المبدأ التاسع: ماتوقفش تعليم أبدا

 

إبدأ يومك مع مبادئ أسلوب

والمبدأ التاسع من سلسلة ال ٢١ مبدأ لحياة أكثر إيجابية

ما توقفش تعليم أبدا

المبدأ ده من أهم المبادئ اللي لازم نلتزم بيها طول عمرنا… ومانوقفش تعليم أبدا

الإستمرار في إنك تتعلم وماتوقفش تعليم أبدا طول العمر… ده أهم إستثمار تستثمره بنفسك… في نفسك…

إيه ده… أنا سمعت الجملة دي فين قبل كده؟… آآآآآه… دي العادة السابعة من كتاب: العادات السبع للأشخاص الأكثر فاعلية… واللي إتكلمنا عليه بالتفصيل في الحلقة الأولى من برنامج: مكتبة أسلوب

إن إحنا ما نوقفش تعليم أبدا طول عمرنا, ده أقل متطلبات النجاح في الحياة… والتميز عن الآخرين

نتعلم مهارات جديدة خاصة بشغلنا… وخاصة بتربية الأطفال… وخاصة بطرق المذاكرة… وخاصة بممارسة الرياضة و الطبيخ … وإزاي الأزواج يتعاملوا مع بعض… وإزاي تكسب الأصدقاء

لازم ماتوقفش تعليم أبدا… مش بس التعليم الأكاديمي … بس التعليم الحقيقي اللي هاتستخدمه في الحياة

إتعلم كل حاجة جديدة… خاصة بمجال شغلك

وإتعلم كمان كل المهارات اللي هاتساعدك إنك تؤدي عملك بسرعة وبثقة عن غيرك

لو عملك محتاج منك الكتابة على الكمبيوتر… يبقى لازم تتعلم الكتابة السريعة على الكمبيوتر… واللي إسمها: تاتش تايبينج …. ولو شغلك مش محتاج إنك تكتب بسرعة على الكمبيوتر… يبقى إتعلمها غلاسة وخلاص

و لو مش عارف إيه معنى التاتش تايبينج… شوف الفيديو ده لمحمد عبد الكريم من فريق عمل أسلوب وهو بيشرح معنى التاتش تايبينج على قناته على يوتيوب

وكمان إتعلم الشورت كاتس… والإختصارات بتاعة الكيبورد في البرامج اللي بتستخدمها… هاتخليك أسرع كتير من باقي زمايلك

لو طالب بقى… … يبقى إنت محتاج تتعلم طرق للمذاكرة… إنت كاطالب, مش بس محتاج إنك تذاكر دايما… إنت محتاج كمان إنك تتعلم “إزاي تذاكر”… راجع الحلقة رقم ١ من برنامج أفكار أسلوب… علشان تتعلم طريقة تحول بيها المذاكرة لوقت ممتع ولعبة مسلية

وكمان… إنت كا طالب… من أهم المهارات اللي لازم تتعلمها… هي إدارة وتنظيم الوقت… في كتب كتيرة جدا عن تنظيم وإدارة الوقت… إستثمر في نفسك بقراءة الكتب دي… وأكيد شوف الحلقة رقم ٢ من برنامج: أفكار أسلوب… علشان تتعلم خطوات بسيطة عملية… تدير بيها وقتك وتنظمه… وتتعلم إزاي مايضيعش منك وقت

لو إنت مدير: يبقى اللي هاينجحك في إدارتك …. هو إنك تتعلم وتقرأ كتب.. عن قيادة فريق العمل… … لو ناوي تدير شركة وفريق عمل بالفطرة … والحب الحب الحب…… يبقى هاتلبسهم في التلاجة… وهاتلبس معاهم

لو إنتي ربة منزل, ومسؤلة عن أطفال وبتديري منزل وأسرة… يبقى المجال قدامك وااااسع جدا… ممكن ماتوقفيش تعليم أبدا في المجالات دي:

– فنون ديكور البيت

– وتقرأي أكيد عن تنظيم وإدارة الوقت

– و تتعلمي طرق للطبخ السريع والصحي من على يوتيوب

– وكمان تقرأي كتب عن تربية الأطفال

– وطبعا لازم تتعلمي إزاي تذاكري مع الأطفال… من غير ما يجيلك الضغط والسكر وماتخسريش علاقتك بيهم كا أم … زي ما شرحنا في الحلقة رقم ٥ من برنامج أستوديو أسلوب… ٦ حيل ذكية للمذاكرة مع الأولاد

والمجال للحاجات اللي محتاجه تتعلميها كا أم… وااااسع جدا… ربنا يكون في عونا والله :simple_smile:

النقطة المهمة اللي هانقول عليها في المبدأ بتاع النهاردة: إن إحنا في أول عصر في التاريخ كله, أي حاجة محتاج تتعلمها مهما كانت, هاتلاقيها على يوتيوب… معمولة في فيديوهات مبهرة

عاوز تتعلم رياضة… موجود على يوتيوب

عاوز تتعلم فوتوشوب.. رسم … تلوين.. ديكور … تمثيل… مذاكرة… خياطة…. موجود على يوتيوب

عاوز تتعلم تبقى عفريت… مممم… يبقى تتفرج على قناة أسلوب على يوتيوب

اللي هايميزك عن غيرك… هو معرفتك ووعيك وتعليمك

علشان تتقن أي عمل… لازم تكون ملم بكل المعلومات الخاصة بيه علشان تتميز في العمل ده… وتقدر تنجزه بطريقة أسرع وكمان أفضل من أي حد تاني

تعليمك المستمر, هايزود عندك ثقتك في نفسك

وهايخليك تحب شغلك أكتر

وبالتالي هاتقدر تبدع فيه

هووم ورك الحلقة…

كل واحد فينا يكتب إيه الحاجة اللي هو عاوز يتعلمها… وكلنا نرد على بعض بمصادر ممكن نتعلم بيها الحاجات دي

معظم متابعين أسلوب عندهم خبرات كتيرة جدا ومهارات كتيرة… ياريت كلنا نرد على تعليقات وأسئلة بعض… ونستفاد كلنا من علم ومهارات بعض

وإنت طبعا مش محتاج عزومةتشششش (صوت مياااه)… إححححم… أنا كنت بقول إيه… آه… إنت طبعا مش محتاج عزومة  علشان تعمل سابسكرايب وشير للحلقة.


فيديو تعليم الكتابة السريعة على الكمبيوتر

 


الحلقة صوت فقط على ساوند كلاود: