الدعاء – تجربة حقيقية مع الدعاء – برنامج فكرة من حلقة 5
أنا عندي سر وجاي أقولكم عليه النهاردة
الدعاء بيستجاب
سامعك وإنت بتقول …. إممم … ماشي… ما إحنا عارفين… بس إيه اللي يخليني أسمع منك “إنت!” عن إستجابة الدعاء… أنا هاروح أسمعها من الدكتور العريفي أو من د.عائض القرني… مش هاسمع حاجة عن الدعاء من واحد ناكش شعره
هاقوك معاك حق… بس أنا هاحكيلك عن طريقة أنا إتعلمتها بجد… وبفضل الله… الدعاء بيسجاب في حاجات مستحيلة … وبطبقها طول عمري… وبفضل الله بتنجح
تعالى أقولك قصتي مع الدعاء
الموضوع بدأ وأنا في ثانوي… كنت بدعي إني أجيب مجموع معين … وآدخل كلية معينة أنا بحلم بيها
سامعك وإنت بتبرطم… ماهو كل الناس بتدعي ياعم الصداع… حتى اللي بيسقطوا وبيعيدوا السنة…. كانو مموتين نفسهم دعاء ليلة الإمتحان… وسقطوا
هاقوك… ماهي الطريقة دي في الدعاء… بتشتغل معايا لما أبدأها من أول المشوار
أنا كنت في ثانوي… في أول السنة عاوز أجيب مجموع يدخلني كلية معينة بمجموع عالي جدا
ربنا رزقني قبل ما السنة تبدأ… إني أدعي وأدعي وأدعي إنه يوفقني إني أبدأ السنة مع مدرسين كويسين… وكنت بدعي بشروط الدعاء… اللي أهمها اليقين و…. الللل … آه… أقولك… الحاجات دي روح إسمعها من دعاتنا الكرام… مش سكتي دي… خليني أكملك
وبعدين… لما أروح كل درس… كنت أدعي إني أفهم الدرس وأركز فيه
وأنا مروح… أدعي إن ربنا يرزقني لما أروح البيت إني أذاكر ويحببني في وقت المذاكرة
ولما كنت أبقى عاوز أنام… كنت أدعي إن ربنا يرزقني إني أضغط على نفسي شوية في المذاكرة
وكنت أدعي إني أصحى بدري ومركز… … كنت بدعي بكل تفصيل لواحده … والجميل جدا إن الدعاء نفسه عبادة … ومش أي عبادة… دي ألذ عبادة في الكون لما تطلب من الكريم صاحب الكون
… يعني حضرتك تطلب من الكريم… وتاخد ثواب على طلبك… يا باختك يا آخي والله… يا بختك إنك عبد للكريم والله
يعني تدعي إن ربنا يوفقك لكل عمل إنك تعمله كويس
أنا طبعا كنت بدعي إن ربنا يحققلي نتيجة لكل عمل… بس باب الخير الكبيييير جدا اللي جالي… إن ربنا وفقني إني أتعلم إني أدعي… إنه يوفقني للعمل
يعني ربنا يوفقني إني أذكر… مش بس أدعي إني أجيب نتيجة
بدعي إن ربنا يحببني في وقت المذاكرة…. مش بدعي إني أخلص من المذاكرة بقى
الدعاء إن ربنا يرزقك العمل
الجميل جدا جدا إن مفيش مرة أبدا كنت بدعي إن ربنا يرزقني العمل… إلا وفعلا ربنا وفقني للعمل
لما كنت بدعي إن ربنا يرزقني نتيجة من غير ما أدعي إني أعمل لها… مممم الطريقة ماكنتش بتنجح
الطريقة دي أنا إتأكدت منها لما ناس كتير قالولي عليها وهما مش في دماغهم
أعرف واحد كان عنده صعوبة شديدة جدا إنه يصلي في المسجد… بس لما كان الأذان يأذن… يدعي ويدعي إن ربنا يرزقه إنه ينزل يصلي في المسجد… وكان المستحيل بيحصل… بيلاقي قلبه بيشده من هدومه وبيسبقه على المسجد
الطريقة دي فضلت ماشي عليها طول حياتي… و والله العظيم حققت معايا جميع المستحيلات اللي قابلتها في حياتي وكان ربنا موفقني إني أدعي
والحمد لله… أنا لما حد بيسألني… إنت إيه دليك المادي اللي وصلك إن: لا إلاه إلا الله, وأن محمد رسول الله… قلبي وعقلي والله العظيم بيصرخوا في نفس الوقت… إجابة ربنا للدعاء إجابة ربنا للدعاء
طيب إيه المشكلة؟… ماتدعي يا عم… حد ماسكك
هي الفكرة بس… إن ربنا يلهمك إنك تدعي… والله لو ربنا رزقك إنك تدعي… يبقى ماتشيلش هم الإجابة
أقولك على سر تاني أنا بعمله… أنا بدعي دايما إن ربنا يرزقني إني أدعيه … وكمان بدعي دايما إن ربنا يذكرني بكل دعوة دعيتها عندما يستجيبها ليا
وبدعيلك دلوقتي إن الكلام ده يدخل قلبك… لأنه والله غير ليا حياتي كلها
انا أيضاً عندي سر انو عندما تدعو الله وانت على يقين تام بالاستجابة فسيستجيب الله لدعاءك لان الله قال انا عند ظني عبدي بي فإذا كان لديك حسن الظن في الله فأنت مؤمن بالذي طلبته و ان الله مع المؤمنين وإذا الله معك فمن عليك فبنية صالحة و دعاء واضح وحسن ظن بالله ويقين بالاستجابة ما فيه مستحيل
وانا أدعو الله ان يوفقكم في رسالتكم حقاً حقاً كُنْتُمْ من أسباب تغيري ولا تزالو جازاكم الله خيرا
اناعاجبني اوي طريقة التقديم للمعلومة و انا لسه شايفة الفيديوهات دي امبارح بقيت بحب كل شوية اتفرج انا بس عندي سؤال ممكن اعرف ايه اسم البرنامج اللي بتستخدموا في الفيديو ؟
7 Responses to “الدعاء – تجربة حقيقية مع الدعاء – برنامج فكرة من حلقة 5”
ربنا يقويني علىنفسي جسمي اشعر وانا بقرأ الكلام
انا أيضاً عندي سر انو عندما تدعو الله وانت على يقين تام بالاستجابة فسيستجيب الله لدعاءك لان الله قال انا عند ظني عبدي بي فإذا كان لديك حسن الظن في الله فأنت مؤمن بالذي طلبته و ان الله مع المؤمنين وإذا الله معك فمن عليك فبنية صالحة و دعاء واضح وحسن ظن بالله ويقين بالاستجابة ما فيه مستحيل
وانا أدعو الله ان يوفقكم في رسالتكم حقاً حقاً كُنْتُمْ من أسباب تغيري ولا تزالو جازاكم الله خيرا
ربنا يبارك فيكم ، و فعلا نصيحتك حلوة و مجدية جدا ، و انا الحمدلله في كل خطوة فحياتي بطبقها و الحمممدلله ربنا موفقني في شتى امور حياتي جدا☺😊💜
بجد انا محتاجه كلامك ده وراح اطبقوا كلامك جدا جميل ودخل قلبي وحسيت زي عندي حاجة ضايعه ولقيتها يديك العافيه
اناعاجبني اوي طريقة التقديم للمعلومة و انا لسه شايفة الفيديوهات دي امبارح بقيت بحب كل شوية اتفرج انا بس عندي سؤال ممكن اعرف ايه اسم البرنامج اللي بتستخدموا في الفيديو ؟
انا ايضا مجربه الدعاء..
شو ما كانت الصعوبات التي بتواجهك الدعاء له قدرات عجيبه …
الحمدلله ان رزقنا نعمة الدعاء والاستجابه…واﻻ لكنا ف ضياع نتخبط في امواج الحياة….
فقط ثقو بالله…
امين