ده لنفسك لكن من الصعب بل من المستحيل التنفيذ.

بس هاهونها عليك و اقولك : 
انك مش معنى انك تسامح أنك تنسى اللى عملوه فيك – 
مش معنى أنك تسامح أنهم يدخلوا فى حياتك مرة ثانية أو يكون ليهم وجود فيها

أنك تسامح هو أنك ما تسمحش بالمهزلة دي فى حياتك تانى – 
ماتسمحش للألم والإحساس بالظلم أنهم يستمروا فى حياتك،

أنت هتسامح بس لمصلحتك…….

أنت هتسامح بس لصحتك أنت – 
لحياتك أنت – 
هتسامح لنفسك و بس – 
لازم تستمر في حياتك – 
تركز فى نجاحك –

ارمي وراك كل احساس بالظلم أنت عيشته.

خد عهد علي نفسك من النهاردة أنك هتسامح كل اللى غلط فى حقىك – 
و هتركزر طاقتك بس أنك تعيش حياة كريمة – 
مفيهاش شعور بالقهر و الظلم و الندم . 
مش هتلوم علي حد بعد النهاردة – 
هاتبص لنعم ربنا عليك و تحمده عليها.

لكل واحد ظلمك في حياتك

لكل واحد ضرك وهو متعمد

لكل واحد لسه شايل في قلبك بسببه وبتقعد تفتكر كل شوية في الشر اللي هو سببه ليك

بشجعك دلوقتي إنك تسامح كل شخص أساء ليك… كأنه عمره ما عمل فيك حاجة وحشة أبدا

انت بتسامح علشان تبقى حر –

تحرر نفسك من قيود الاحساس بالظلم –

تحرر ذهنك اللى هينفجر من التفكير.

قول لنفسك: “أنا مستعد دلوقتى أنى أسامح علشان خاطر مصلحتي مش علشان أنا كريم”

“المسامح مش بس كريم “… المسامح كريم وعارف مصلحته كويس

كويس أوي.

https://www.youtube.com/watch?v=U_CnQuaPwjQ