السلام عليكم … وأهلا بيكم في الحلقة رقم ١١ من برنامج أسلوب في رمضان 

وبعد ١٠ أيام صيام…. تقبل الله منا ومنكم صالح الأعمال, ورزقنا الله وإياكم الإخلاص

حلقة النهاردة بعنوان: إضغط pause – وقف حياتك

النهاردة… ولأهمية الموضوع ولجديته, هانبدأ الحلقة بالتوضيح الهام ده

قناة أسلوب, ومحتوى قناة أسلوب, وحلقات قناة أسلوب كلها, الهدف الوحيد منها, هي إن كل واحد فينا بعد لما يتفرج على حلقة… يخرج منها وهو بيتحرك خطوة في إتجاه إنه يكون إنسان أفضل, … إنسان أكتر سعادة و وأكثر إنتاجية ورقي

إنسان متصالح مع نفسه… فاهم نفسه بتفكر إزاي… بيتعامل مع الشخص اللي جواه و هو فاهم إزاي ينجحوا ويعيشوا حياة سعيدة إن شاء الله مع بعض…

أيوه… كل واحد فينا من جوه نفسه… ومن بره نفسه… يكونوا متصالحين مع بعض… يكون الشخص اللي جوه, هو اللي عايش فعلا بره أدام الناس

 ويكون كل واحد فينا مستعد إن لحظة موته… يفتكر حياته كلها في ثانية سريعة … ويبتسم ويقول… الحمد لله… الحمد لله الذي رزقني العمل والإجتهاد والخير اللي أنا نشرته في الحياة

كل واحد فينا لازم يكون مدرك و واعي للمعنى ده… وكل واحد فينا مدرك إدراك حقيقي إن إحنا ماشيين في طريقنا علشان نوصل لنقطة نهاية… هايكون بعدها البداية الحقيقية

وعلشان النتيجة دي تتحقق, لازم يكون كل واحد فينا واعي كويس … ومدرك كويس أوي, إنه مش بيتفرج على برامج وحلقات أسلوب,  علشان يشوف الناس وهي بتتغير

لازم كل واحد فينا يكون مدرك حقيقة… إن إحنا مع بعض في رحلة نجاح حقيقية… مش علشان نشوف باقي الناس هاتنجح إزاي… ولا نوع من أنواع التسلية أو حتى مشاهدة محتوى راقي بدون المشاركة

إنت دلوقتي وقبل ما تكمل الحلقة, لازم تقف مع نفسك لحظة… وتختار إختيار من إتنين

١- الإختيار الأول هو إنك تكمل متابعة … وتكون مدرك وواعي إن إنت محتاج تقف مع نفسك … وتقرر إن تكلمة المشوار ده هو قرارك اللي إنت فعلا عاوزه ومحتاجه

وإن ده إختيارك… وتكون موافق إنك تنفذ الخطوات البسيطة جدا اللي بتكون في كل حلقة من حلقات برامج أسلوب… ونكون كلنا جزء من رحلة نجاح حقيقية مع بعض

٢- أو الإختيار التاني هو إنك ما تضيعش وقتك ومجهودك وباقتك الجميلة في إن إنت تتفرج على حاجة ملهاش لازمة في حياتك… ده لو كانت الحلقات للمشاهدة والتسلية.

وقف الفيديو دلوقتي…. فكر على ورق … وإحنا هاننتظرك تفكر براحتك

(الفيديو هايقف لمدة ٥ أو ١٠ ثواني على مشهد إختيار….مع وجود إختيارين… إختيار للتكملة… وإختيار إنه يقفل الفيديو)

الحمد لله…. أهلا بيك 🙂 

بجد إحنا سعداء بيك جدا…  إحنا سعداء إن إنت قررت تكمل معانا و تركب معانا أتوبيس النجاح ده

صحيح الأوتوبيس زحمة… لكن هو ده جمال النجاح

جمال النجاح… لما يكون معاك ناس كتيرة عندهم نفس الجوع للنجاح… كلنا هانشجع بعض

صحيح إحنا عارفين إن ناس كتييييرة أوي ما وقفتش الفيديو… وفضلت تتفرج من غير ما توقف الفيديو… لكن مفيش مشكلة… ما إحنا عارفينك كويس

وعارفين إن إنت بالذات… واحد من الناس اللي ما وقفتش الفيديو… لكن أكيد السبب… هو إن إنت عندك حلم نجاح وسعادة في الحياة… ومفيش سبب يخليك ما تكملش المشوار…

لكن…… هانقولك… وإنت بتتفرج على الفيديو ده المرة اللي جاية إن شاء الله… لأنك لازم تفضل ترجع للفيديو ده كتييييير أوي… علشان هاتحتاج وقفات كتيييرة أوي… ولما نيجي عند النقطة اللي بنقولك فيها وقف الفيديو وقرر… إبقى وقف الفيديو بجد… و أقف مع نفسك وقفة بجد… 

سامعك وإنت بتقول: مش كل مرة يعني يا #أسلوب

هانقولك: كل مرة …. كل مرة …. كل مرة… لازم توقف

وبنوعدك إن إحنا كمان هانعمل زيك

لأننا كلنا محتاجين بجد نضغط على زرار التوقيف علشان نوقف حياتنا دقايق قليلة

نضغط على زرار pause … لأن حياتنا لازم تترتب الأول

ولما نقرر نكمل الحياة بعد لما نضغط على زرار تشغيل الحياة تاني… ساعتها هانبقى زي الكمبيوتر اللي عمل ريستارت

هايشتغل من جديد على نضافة… طاقة جديدة … صفاء عقلي وروحي

حلقة مملة … صح؟

إنت بتقول كده بس دلوقتي… علشان ماشوفتش حاجة لسه… إنما الملل الحقيقي… لسه جاي في الطريق…. زودلي الملل هنا لو سمحت يا معلم (صوت تخين كأن بيطلب من قهوة مع صوت قهوة شعبية كا مؤثر صوتي)

طيب… هات بقى كراستك اللي إتفقنا عليها, بتاعة برنامج أسلوب في رمضان… وإكتب معايا

ولو ما كنتش لسه جبت كراسة… إكتب في أي بطيخ دلوقتي… وتيجي حلقة بكرة ومعاك كراسة ضروري

إكتب في الكراسة… الأسئلة دي:

١- لازم أحدد الحاجات اللي عاوز أعملها من النهاردة لغاية آخر يوم في السنة

٢- لازم أحط أولويات … مين الأهم… ومين الأقل أهمية

٣- …. إستنى بس يا كبير… قبل ما نقول تلاته ومش تلاتة

هو إنت بتكتب معانا… ولاااااا… إيه الكلمات بالظبط…. هو علشان إحنا جوه الفيديو…يبقى مش شايفينك ولا إيه؟؟

إكتب يا كبير… من تاااااني… علشان التكرار: فوايد جد…  مش هزاااار

١- لازم أحدد الحاجات اللي عاوز أعملها من النهاردة لغاية آخر يوم في السنة

٢- لازم أحط أولويات … مين الأهم… ومين الأقل أهمية

٣- أنا بشوف الحلقة دي, وبكتب دلوقتي علشان دي فرصة إني أوقف حياتي… وأفكر على ورق أبيض … وأبدأ تفكير صافي

٤- إيه القرار اللي محتاج تاخده بقالك فترة… وقاعد تفكر وتأجل وتسوف بقالك فترة؟؟؟؟؟

بعد لما تكتب الحاجات اللي فوق دول, إعرف إن واجب الحلقة, هو إنك تضغط على زارر Pause لحياتك

تجاوب على النقط اللي كتبتها

وبعدها تروح بنفس الورق والقلم اللي معاك دول, وتتفرج على الحلقة رقم ٤ من برنامج: أستوديو أسلوب بعنوان: 

 ٧ خطوات لتحديد وتحقيق أهدافك في الحياة

وماتخرجش من الحلقة غير لما تكون عارف إنت محتاج تروح فين

وإكتبلنا دلوقتي إقتراحاتك للحلقات اللي جاية في برامجنا كلها عموما

وشارك الحلقة دي لكل واحد…. محتاج إنه يعمل ريستارت لحياته

ورمضان… كريم

بيييس أوت