أهلا بيكم في الحلقة رقم ٨ من برنامج أفكار أسلوب
و حلقة بعنوان :المذاكرة في زمن المكرونة
الوضح الحالي:
حضرتك و سيادتك وجنابك, محبوس في البيت زي حلاتي
وبتغسل إيدك بالصابون كل شوية
وعندك مذاكرة
و مفيش مدرسة ولا دروس
و ممكن تفتح الكتاب و تذاكر المناهج من أول السنة, و لأول مرة في تاريخ السنوات الدراسية, تقدر فعلا تجمع مذاكرة السنة كاملة, وتقدر تقعد تتسلى و تستمتع فعلا بالمذاكرة و الكتابة و التكرار و الرسم و التلوين و عمل ملخصات
مفيش حاجة وراك
و مش هاكذب, أنا لاحظت إن في ناس كتيرة جدا عملت كده بالفعل
لكن, عن كل الناس دول, إنت بالتحديد, لسه ما عملتش كده
لأنك, منتظر حد يجي ويقولك: يالا بينا نبدأ مع بعض
خصوصا لما يكون واحد أناني زي حلاتي, ومش راضي يوقف شغل على مشاريع أنيميشن قاعد يعملها, حتى و هو بيقدم حلقة أفكار أسلوب.
بس هاقولك بجد: يالا بينا نبدأ مع بعض
الفراغ اللي إحنا فيه حاليا, هو ضرر إقتصادي كبير جدا لناس كتيرة أوي …
لكن كمان هو فرصة كبيرة جدا لكل واحد ذكي هايقرر إنه يخرج كسبان من الكام أسبوع اللي إحنا محبوسين فيهم دول
بالنسبة للمذاكرة والدراسة والإنتاجية عموما في الوقت المختلف اللي إحنا عايشين فيه ده, محتاج خطوات محددة
هاتحتاج تكتبها معايا بورقة و قلم
الخطوة الأولى: راقب وقتك … راقب وقتك في جدول
لازم تراقب وقتك
خصوصا في الوقت اللي مفيش عليه أي رقابة
لازم تجيب ورقة وقلم, وتسطرها, و تكتب:
الوقت من:
الوقت إلى:
وكنت بتعمل إيه في الوقت ده بالظبط
دي أكتر نصيحة فرقت معايا في حياتي كلها من أول مرة نفذتها فيها, واللي والله مش بوقفها ولا يوم أبدا
و خصوصا, في الأيام اللي زي اللي إحنا فيها دي
مفيش وقت محدد للمذاكرة ولا للأخبار ولا لليوتيوب و الفايسبوك والسوشيال ميديا
لازم تراقب وقتك فورا
و إبدأ من أول دلوقتي حالا
شوف إنت بدأت تتفرج على الحلقة دي إمتى بالظبط
وإكتب: من الساعة ٨ بالليل مثلا للساعة ١٢ بالليل, ٤ ساعات بتفرج على النصف الأول من الحلقة الجديدة من برنامج أفكار أسلوب
و إكتب كل حاجة بتعملها في اليوم
صلاة
مذاكرة
يوتيوب
فايسبوك
أكل
شرب
حاجات كويسة
حاجات مش كويسة
إبدأ حالا في الخطوة دي و شوف بنفسك
و طبعا هي دي النصيحة الدائمة اللي بننصحها في تنظيم و إدارة الوقت
وهي دي النصيحة اللي هافضل أنصحك بيها طوال العمر لغاية لما تزهق مني. و تقوم تنفذها دلوقتي فورا
قبل ما تكمل الفيديو, وقبل حتى ما تسمع الخطوة التانية, هات كراسة و إبدأ راقب. وقتك من دلوقتي حالا … و لما تخلص … إنقل لللخطوة التانية.
الخطوة التانية للمذاكرة في الوقت اللي إحنا فيه ده:
إكتب أسماء المواد بتاعتك في خريطة ذهنية
يعني دايرة في النصف
و خارج منها أسهم بأسماء المواد
والهدف من الخطوة دي بالتحديد, هي إنك تبدأ تحصر كل اللي مطلوب منك في الدراسة
و تخللي عقلك الواعي يقدر يحط خريطة لكل مادة.
الخطوة التالته:
بعد لما كتبت أسماء المواد في الخريطة الذهنية
إبدأ كمل تفرعات الخريطة الذهنية دي لكل مادة في نفس الخريطة الأساسية
كل مادة هاتكون مختلفة في التفرعات اللي خارجة منها
مثلا:
مادة اللغة العربية, ممكن يخرج منها
النصوص
الأدب
البلاغة
القصة
النحو
… العناوين الأساسية
مادة الرياضيات ممكن مثلا تقسمها إما على حسب الفصول, واسم كل فصل
أو لو عندك مثلا الرياضيات مقسمة لأجزاء كبيرة زي جبر و هندسة و حساب مثلثات
المهم, كل مادة, وهاتكتب فيها العنواين الأساسية فقط
ممكن تكون لاحظت إننا معتمدين على إنك عندك وقت كبير تقدر تستثمره في بداية السيطرة الكاملة على المناهج بتاعتك, ومش كالعادة بتجري ورا الدروس درس درس زي ما كنت بتعمل أيام الدراسة العادية
الخطوة الرابعة, كل مادة, هاتعمل لها خريطة ذهنية منفصلة, في صفحة خاصة بيها
يعني مثلا لو عندك مادة دراسات إجتماعية, هاتعمل لها صفحة خريطة ذهنية خاصة بها
و هاتخرج منها اسم كل وحدة
الوحدة الأولى: المناخ
الوحدة الثانية: الأخطار الطبيعية
الوحدة الثالثة: الخلافة: زمن الأمويين والعباسيين
الوحدة الرابعة: مصر حتى عصر المماليك
الوحدة الخامسة: قيمنا الاسلامية والمواطنة الصالحة
طبعا هاتعمل الخريطة الذهنية دي لكل مادة
و بكل تأكيد, مش هاتعمل كل الخرايط الذهنية بتاعة كل المواد في نفس الوقت بالظبط,
تقدر تبدأ في المواد المهمة بالنسبة لك, وكل مادة الخريطة الذهنية بتاعتها تقدر تبدأ فيها في الوقت اللي هاتذكرها فيه
مرة تانية – الخطوات دي الهدف الأساسي منها هي إن عقلك الواعي يقدر يبدأ يرسم خريطة لكل مادة و يبدأ يتخيل أول المادة فين و آخر المادة فين
و اللي إحنا بنتعلمه ده هو طريقة السيطرة الكاملة على المناهج, مش طريقة لشخص عاوز ينجح بمجموع ٥٠٪
دي طريقة واحد عاوز يكون مسيطر سيطرة كاملة على كل مادة و عارف أولها و آخرها فين
الخطوة الخامسة:
تمسك بقى فرع محدد من المادة بتاعتك, وتبدأ تذاكر فيها, بالطرق الكتيرة اللي إتكلمنا عنها في حلقات كتيرة من حلقات المذاكرة من أسلوب
أن عن نفسي, و حتى وقتنا هذا, مدمن إدمان شديد لبدأ مذاكرة أي مادة أو أي فصل أو أي درس, بإني أبدأ أكتب الدرس على ورق, لغاية لما آلاقي نفسي دخلت في موود التركيز الكامل في المادة
الخطوة السادسة:
دخل نفسك في تركيز عميييييق جدا عند بدأ مذاكرة مادة محددة
ممكن أي طريقة تدخلك في تركيز عميق, لو بتحب تسمع حاجة معينة, أو بتحب تسد ودنك أو أي حاجة تخليك تركز
مش مقبول أبدا إنك تذاكر في وجود التليفيزيون, أو لو إنك قاعد مثلا و أخوك الحبوب متشعلق في النجفة و فاكر نفسه ماوكلي أو سبايدر مان
المذاكرة لازم تكون منعزل فيها ذهنيا عن العالم كله.
أنا عن نفسي, حاجة إتعلمتها من كام سنة وبقيت بطبقها دايما لما أحتاج أركز تركيز كامل في شغلي أو أي حاجة بتعلمها جديد, هي إني أسمع دوشة بيضاء, أو وايت نويز على الموبايل
وعلشان كده إحنا في شركة البرمجة اللي أنا بشتغل فيها, عملنا تطبيق دوشة بيضاء أو وايت نويز للموبايلات الأندرويد و الآيفون … هاتلاقوا اللينك بتاع التطبيقات دي في صندوق الوصف أسفل الفيديو
و مش لازم بالتحديد برامج الوايت نويز اللي إحنا عاملينها في شركتنا, ممكن أي برنامج وايت نويز مجاني و بدون إعلانات آخر
أنا أول لما ببدأ, بختار صوت بحر مثلا أو صوت أمطار أو أي صوت مختلف حسب الموود بتاعي, وباظبط الوقت على ٥٠ دقيقة, وأبدأ أشتغل
بدخل في غيبوبة تركييييز كاملة
الخطوة السابعة
إستمتع بالمذاكرة
حول وقت المذاكرة لوقت ممتع
خلي المذاكرة هي الحاجة اللي إنت نفسك تعملها
تقدر تعمل كده بسهولة جدا في الوقت المختلف اللي إحنا فيه حاليا, لأننا فعلا محبوسين في البيوت و مفيش حاجة نعملها
يعني عندنا وقت نستمتع بكتابة كل سطر و نستمتع بالكتابة على ورق أبيض أو كراسة جديدة و ألوان متعددة
ماعندناش أي حجة والله
ياااااه … تصدق أنا ماحسيتش إن الحلقة طويلة, حسيتها أقل من ٥ ساعات والله
تقدر تعمل لايك على الفيديو و تنطلق إلى أجمل مذاكرة … و تقدر ترجع للحلقة دي مرة تانية كل ما تحب تتشجع و تشحن نفسك طاقة إيجابية مرة تانية
لأن شحن الطاقة الإيجابية ده بيستمر يوم واحد بس … زي الأكل كده بالظبط … لما بتاكل, بتجوع بكرة
برضه, لما بتتشحن طاقة إيجابية وتشجيع كده, بترجع تاني تجوع بكرة
يالا… قوم و توكل على الله
وبالمناسبة السعيدة جدا دي, و بمناسبة إني ما بطلتش شغل على مشاريع كتير أنا شغال عليها و إنت بتتفرج عليا … لو تحب تتعلم تعمل فيديوهات كارتون أنيميشن من بداية طريقة كتابة إسكريبتس, و التسجيل الصوتي, والاستوري بورد و الأنيمياتيكس و تنفيذ الكارتون أنيميشن و طرق الربح المادي من عائد الفيديوهات الأنيميشن, تقدر تشترك في كورس تعلم صناعة فيديوهات كارتون أنيميشن والتربح منها مثل قنوات أسلوب
الكورس عبارة عن ٧٠ محاضرة فيديو مفصلين جدا
و ده طبعا علشان تبقى غني جدا و ملياردير و معاك أكتر من ٢٤٠ جنيه زيي كده,  و تصرف كل فلوسك على القهوة والكلام الفارغ
رابط الإشترراك في الكورس ب كوبون خصم موجود في صندوق الوصف تحت الفيديو
نورتنا والله
سلااااام

 

February 21, 2020  
  , ,