هل محتاج ثقة بالنفس؟ أنا لها أنا لها وليس أنا مها أنا مها: الحلقة الجديدة من أستوديو أسلوب حلقة ٢٤

https://youtu.be/EzsPuJHmJL8

يا أستاذ ياللي بتقول انا مش واثق من نفسي!

يا أختي الفاضلة اللي بتقولي انا ما عنديش ثقة فى نفسي

يا أعزائي متابعين أسلوب و كل اللي طلب مننا حلقة عن الثقة بالنفس

شاهدوا معي هذه الحلقة عملناها مخصوص علشانكم!

 

أهلاً بيكم في حلقة جديدة من استديو أسلوب …  

فيه اسئلة بتدور في دماغ كل شخص نفسه يبقى واثق في نفسه ..او في مقولة اخري واثق من نفسه

هي الثقة بالنفس ديه حاجة بالفطرة ولا مهارة تكتسب و نقدر ننميها فى شخصيتنا؟ ؟؟

و هل من الممكن يبقى في شخص واثق في نفسه و يفشل ؟؟

أحب ابشركم ان الثقة بالنفس ديه زي الكتابة و الكلام كده .. محدش فينا اتولد بيعرف يكتب أو يتكلم .. لكن أهلنا علمونا و بنوا فينا المهارات ديه بقينا نسمعهم و هما بيتكلموا فاتعلمنا مهارة الكلام وودونا مدارس فاتعلمنا الكتابة .. الثقة بالنفس زيهم بالضبط .. أكيد الثقة بالنفس ديه مش بزرار سحري مثلاً !! لكن هي مهارة أو عادة بنبنيها في نفسنا و نراسخها جوانا علي مدار الوقت و من خلال مواقف كثيرة في حياتنا و ممكن كمان الاشخاص اللي حوالينا اللي عندهم ثقة بنفسهم يأثروا علينا كمان و يخلونا احنا كمان دون ما نشعر بقي عندنا ثقة بنفسنا.. طيب ما معني انك تكون واثق من نفسك؟ يعني امتي تقول علي فلان  انه بيتميز انه واثق من نفسه! 

تسمع قبل كده عن جملة

“going for it attitude’؟

مش محتاج تجوجل ترانسليت 

هقولك يعني بالبلدي كده معناها  ” انا لها” يعني لما يتطلب منك حاجة تقول ” انا لها” سمعوني كده لما حد يطلب منك شغل او انك تجاوب علي سؤال قدام زمايلك او تتكلف باي عمل هتقول ايه؟

أسلوبي: “انا مهاااااا”

بالضبط!!! “ايه انا مها لا مها زمانها بتذاكر دلوقتي عندهم امتحان بكرة….

سمعتني غلط يا أسلوب, انا بقول “انا لها”

 

 لما تبدأ انت من نفسك في تشجيع نفسك و تشحن نفسك كلام ايجابي … كلام يزود ثقتك في نفسك كلام زي : انا اقدر” .او “انا لها” …. كفاية احباط وبلاش كلمة” انا فاشل” اللي بترددها كل شوية و تسمعها لنفسك كل شوية!

 

 طيب سؤال يطرح نفسه: ليه في ناس عندها ثقة بالنفس و ناس معندهاش ثقة في نفسها خالص ؟؟ 

ده لأن الناس اللي عندها ثقة في نفسها اتعلموا من مواقف تعرضوا لها  فى حياتهم و اتكررت عليهم كذا مرة لحد ما فهموا و قدروا يبنوا ثقة بنفسهم اكتر و بالتكرار أصبح التعامل مع المواقف دي اسهل. 

و كل ما الحاجة بتتسهل و بتكون اسهل كل ما تعاملتنا بيكون فيها ثقة اكثر.

يعني مثلا لو لسه متعين مدرس جديد هتلاقي اول حصة بالنسبة لك صعبة جدا و مش عارف تكتب علي السبورة و لا تشرح بنبرة صوت قوية و لل تسيطر علي الاولاد. بس اول لما تعدي كذا حصة و تتعرض للموقف ده كذا مرة هتلا قي نفسك ازدت خبرة فى التعامل مع الطلبة و في فن التدريس كمهارة فى حد ذاتها

 

وكمان حاجة تانية ،ستلاحظ ان معظم الناس اللي واثقة من نفسها هما أكتر ناس أتعرضوا للرفض و الضغط و الفشل و المواقف دي قوت مناعتهم.. بس للاسف مش كل الناس تقدر تعمل ده ..
يعني في ناس تقدر تتعلم من فشلها و تصبح اكثر قوة فى كل مرة تفشل فيها  و علي رأي المثل ” الضربة اللي متموتش بتقوي”

 

ما تيجوا نقول شوية مواقف من اللي بنتعرض لها بتخلينا مهزوزين و خايفين  و ماةعندناش ثقة بنفسنا و نشوف ممكن نتصرف فيها ازاي ؟؟ 

 

طبعاُ الموقف الشهير اللي كل أعزائي الطلبة بيتعرضوا له … هو الخوف من ان المدرس أو الدكتور يسألنا في المحاضرة أو فى الفصل وسط زمايلنا.. و ساعتها وشنا بيقلب أصفر و أخضر و كل الألوان .. و نفضل نقول ” لا لا يا رب ما يسألني ”  … و هوب تنزل تربط رباط الكوتشي
طب هو انت خايف من ايه ؟؟ انك تغلط !! .. طب ما تغلط ..
اومال هتتعلم ازاي ؟؟ ما انت لازم تغلط مرة و اثنين عشان تفتكر انت غلط في ايه و صدقني عمرك ما هتنسي الاجابة ثاني أبداً .

 
و في برضه موقف عصيب و هو ساعة الانترفيو لأي وظيفة  … معظم الناس بتكون متوترة و خايفة و بصه في الأرض من الخوف و صوتهم مش طالع .. و ده بيكون أول سبب انهم يترفضوا….معروف ان الانسان اللي ثقته في نفسه مهزوزة دائماً بيخاف من تحمل المسؤولية ..

 

.لازم هنا تعرف ان الانترفيو ده تحديد لشخصيتك اللي بتتعامل بيها في الشغل فأكيد لازم تبين انك واثق من نفسك وعندك

” going for it attitude

“انا لها” 

 

فيه كمان طريقة تقدر تنمي بيها الثقة بنفسك و هي

  الaffirmation

أو الجمل التأكيدية اللي بنقولها و نكررارها لنفسنا

فاكرين فيلم فؤاد المهندس(اسم الفيلم) 

“انا مش قصيراوزعة انا طويل و اهبل”؟ الموقف كان كوميدي جدا وكلنا ضحكنا عليه. لكن الرسالة وراه رسالة مهمة جدا جدا و حقيقية 

الجمل اللي بتوصف بيها نفسك وهويتك و الاطار اللي انت بتحطه حولين نفسك و شخصيتك مهمة جدا!

و بتأثر علي ثقتك بنفسك بدرجة كبيرة جدا

يعني لو قلت لنفسك مثلا ” انا تركيزي فى المذاكرة ضعيف”

او أنا اصلي مش بعرف اتحكم فى غضبي او انا عصبي

او انا بتكسف

او انا ذاكرتي ضعيفة 

و هكذا

كلها جمل بنوصف بيها هويتنا او شخصيتنا و نكرارها دايما علي نفسنا و قدام الناس

و الوصف ده بيلزق ومش بيروح و عمرنا ما بنحاول نغيره فينا لاننا مش بنعرف نغير المعتقدات ديو بنعتبر ان دي خلقتنا. علشان كده تغيير شخصيتنا للاحسن بيكون صعب!

 

و العكس صحيح …انت لو قلت علي نفسك كلام حلو زي

“انا باخد الامور ببساطة”

” انا بحب اتعلم”

“انا سريع فى الشغل”

“انا ذاكرتي قوية”

“انا ذكية”

“انا مش بستسلم بسرعة”

“انا صاحب صحبه”

“انا مش بحب اتكلم عن حد وحش”

كلها تاكيدات حلوة بنوصف بيها شخصيتنا و بنصدقها علي نفسنا و بنحاول علي قد ما نقدر اننا نثبتها و نراسخها فينا بافعالنا كمان قدام الناس

 

مهم اوي انك تسمع نفسك دايما و  تكرر عليها مميزاتك و الحاجات الحلوة اللي فيك في جمل توصف بيها نفسك للناس و لنفسك قبل الناس.

 

مثال كمان مهم جدا 

الاذكار

ربنا له حكمة فى ان الاذكار تتقال باعداد معينة مش مجرد ان الذكر بيتقال مرة واحدة فقط

و ده لان تكرار الذكر بيرسخ و ياكد معناه فى نفوسنا كبشر و فى غذاء اروحنا

علشان كده تكرار الذكر اهم من انك تقوله مرة واحدة!

 

و في نوع ثاني خالص بقي من عدم الثقة في النفس .. و هو المقارنة بالآخرين …
في ناس عايشة علي مقارنة نفسها بالاخرين و بس .. ازاي الكلام ده ؟؟
يعني ازاي أنا يبقي معايا موبايل أقل من فلانة  ؟؟ انا كده الناس تقول عليا ايه ؟؟
و لا لا ازااااااي يعني تبقي لابسة أحسن مني ؟؟ انا كده شكلي وحش ..
و لا ازاي هو في وظيفة أحسن مني .. و ديه  أرفع مني .. .. لا ديه مخطوبة و انا لا .. و مقارنة مقارنة مقارنة و بس ..

هل انت بقي بعد ما قارنت نفسك بيهم .. .. بقي عندك ثقة في نفسك ؟؟
طبعاً لا .. كفاية مقارنة بغيرك .. وارضي بالواقع .. سواء أهلك بيتك شغلك لبسك شكلك .. أكيد مفيش مانع انك تتغير للأحسن بس مش عشان فلان مايبقاش أحسن منك .. لأ .. عشان انت عايز التغيير ده و في صالحك .. 

نقطة أخيرة   الثقة بالنفس مش معناها ابدا انك تدعي انك تقدر تعمل حاجة انت فى الاساس ما بتعرفش تعملها..

يعني ماينفعش تكون في  مركب و تغرق و انت مابتعرفش تعوم و تقول لا انا واثق في نفسي مش مهم السباحة .. أكيد هتغرق ..و ما ينفعش تدعي أنك بتعرف مثلا تتكلم إنجليزي كويس لان ده بس لانك واثق من نفسك و فجأة يتفاجأوا بيك فى الشغل و انت بتتكلم انجليزي ببراعة يا ما شاء الله

 

( انجليزي ده يا مرسي)!!
ممكن تدي الثقة لنفسك انك هتقدر تتعلم فى وقت سريع لكن مش تدعي او تزعم انك بتتقن مهارة مش عندك.

و اخيرا  مهم انك تكون واثق في نفسك و في مجهودك و في شغلك بس الاهم من كل ده ان يكون عندك حسن الظن بالله .. لو كل ده من غير حسن الظن بالله و انك تتوكل على الله .. صدقني مش هتكمل .. احنا من غير توفيق ربنا ولا حاجة .. فقول الحمد لله علي النعم اللي عندك  

 

و افتكر دائماً .. ان محدش هيؤمن بيك و يصدقك .. إلا إذا آمنت أنت  بنفسك الأول
أتمنى تكونوا استفدتوا من الحلقة ديه .. اكتبوا لنا فى كومنتس ايه المواقف اللي اعترضوا ليها قبل كده و ما كنش عندكم ثقة بالنفس
أشوفكم في حلقة جديدة من أستديو أسلوب

https://youtu.be/EzsPuJHmJL8