أيوة أيوة

إنت ميت

أنا جاي النهاردة أستعير كلام ستيف جوبز في أشهر خطبة قالها في تاريخه في حفل تخرج جامعة ستانفورد عام 2005, واللي إتشافت أكتر من ١٠٠ مليون مرة وإترجمت لمعظم لغات العالم

ستيف جوبز قرأ وهو شاب عنده ١٧ سنة مقولة بتقول:

لو عشت كل يوم كأنه هو أخر يوم في حياتك

هايجي يوم, وتكون فعلا على حق…

هايجي يوم ويكون هو آخر يوم في حياتك

سيتف جوبز بيقول: المقولة دي غيرت حياتي كلها

بقيت باجي كل يوم الصبح وأبص لنفسي في المرايا

وأقول: النهاردة آخر يوم في حياتي… يا ترى هاعمل اللي أنا هاعمله النهاردة؟

ولما الإجابة كانت بتكون “لأه” أكتر من يوم… كان بيعرف إنه لازم يتغير

لأنه هايجي يوم … وهايكون فعلا آخر يوم في حياتي

ومش معقول هاعيش حياة عادية وأنا عارف إني ميت

و هو قال كمان: إني بفكر نفسي كل يوم إني هاموت هاموت

دي كانت أقوى أداة في حياتي سهلتلي إني أختار أصعب الإختيارات في حياتي

سهلتلي إني أختار أعيش حياة كبيرة أوي… ولا أعيش حياة صغيرة أحاول أرضي فيها الناس

كل المخاوف اللي بنهرب منها طول حياتنا… بتختفي نهائيا لما نفهم إن إحنا في حياة منتهية

أي خوف من أي فشل

أي خوف من أي ألم

أي خوف من إحراج أمام أي حد مهما كان

مفيش حاجة في الكون كله تستحق إنك تتهز لحظة أدامها

إنت وأي حاجة بتخاف منها أو بتعمل لها حساب …. منتهيين

لكن… صدقني في فرق

في فرق كبير لما تبقى بتتعامل مع أي موقف في حياتك وإنت فاهم إنك ميت

في فرق كبير أوي لما تكون رايح تعمل حاجة كبيرة في حياتك وإنت مش مهزوز

مش خايف

مش متردد

إيدك مش بتترعش

فرق كبير أوي لما تكون رايح تعمل أي حاجة كبيرة أوي في حياتك وإنت قلبك صلب, ميت, مش خايف ماعندوش أي حاجة ترجعه

عارف القوة دي كلها ليه؟؟؟؟ لأنك مفيش حاجة مهما كانت هاتخسرها

مفيش شخص هاتخسره… .إنت أصلا هاتسيب كل الناس وماشي… واللي مش هاتسيبه… هايسيبك هو

مفيش مشروع ممكن تبدأه هاتخاف من الخسارة….  لأنك كده أو كده مش قاعد … إنت بتعيش وقتك في الحياة وإنت بتعمل اللي إنت بتحبه

مفيش حد هايجبرك تعمل أي حاجة غلط أو حرام علشان الظروف

مفيش واحد صاحبك مهما كان هايقدر يضحك عليك ويقولك تعال إعمل حاجة غلط… وتخاف يطلع شكلك جبان أدامه

هاتقدر إنك ما تخترش حاجة غلط…

هاتقدر لأول مرة في حياتك إنك تقول طزززززززز في أي واحد مهما كان فاكر إنه يقدر يأثر على أي قرار صح أنا باخده بإنه يسفه من أحلامي

هاتبص لكل واحد كنت بتعمل له حساب قبل كده … بس بنظرة مختلفة

هاتبص له وهو صعبان عليك… إنه فاكر إنه قاعد … إنه فاكر إن رأيه ممكن يأثر عليك أبدا

إن إحباطه ليك ممكن يكون ليه واحد على المليون من التأثير

إختياراتك أسهل بكتير أوي صدقني

إختيار إنك تقوم دلوقتي وتعمل الحاجات اللي وراك أسهل و إنت عارف إنها فرصة قبل ما حياتك تنتهي على تفاهة

قبل ما حياتك كلها تكون حياة إستمتاع لحظي

قبل ما حياتك تكون كلها إهتمام برأي الناس

قبل ما حياتك تكون كلها وقت بتضيعه في إنتقام من أي شخص مهما كان إيه اللي عمله

قبل ما تيجي لحظة الموت وتشوف شريط حياتك كله أدامك… مليان تفاهة… و إهتمام إن موبايلك يكون شكله غالي أمام أصحابك… أو إن شنطتك يكون لونها لايق على لون الجزمة أو حساب إنستجرام أو فايسبوك مليان تفاهة أهم عندك من إنك تعيش حياااااة كبييييرة

قبل ماتيجي لحظة موتك…. وتتحسر … ويتكتب لك إنك عيشت حياة… متكررة… عاشها ١٠٠ مليار شخص “عادي” قبل كده

مفيش عندك أي حاجة تخسرها أبدا… إنت كده كده… ميت

مفيش أي سبب يخليك ما تعيش حياة كبييييرة أوي… أكبر من أي خوف من أي فشل

مفيش حاجة أقدر أخاف منها

مش خايف إني أفشل

مش خايف إن شكلي يكون وحش أدام أي شخص

مش خايف إن وظيفة تروح مني علشان بقول لأه لحاجة غلط ومش بكبر فيها دماغي أبدا

مش خايف حتى إني أسيب شغلي اللي باخد منه مرتب علشان أجري ورا حلم هايخليني أعيش حياة أكبر من الحياة نفسها

مش خايف من أي حاجة في الدنيا مهما كانت

أنا كده كده… ميت

إحنا جايين النهاردة في أسلوب نقولك ببساطة إن إنت … ميت

لأن دي أكتر حاجة هاتحررك من أي قيود

ماتحاولش تحافظ على حاجة في مقابل إنك ماتقومش وتغير الحياة كلها

مفيش حاجة هاتتبقى معاك خالص… شيل كل الخوف من جواك… إنت كده كده… ميت

ماتخافش إن شكلك يطلع جبان أدام أصحابك وإنت بتقولهم: أنا مش هاعمل الغلط زيكم

ماتخافش من تأليس حد عليك وإنت ماشي في الطريق الصح وكلهم ماشيين ورا القطيع في الطريق الغلط

طزززززز في كل واحد ماشي ورا القطيع غلط… مالكش دعوة بيه… إنت مش قاعد… إنت ميت… ماتمشيش وراهم

إمشي في الطريق الصح أوي حتى لو لواحدك

ما إنت لما تموت … هاتموت لواحدك

ولما تتحاسب… ها تتحاسب لواحدك

دي أجمل هدية من ربنا والله

إننا نبقى عارفي كويس أوي كلنا إن كل حاجة منتهية

طمئنينة كبيرة أوي… مافيش أي سبب لأي خوف

ماتخافش إنك تفشل… إفشل ميت مرة

ماتخافش إن شكلك يبقى وحش أدام أي حد… خلي شكلك يبقى وحش مليون مرة

خليني أقولك حاجة: مبروك أوي إنك بتسمعني دلوقتي

مبروك أوي إن ربنا بعتلك رسالة تحررك من كل قيودك….  بمعلومة إنت أصلا عارفها لواحدك… بس عمرك ما إستخدمتها… معلومة كلنا عارفينها بس بنحاول نخبيها كأنها مش هاتيجي… كأنها بعد الشر… بالعكس… دي أجمل حاجة … في الحياة كلها

أنا بس… بفكر نفسي وبفكرك

أجمل هدية جاي أوصلها لنفسي وأوصلهالك

أنا وإنت… ميتين… مش قاعدين

خد الهدية دي مني النهاردة… وحرر بيها نفسك

وانا كمان من النهاردة مفيش في قلبي أي خوف

مفيش حاجة أخاف منها

مش خايف من أي حاجة في الكون كله… أنا أكبر قوة خارقة إديتها لنفسي معرفتي إني… ميت

أكبر قوة تخليك عاوز تسيب حاجة كبيرة أوي في الحياة بعدك وإنت ماشي

أكبر قوة تخليك تتخيل آخر دقيقة ليك في الحياة

وإنت بترسم رسمة على وشك وتقول: الحمد لله إن دي حياتي… عشت حياة أكبر من الحياة

أكبر من إني أضيع حياتي في خلافات عائلية

وخناقات على مناصب وأملاك كلها هواء… سراب… أول لم أمسك حاجة منهم… هلاقي الحياة خلاص… إنتهت… وهلاقي نفسي بتحاسب على حاجات عشت خدام عندها طول عمري… وبعدين سيبتها أول لما مت….  جيم أوفر

إسمعني كويس أوي… إنت لاااازممم تسيب حاجة كبيرة أوي وراك

إوعى تعيش حياة صغيرة

عيش حياة كبييييييرة

ماتخافش إنك تجيب درجة وحشة في إمتحان مهما كان…

بس خاف أوي إنك ما تتعلمش صح

خاف أوي إنك ما تعملش المجهود اللي مطلوب منك

خاف أوي إنك تضيع وقتك في تفاهة

خاف أوي إنك تعيش في الضلمة

خاف إنك تخبي معلومات ممكن تساعد أصحابك إنهم ينجحوا

خاف أوي إنك تعيش حياة … قليلة… حياة ندالة

عيش كريم … هي دي الحاجات اللي هاتخلي حياتك أكبر من الحياة

هي دي الحاجات اللي هاتخلي حياتك بتكبر بعدد الناس اللي بتفيدهم

بتعيش حياة بمجموع حياة الناس اللي إنت ساعدتهم

واللي إنت سهلت لهم الحياة

واللي إنت رسمت بسمة على وشهم

واللي إنت طلعتهم من موقف صعب في حياتهم

هاتعيش حياة طولها بطول عمر كل شخص مديت إيدك وساعدته

كل شخص غيرت له حياته…. حتى لو بلمسة بسيطة

حرر نفسك بقى من أي خوف

قوم عيش حياة كبيرة أوي وإعمل المستحيل من غير أي خوف

قوم وذاكر من غير أي خوف من أي فشل…

قوم وإتمرن وإلعب رياضة و خلي جسمك أقوى جسم … مهما كان شكلك و وزنك دلوقتي

قوم وماتضيعش الوقت المحدود أوي اللي هاتعيشه في إنك لسه بتعمل نفس الحاجات اللي نفسك تبطلها

عارف الحاجات الكتيرة أوي أوي اللي نفسك تبطلها وبتفشل؟؟؟

إفتكر بس كده إنك ميت…. هاتلاقي الحاجات دي كلها بقت ولا حاجة أدامك… كلها تقدر تدوس عليها تحت رجلك

إفتكر بس كده إنك ميت… وإنت عمرك ما هاتضيع لحظة واحدة من حياتك في خناقات وخطط وإنتقامات من أي شخص مهما عمل فيك

مفيش وقت تضيعه على فكرة

إنت محتاج تسيب حاجة كبيييرة أوي وراك

إبدأ حياة جديدة من دلوقتي حالا… حياة صح … فيها حلم كبير أوي أكبر من الحياة كلها

إحلم وقرر إنك تسيب حاجة كبيرة أوي

قدوة للناس؟

علم للناس؟

بطولاات وأرقام قياسية

لييييه لأه؟ عندك إيه تخسره؟

سيب حاجة كبيرة وراك

مفيش سبب يخليك تعيش بكرش ماشي مترين أدامك ومستني يختفي لواحده

خايف تتألم؟

قوم يا سيدي وإتألم… دا مفيش ألذ من ألم بيقربك من نجاح كبير

مش هاتعيش حياة كبيرة وتسيب حاجة كبيرة… لو إنت لسه بتفكر تبطل الحاجة الغلط اللي بتعملها دلوقتي… ولا … لسه شوية

مش هاتعيش حياة كبيرة وإنت كل يوم بتقول هابدأ بكرة

مين قالك إن فيه بكرة

إبدأ بس

لما ربنا سبحانه وتعالى حب يطمن الرسول صل الله عليه وسلم قاله:

إنك ميت… وإنهم ميتون

مفيش طمئنينة أكتر من إنك تعرف إن كل الإختبارات اللي إنت فيها دي منتهية

مهما كان الإختبار صعب

مهما كنت محتاج تختار إختيارات صح علشان تفرح لحظة النتيجة

ماتخافش إن شكلك يطلع وحش

ماتخافش حتى من حاجة بتعملها صح بس بالنسبة للناس هي غلط

طزززز في الناس كلها

ماتخافش إنك تبدأ تغير من نفسك للصح

علشان الناس هايقولوا إيه…. طز في الناس

ماتخافش إنك تعمل الخير… علشان الناس ممكن يقولوا بيعمل كده لسبب معين

سيبهم يقولوا… طزززز مليون مرة فيهم… إحمد ربنا إنك مش بتضيع حياتك زيهم في مراقبة حياة شخص تاني

إحمد ربنا إنك هاتعيش حياتك… لحياتك… مش ندورجي على حياة الناس

ماتخبيش حاجة عن نفسك مهما كانت في عين الناس قليلة

يا أخي طزززز في الناس

عيش رافع راسك طالما مش بتعمل حاجة غلط

إوعى تعيش حياتك بتحلم إنك يبقى معاك موبايل معين علشان يبقى شكله غالي أدام الناس

أو عربية شكلها خرافي علشان تبهر الناس

أو أي حاجة مهما كانت علشان الناس

ناس مين… دا إنت لو بتشتغل خدام عندهم مش هاتعمل كل ده علشان تعجبهم

فما بالك بقى ياسيدي وإنت ربنا رازقك ب حرية مولود بيها

قوووم بسرعة….

قوم إنقذ نفسك

إلحق عيش حياتك

وإحنا في أسلوب… معاك في رحلة حياتك

هانقع مرة كلنا مرة… وهانقوم مرتين

وهانقع مرتين… ونقوم تاني

لأنها… فرصة … واحدة … بس!

إعمل متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على #موبايلك #الأندرويد من هنا:
http://bit.ly/osloop-android
وأسلوب #أيفون من هنا:
http://bit.ly/osloop-iOS-eg
وده, #موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife