محتااجين مساعدة
كلنا محتاجين مساعدة
كلنا بلا إستثناء محتاجين شفقة
كلنا كلنا… حتى اللي بيظلمك… محتاج مساعدة وشفقة
حتى اللي بيغلس عليك في البيت أو في الشغل… محتاج مساعدة وشفقة
حتى جيرانك اللي بيغلسوا عليك…. عندهم مشاكل سواء حقيقية أو نفسية أو عقلية, ومحتاجين شفقة
حتى اللي إنت إتخانقت معاه إمبارح وإفتكرت كل حاجة وحشة هو عملها في حياته… هو كمان محتاج مساعدة وشفقة
كلنا والله محتاجين اللي يمد إيده ويساعدنا ويحس بالشفقة والعطف تجاهنا ويسامحنا على اللي عملناه واللي لسه هانعمله
بس المشكلة إن في ناس كتيرة أوي حوالينا لسه ما اتعلموش إنهم يمدوا إيدهم بالمساعدة والشفقة والرحمة… مش علشان هما وحشين… هما بس مفيش حد قالهم إن الحاجة دي بتفرق… هما مفيش حد فكرهم إن الإبتسامة والمسامحة والغفران هايخلونا ناس تانية
يمكن اللي هما اتعلموه إنهم ممكن ياخدوا اللي هما عاوزينه بس بالقوة… بس مش علشان هما وحشين … بالعكس… هما بس لسه ما اتعلموش
علشان كده إنت هنا… علشان كده إنت بتقرأ الكلام ده… علشان كده إن بتتعلم إن الكلمة الحلوة بتفرق… وخصوصا مع اللي غلس عليك قبل كده…. والله بتفرق
الإبتسامة بتفرق …
العفو والسماح بيفرقوا …
العقل والحكمة بيفرقوا …
لما تخترع ٧٠ عذر للي أساء ليك… بتفرق
الكلمة الحلوة بتفرق
والله ياسيدي بتفرق… حتى معاك إنت نفسك
تخيل واحد زعلك أو أساء ليك إمبارح… لقيته النهاردة جاي ويبتسم ويذكر لك الحاجات الكويسة اللي إنت عملتها معاه… مش هاتفرق معاك؟؟؟ أكيد هاتفرق… أكيد هاتعرف إنه بيفهم وبيقدر الحاجات الكويسة اللي عملتها… حتى لو أساء ليك من غير قصد
تخيلي زوجك اللي زعلك إمبارح, جاي يقولك النهاردة… ياما عملتيلي وياما فرحتيني… مش هاتفرق؟؟؟ والله هاتفرق
طيب… هما ليه لسه ما اتحركوش وحسوا على دمهم وجم يقولوا الحقايق دي؟؟؟؟ لأنهم لسه ما اتعلموش
والله العظيم لسه ما اتعلموش… لسه والله… لازم واحد يبدأ … وإنت معانا دلوقتي لازم تبدأ
لازم تفتكر لكل واحد أساء ليك حاجة واحدة كويسة عملها… هاتلاقي والله
خطيبتك اللي مقموصة وزعلانة علشان نمت إمبارح من غير ما تعمل شات معاها ومش راضية تعبرك… مفيش حاجة عملتها لك فرحتك قبل كده؟ يا أخي إفتكر الدباديب طيب
أولادنا اللي سعات كتيرة بننسى أد إيه مانقدرش نستغنى عنهم لحظة واحدة… لكن أوقات كتيرة الحياة بتخلينا نشوف بس المصايب السودة اللي بيعملوها… مش بعد الشر لو حد فيهم حصل له أي حاجة, هاتكون أكبر صدمة في حياتنا ونتمنى إنهم يكونوا كويسين ويطلعوا عينينا حتى!
والدك و والدتك اللي مانعينك عن حاجة إنت عاوزها وزعلان منهم… ياترى في حاجة عملوها كويسة تفتكرها ليهم وتروح تبوس إيديهم ورجليهم دلوقتي؟
الكلمة الحلوة بتفرق والله
والسماح بيفرق والله
والعفو بيفرق والله
ورسالة بسيطة وعبيطة و هبلة على واتس آب أو فايس زفت بتفرق والله
يا أخي… بنقولك بتفرق عالصبح بقى ماتفرفناش عالصبح بخدودك الجميلة دي
يا عمونا بقى …
ها؟ بتفرق ولا مش بتفرق
يالا… صباحك زي وشك الطعم ده عالصبح 🤡 🤡 🤡
إعمل بقى متابعة\سابسكرايب لقناة أسلوب على يوتيوب, علشان توصلك حلقاتنا أول لما تنزل
http://bit.ly/osloop-sub
وكمان نزل برامج أسلوب للأيفون والأندرويد… علشان توصلك جميع حلقات أسلوب بالترتيب الصحيح
نزل أسلوب على #موبايلك #الأندرويد من هنا:
http://bit.ly/osloop-android
وأسلوب #أيفون من هنا:
http://bit.ly/osloop-iOS-eg
وده, #موقع أسلوب:
http://www.osloop.com
وده أسلوب على فايسبوك:
https://www.facebook.com/osloop.life/
وده أسلوب على انستاجرام:
https://www.instagram.com/osloop.life/
وأكيد أسلوب على تويتر:
https://twitter.com/OsloopLife