كتاب‬ ‏لغات‬ ‫‏الحب‬ ‫‏الخمسة‬

في كتب بتغير حياة
والكتب دي… غيرت حياة ملايين من الناس قبل كده

ودلوقتي… جه الوقت اللي إنت كمان تغير فيه حياتك

كتاب النهاردة إسمه: لغات الحب الخمسة
والمؤلف د.جاري تاشبمان
الكتاب ده إتباع من النسخة الإنجليزية منه ٨ مليون نسخة, دا غير إنه إترجم ل ٣٩ لغة غير الإنجليزية… وغير حياة ملايين من الأزواج في العالم
الكلمة اللي بيستخدمها الأزواج دايما بعد تطبيق المبادئ البسيطة اللي في الكتاب ده هي إن: الكتاب ده بيعمل سحر ويصلح الحياة الزوجية مهما كانت معقدة

د. جاري تشابمان مؤلف الكتاب عمل طول حياته إستشاري علاقات زوجية…

ومعنى الوظيفة دي: إن الزوجين بيروحوا له زي طبيب كده بالظبط… علشان يديهم نصائح يطبقوها في زواجهم… ويصلح بيها زواجهم

في البلاد الغربية… لما الزواج بيدخل في مرحلة عدم التفاهم بين الزوجين (اللي هي أحد قوانين الكون اللي بتحصل لك الناس) … بيكون الحل الذكي دايما إن يروح أحد الزوجين – أو الزوجين مع بعض, ل إستشاري علاقات زوجية
و الإستشاريين دول, بيكون وظيفتهم إنهم يصلحوا الزواج ده…. ولأن كل مشاكل الزواج بلا إستثناء مكررة…. مفيش أي مشكلة مهما كانت ماحصلتش لميار واحد قبلك على الأقل
فا كل المشاكل لها حلول ومعروفة… بس سرها بيكون عند أهل العلم في المجال ده

بعد ٣٩ سنة عملها د. جاري تشابمان كا إستشاري علاقات زوجية… قدر فيها يعمل معجزات في صناعة حب بين أكتر الأزواج كرها لبعض وكرها للحياة… قدر يحط طريقة حقيقية لإيجاد الحب بين الزوجين

د. تشابمان لاحظ من كل مشاكل الأزواج,

بعد سنين طويلة جدا ل د.جاري تشابمان في وظيفة إستشاري علاقات زوجية
حط نظرية بناء على آلاف الأزواج اللي قابلهم… وهي إن كل شخص بيكون له لغة حب معينة… لو الزوج أو الزوجه قدموا للشخص ده الحب باللغة اللي يفهمها… حياتهم هاتكون حياة سعيدة جدا ومليئة بالحب

الكتاب ده تم كتابته خصيصا للأزواج
الكتاب ده غير حياة ملايين من الأزواج في جميع أنحاء العالم… لأنه ببساطة بيشرح طريقة منظمة جدا بيقسم بيها أنواع الحب اللي كل شخص من الزوجين يحب إنه يستقبله… والنوع اللي المفروض إنه يقدمه لشريك حياته

فكرة الكتاب الأساسية بتدور على إن كل زوج أو زوجة, بيكون له لغة بيحس بيها إن شريك حياته بيحبه فعلا… ممكن تكون اللغة دي مختلفة عن اللغة اللي شريك حياته بيحس بيها بالحب… وإن كل واحد من الزوجين يتعلم لغة حب زوجه أو زوجته…. هايغير حياتهم بجد

وإن كل شخص, بيكون عنده إناء, أو وعاء أو تانك للحب, زي تانك البنزين بتاع العربية بالظبط… علشان الشخص يقدر يعيش حياة سعيدة, لازم تانك الحب بتاعه يكون مليان
إنت كا زوج, لازم تتأكد إنك تملى تانك الحب بتاع زوجتك بإستمرار
وإنتي كا زوجة, لازم تتأكدي إنك تملي تانك الحب بتاع زوجك بإستمرار

لو إنت أو إنتي سيبتوا تانك الحب بتاع شريك حياتكم يفضى… هايعمل زي العربية اللي تانك البنزين بتاعها فاضي… مش هاتمشي
إنتي كا زوجة, زوجك مش هايقدر يسعدك لو سمحتي لتانك الحب بتاعه إنه يقل أو يفضى
و إنت كا زوج, زوجتك مش هاتقدر تسعدك لو سيبت تانك الحب بتاعها إنه يقل أو يفضى

وطالما تانك الحب زي تانك البنزين, ماينفعش تملاه مرة في العمر وتتوقع إنه يفضل يلف بيك طول العمر, دا زي تنك بنزين العربية بالظبط… لازم يتملى بإستمرار.

الطريقة بقى اللي بيتملى بيها تانك البنزين ده, هو محور الكتاب كله… إن كل شخص بيكون عنده لغة أساسية ولغة ثانوية من خمس لغات للحب
لو لبيت وحققت وتواصلت مع شريك حياتك بلغة الحب الأساسية اللي بيفهمها… وكمان لغة الحب الثانوية اللي بعدها… هاتخليه يحس بالحب… وده أهم إحساس في الكون لأي إنسان
الإحساس بإنك تحب… وتتحب… من أهم الأحاسيس اللي في الدنيا
كل إنسان مفطور على البحث عن الحب والإهتمام
و لو الحب ده الأزواج ماتعلموش إنهم يوصوله لبعض, يبقى إيه الفكرة من الزواج أصلا؟

تعالوا الأول نشوف إيه هما الخمس لغات للحب, و بعدين إزاي نطبقهم

لغة الحب الأولى: كلمات التشجيع والثناء

لغة الحب الثانية: تكريس الوقت وقضاء الأوقات سويا

لغة الحب الثالثة: تقديم الهدايا

لغة الحب الرابعة: الأعمال الخدمية

لغة الحب الخامسة: الاتصال الجسدي والعلاقات الزوجية

قبل ما نتكلم بالتفصيل عن ال ٥ لغات للحب – تعالو نحكيلكوا قصة… يمكن سمعتوها قبل كده

زوج بيقول: أنا مراتي مفيش حاجة بعملها بترضيها أو تسعدها أبدا… بالعكس… مهما عملت علشان أرضيها… مش ممكن أبدا تسيبنا نفرح
بشتغل وبموت نفسي في الشغل
بجتهد علشان أحل مشاكلي في الشغل وأجيب فلوس علشان أوفر مصاريف البيت
مفيش كلمة شكر… وحتى ال ساعة اللي بحاول أرتاحها مع أصحابي برة… بتطلعها على عيني لما أروح
مع إني بموت نفسي علشان أسعدها … بس تقول إيه!

و زوجتة بتقول: أنا بموت نفسي في البيت مع الأولاد, من الساعة ٦ الصبح تحضير للمدارسة وبنزل شغل وأرجع أطبخ وأذاكر مع الأولاد وغسيل وترتيب البيت
دي مش حياة أبدا
وكل ده, ولا كلمة شكر واحدة… ولا إحساس بالمسؤلية اللي مرمية عليا… في ناس مش بيتمر فيها إن الواحد يموت نفسه علشانها
أنا لو كنت واحدة نكدية… كنت عرفت أرتاح وآخد حقي في الحياة… بس تقول إيه!

الكتاب كله بيتكلم عن آلاف القصص اللي المؤلف سمعها وحلها أثناء عمله إستشاري علاقات زوجية… القصة دي ممكن تسمعها مليون مرة من زوج وزوجة… بتفاصيل مختلفة خالص… بس بيكون نفس المحور
الزوج: بيعمل كل حاجة هو شايف إنها المفروض تسعد زوجته… وبدل ما تشكره… مش طايقة الحياة معاه
الزوجة: بتموت نفسها علشان بيتها وعلشان تسعد زوجها… وبدل ما يساعدها ويشكرها… بيشتكي منها

د.جاري إكتشف ببساطة, إن كل واحد من الزوجين دول بيتكلم لغة مختلفة تماما عن زوجه
كأن واحد إنجليزي سافر الصين, وبيكلم الناس بالإنجليزي… ومتغاظ جدا من غباء الناس إنهم مش بيفهموه
مع إن لغته الإنجليزية واضحة جدا… إزاي مش فاهمين كل اللي هو بيقوله؟؟؟
الموضوع ببساطة… مش إن الراجل الإنجليزي وحش… أو الصينين وحشين…
الموضوع إن كل واحد منهم بيتكلم لغة مختلفة… ولازم يتعلموا يتكلموا لغة بعض علشان يقدروا يوصلوا كلامهم لبعض

دي بالظبط زي قصة الزوج والزوجة…. الزوج بيقدم الحب لزوجته وأسرته بطريقه (أو بلغة) هو شايفها أفضل طريقة في الدنيا
بس زوجته مش فاهمها خالص … لأنها لغة أجنبية وغريبة عنها… مش هاتفهما مهما إتكلم اللغة دي كويس
نفس الحكاية… الزوجة بتتكلم لغة حب بتحاول تسعد بيها زوجها وأسرتها… بس زوجها مش بيفهم اللغة دي… فا هو مش شايف إنها بتقدم حب وسعادة للأسرة

الجميل بقى جدا جدا في الموضوع… إن اللغات دي معروفة كويس أوي… وتعليمها سهل جدا جدا
لما تتعلم لغات الحب دي… هاتقدر
– تفهم الحب اللي زوجك أو زوجتك بتحاول تقدمه… وهاتقدره وهاتفرح فيه
– ها تفهم إيه لغة الحب اللي زوجه أو زوجتك بتفهمه كويس أوي… وتحاول إنك تركز مجهودك في البيت إنك تقدم الحب باللغة دي

بالتعليم المستمر والتمرين و الممارسة… الحياة هاتتقلب جنة
دليلك إيه؟
– تخيل الزوجين دول, لما الزوج يرجع بعد يوم مطحون فيه… يلاقي زوجته بتقوله: ربنا يعينك على إجتهادك… وهي من جواها فاهمة وحاسة أد إيه هو بيجتهد وبيحاول يوصل الحب… أكيد الزوج ده حياته هاتتحول لجنة
– تخيل الزوجة دي, لما زوجها يكون مقدر وفاهم كويس أوي إجتهادها… وتلاقيه بيشكرها ويشجعها ويحبها… أكيد الزوجة دي برغم كل التحديات اللي في حياتها… حياتها هاتتحول لسعادة
الحب والتفاهم والتقدير بيحول الحياة …. لجنة

طيب… إيه هي اللغات دي وإزاي نتعلمها؟

الكاتب بيقول: إن في زوج جاله قبل كده وقاله, أنا ممكن أعيش شهر كامل على كلمة تشجيع وثناء وشكر من زوجتي
دي لغة الحب الأولى: كلمات التشجيع والثناء
إنك تختار إنك تقول لزوجتك: ربنا يكون في عونك على إجتهادك في البيت ومع الأولاد
إنك تختاري إنك تقولي لزوجك: ربنا يعينك على إجتهادك في الشغل
لما زوجتك تعمل أي حاجة حلوة حتى لو بسيطة, تختار إنك تلاحظها وتشكرها عليها
ولما زوجك يعمل أي حاجة حلوة, تشجيعه بكلمة شكر وتشجيع عليها
ولما تشكر في زوجتك أمام أولادكم و باباها ومامتها وأخواتها … ولما إنتي تعملي نفس الحكاية مع زوجك
فرق الحياة بيكون زي الفرق بين السما والأرض, لما نتعلم لغة الحب الأولى: كلمات التشجيع والثناء
الجميل جدا إن دي من أسهل لغات الحب إن الواحد يتعلمها
ببساطة, أي حاجة بتقولها وأي طلب بتطلبه … ممكن يطلع منك على صيغة الطلب, أو صيغة الأمر والتسلط
حاجة بسيطة بتطلبها من زوجتك زي طبق أكل معين بتحبه
ممكن تقولها: الله على طبق المكرونة اللي إنتي بتعمليه ده… مفيش حد بيعمله زيك.. فعلا نفسي أستمتع بطبق من ده بإيدك
وممكن تقول: ماتقومي تعمليلنا أكل… الواحد طالع عينه طول اليوم, وإنتي قاعدة في البيت كده مش حاسه بالواحد… إعملي مكرونة وخلاص

وإنتي كمان, ممكن لما تحتاجي طلب من زوجك, زي مثلا إنه يصلح حاجة بايظة في البيت زي السباكة مثلا
ممكن تقولي له: أنا عارفه يا حبيبي إنك تعبان طول الإسبوع, بس لو جبت حد يصلح لنا سباكة البيت… هايبقى كتر ألف خيرك والله
وممكن تقولي له: أنا صوتي إتنبح علشان السباكة تتعمل… خليها كده لما الدنيا تطفع علينا ونموت غرقانين… ولا حياة عارفين نعيشها ولا حتى شوية سباكة بيتعملوا

زي ما شوفتوا في المثالين اللي فاتو… طريقتين للطلب, … طريقة بتشحن تانك الحب بتاع الزوج والزوجة… وتخليه كمان يتشجع إنه يلبي طلبك
وطريقة تانية, تدل على إنك مش ذكي خالص… بتكسر سعادة الإنسان اللي أدامك, ومش هايرجعلك غير كره

كل زوج وكل زوجة, لازم يتعلموا كويس أوي, إزاي يستخدموا كلمات التشجيع والثناء… والحب هايتولد من جديد

لغة الحب الثانية
تكريس الوقت وقضاء الأوقات سويا
– بالنسبة لبعض الأزواج و الزوجات, إنهم يقضوا وقت حقيقي مع أزواجهم يعملوا فيه حاجة مشتركة… هي دي اللحظة اللي بيحسوا فيها بالحب

ده بالظبط عكس لو الزوج قاعد بيتفرج على ماتش مراته ماعندهاش أي إهتمام بيه
أو زوجة بتتفرج على مسلسل زوجها ماعندوش أي إهتمام بيه
أو كل واحد فيهم ماسك الموبايل بتاعه وعايش في كوكب لواحده

لو أحد الزوجين, اللحظة اللي بيحس فيها بالحب… هي قضاء وقت حقيقي مع الزوج أو الزوجة… يبقى لازم نتعلم إزاي نقضي وقت مع بعض
– ممكن يكون أي إهتمام مشترك الزوجين يحاولوا يتعلموه مع بعض
– ممكن يقفوا في المطبخ يطبخوا مع بعض
– ممكن يقعدوا يشربوا شاي في البلكونة
– أي حاجة مهما كانت – يشترك فيها الزوجين في عمل حاجة مشتركة… لو دي كانت أحد لغات الحب للزوجين

لغة الحب الثالثة:
تقديم الهدايا
– بعض الأزواج… مش بيحس بقيمته عند الزوج أو الزوجة, إلا لما الشخص الأخر يجتهد في إنه يختار ويقدم له هدية
لو أحد الزوجين… بيحس بالحب… وتانك الحب بتاعه بيتملى بالهدية… يبقى دي من أهم لغات الحب اللي الطرف الآخر لازم يتعلمها
– الهدية ممكن تكون عبارة عن ورقة مكتوب فيها كلمة حب وتقدير وشكر وثناء
و ممكن تكون حاجة الزوج أو الزوجة محتاجينها
و ممكن تكون حاجة هما بيحبوها
تنوع الهدايا بين الثمين في الثمن (حسب القدرة طبعا)… والثمين في الرومانسية (زي وردة, كلمة جميلة في كارت… وخلافه)… بيضمن إن تانك الحب يكون مليان دايما
لو جبت أغلى هدية في الدنيا من شهرين… تانك الحب هايحتاج يتملى تاني برضه… حتى لو بهدية بسيطة بعد شهر أو أقل

نصيحتين مهمين جدا:
١- لو إنت جبت خاتم غالي لمراتك… وكانت لغة الحب اللي هي بتحسها هي الهداية… يبقى ماتفتكرش إنها هاتعيش بالخاتم ده تحس بالحب طول العمر
تانك الحب بيقل… لازم تجيب هدية كل فترة… مش هدية غالية خالص… بس ماتعيش طول العمر تفتكر الخاتم اللي إنت إشتريته لها هدية سنة ٧٢
٢- طقم التيفال اللي إنت إشتريته لمراتك في عيد الأم… دي مش هدية حب خالص… دي مواعين زيادة على مراتك … هاتتطبخ فيهم لكم إنتوا

إختار هدية تحسس اللي أدامك بالحب… مش تحسسه إنك بتجيبله أدوات تعذيب في المستقبل

لغة الحب الرابعة: الأعمال الخدمية

بعض الأزواج… مش بيحسوا إن زوجاتهم بيقدموا لهم الحب, إلا لما يروح البيت يلاقي البيت مترتب والأكل جاهز ومتحضر
كده بيحس إن زوجته فعلا بتقدم أجمل لغة حب
وبعض الزوجات, مش بيحسوا إن أزواجهم بيقدموا لهم الحب, إلا لما يساعدوا في صيانة البيت, ويرموا أكياس الزبالة (أيوة… ده أكتر مثال مستخدم في الكتاب بالمناسبة بجد مش هزار… الزوجات بيحسوا بالحب من أزواجهم لما يرموا أكياس الزبالة)
الأعمال الخدمية كتيرة جدا جدا… تصليح سباكة البيت, غسيل الأطباق… تحضير الأكل, المذاكرة مع الأطفال, دفع الإيجار و فواتير الكهرباء والتليفون والغاز … وغيره وغيره وغيره
كل زوج وزجة… المفروض يعرف إيه الأعمال الخدمية اللي الطرف التاني محتاجها, ويحاول إنه يجتهد في إنه يقدمها بطريقة كويسة وفيها تشجيع
ولما يكون أحد الزوجين, هي دي الطريقة اللي بيحس فيها بالحب من الطرف الآخر… لازم يفهم إنه يطلبها بطريقة الطلب المؤدب الرقيق… مش بصيغة الأمر والزهق والتملل والحسرة

لغة الحب الخامسة: الإتصال الجسدي:
– بعض الأزواج والزوجات, بيحسوا بالحب من أزواجهم لما يهمتوا إنهم يمسكوا إيد بعض ويكون في إتصال جسدي بينهم
يعني لو أحد الزوجين اللغة اللي بيحس فيها بالحب هي إن الطرف الآخر يمسك إيده وهما ماشيين مع بعض في الشارع… يبقى أكيد لو واحد سابق التاني ب ٤٠ متر وهما ماشيين مع بعض… هايخلي تانك الحب بتاع الطرف الآخر فاضي جدا
– لازم نتعلم إزاي الطرف الآخر بيحس بالحب بالإتصال الجسدي, ونبدع في تعلم وتقديم لغة الحب للطرف الآخر

في نهاية الكتاب… الكاتب بيجاوب على كل الأسئلة اللي كل الناس بتسألها… زي
– أنا وزوجي متجوزين بقالنا ٣٢ سنة… هل ممكن نحيي الحب تاني؟
– أنا زوجي ماعندوش قلب أصلا… هل ممكن الكلام اللي بتقوله ده يتطبق علينا كا أسرة؟
– أنا مهما عملت لزوجي أو لزوجتي مش بيفرق أبدا
– أنا جربت كل الطرق دي… وما فيش حاجة بتجيب نتيجة أبدا
كل الأسئلة اللي تخطر على بالك بين الأزواج… حتى اللي بيكرهوا بعض والأزواج اللي بيعتدوا جسديا على بعض واللي بيشتموا ويهينوا ويتعصبوا ويزعقوا واللي فعلا بيكرهوا بعض كره حقيقي لأسباب ماينفعش تتحل
كل الأسئلة دي وغيرها كتير جدا في الكتاب

علشان كده, إحنا بنعتبر تخليص الكتاب ده, هدية جميلة جدا لكل الأزواج, تخليك تروح تقرأ الكتاب ده من أوله لآخره
لا يمكن تتخيل حياتك الزوجية هاتتغير إزاي مهما كانت علاقتك, ومهما كان سنك, ومهما كان مشاكل شريك حياتك
الكتاب له ترجمة عربي وموجود في مكتبات كتيرة أون لاين, وموجود كمان أوديو بوك في أماكن كتيرة… ممكن تدور عليه وتسمعه مرات ومرات كتيرة

حلقة النهاردة لازم تاخد منها ال ٨ معلومات المهمين دول:
١- لو إنت فاكر إنك ممكن تعيش حياة زوجية سعيدة مع زوجتك, من غير ما تستثمر من وقتك في قراءة كتب عن الزواج و تتعلم إزاي تكون زوج تسعد أسرتك… يبقى إعرف إن ده أقرب للمستحيل
٢- لو إنتي فاكرة إنك ممكن تعيشي حياة زوجية مع زوجك, من غير ما تستثمري من وقتك في قراءة كتب عن الزواج وتتعلمي إزاي تكوني زوجة تسعدي أسرتك… يبقى إعرفي إن ده أقرب للمستحيل
٣- لو إنت فاكر إن حد من أصحابك أو أهلك هاينصحك نصائح تصلح لك زواجك… يبقى يصلحوا هما زواجهم الأول… لازم نصائح الزواج تاخدها من إستشاري متخصص في الزواج… أو كتاب كاتبه متخصص في حلول مشاكل الزواج
٤- لو إنتي فاكرة إن واحدة صاحبتك ها تنصحك نصيحة تصلحي بيها زواجك… تبقى تصلح هي زواجها الأول… لازم تقرأي من كتاب متخصص…. صاحباتك نوعين… واحد آخرها تهديكي (لو إنتي محظوظة بصديقة نادرة كده)… وصديقة تانية… هاتحولك مشاكلك التافهة لنهاية حياتك الزوجية…. علشان تصلحي زواجك… لازم قراءة وتعلم من “متخصصصصصصص”
٥- الحب هو أجمل إحساس بين الزوجين… مسؤوليتك كا زوج إنك تخلي زوجتك تحس بحبك ليها… ومسئوليتك كازوجة تخلي زوجك يحس بالحب…. ده مش تكرم من حد فيكم… لازم تتعلموا إزاي توصلوا الحب لبعض… علشان الحب ده يرجع لكم تاني
٦- الحب هو أجمل إحساس في الحياة كلها … بيخلي الناس تطير في السما…. و تعمل مستحيلاات… ولازم تتعلم إزاي توصل الحب… ولازم تتعلم إزاي تفهم لغة حب شريك حياتك
٧- عايز تعيش حياة سعيدة؟ حب زوجتك أوي ووصل لها الحب ده وخليها تحسه في قلبها بجد…. الموضوع محتاج تعلم ومجهود وإستثمار… مش مجرد كلام… وبياخد وقت… بس إبدأ إجتهد… وإنت حياتك هاتتحول لجنة إن شاء الله.
٨- عايزة تعيشي حياة سعيدة؟ حبي زوجك ووصلي ليه الحب… وصلي ليه إنك بتحبيه… إستثمري في التعلم بجد… وماتخديش نصائح من أي حد مش متخصص.

الحلقة دي هاتلاقوها كاملة كتابة وفيديو وصوت وشرح ومناقشات على موقع أسلوب دوت كوم, وعلى برامج أسلوب للأيفون والأندرويد

إحنا مش محتاجين نقولك إن الحلقة دي هاتفرق في حياة كل زوج وكل زوجة هايسمعوها… أكتر من أي حلقة تانية أسلوب قدمتها لغاية النهاردة… دي أكتر حلقة محتاجين إنها توصل لكل الناس بلا إستثناء
وصلها لأهلك كلهم, وإنتي وصليها لأهلك وأصحابك كلهم

وإكتبولنا إقتراحاتكم للكتب الجديدة… و ياريت كلنا نرد على أسئلة وإستفسارات بعض للي عنده أجوبة وردود