برنامج: أسلوب في دقيقة – الحلقة الرابعة: أنا مدمن تضييع وقت على الموبايل والكمبيوتر,هل فيه علاج؟
أهلا بيكم في الحلقة الرابعة من برنامج أسلوب في دقيقة
اللي بنجاوب فيه على الأسئلة اللي بتجيلنا في كومنتس… بس مانوعدكش إنها هاتكون دقيقة بالظبط
سؤال النهاردة جالنا كتيييير جدا… من الناس المدمنين والمتعاطيين والشمامين الإلكترونييين
أسئلة بتجيلنا طول الوقت, من ناس حالتها متأخرة جدا في الإدمان
—— أنا مدمن فايسبوك… ومحتاج حد يساعدني
—— أنا مقضي حياتي على يوتيوب … ووقتي كله بيضيع… وبندم وبتضايق بعد لما اليوم يضيع مني
— وقيس على كده بقى… كل الأسئلة الشبيهة بكده اللي بتجيلنا طول الوقت:
أنا بضييع وقت طول اليوم على الموبايل واللاب توب… على لعبة كلاش أوف كلانز, صب-واي, كاندي كراش, إنستاجرام, تويتر, بينتريست, واتس آب, فايبر, لاين… وغيرهم وغيرهم
تعددت المسميات… وكل واحد عنده نوع إدمان بيضيع وقته… ونفسه يساعد نفسه إنه يتعالج من الإدمان ده
إحنا النهاردة هانقولكم على حل لمشكلة الإدمان الإلكتروني ده, وبتجيب فعلا نتيجة مبهرة بجد… وبتجيب كمان نتيجة مبهرة للي عاوز يبطل تدخين أو متابعة حاجات مش كويسة على الإنترنت
أنا عن نفسي, طبقت الخطوات دي لما كنت مدمن لعبة ماين سويبر…ولما كنت مدمن متابعة أخبار من اللي بترفع الضغط… وبعدين مرة تانية لما كنت مدمن فايسبوك… ولما كنت مدمن لعبة ريوبيك كيوب… ولما كنت مدمن يوتيوب… وهافضل أطبقها دايما… لأنها فعلا بتجيب نتيجة من الآخر
هو حل واحد… بس بيتطبق في ٣ خطوات
شد ورقة وقلم… وشخبط معايا
الخطوة الأولى: خد قرار واعي … بإنك تساعد نفسك دلوقتي
===================================
—— أهم نقطة… إنك تعترف لنفسك وتصارح نفسك بإن إنت محتاج تساعد نفسك إنك تتخلص من نوع إدمان معين
وتاخد قرار واعي بإنك فعلا هاتحسن حياتك لما تبطل الإدمان بتاعك ده
الخطوة الثانية: حط مواعيد لجرعتك اليومية
===================================
الحاجات اللي إحنا مدمنينها نوعين… نوع ينفع ويفضل إن إحنا نبطله دلوقتي حالا وطول العمر… وحياتنا مش هاتنقص حاجة.. بالعكس هاتتحسن… زي أي حاجة مش كويسة بنعملها أو بنشوفها… ومعظم الألعاب وتضييع الوقت
وحاجات تانية أكيد محتاجينها للتواصل مع الناس… وللترفيه عن نفسنا
زي الفايسبوك ويوتيوب ووسائل التواصل الإجتماعي عموما… وبعض الألعاب … بس لازم تكون بجرعات معقولة…. ومقننة
في الخطوة دي… حدد إيه اللي عاوز تمنعه نهائي
وإيه اللي عاوز تعمله جرعة يومية محددة… زي مثلا… إنك ماتفتحش فايسبوك أو يوتيوب أبدا بعد الساعة ٧ مساءا… إنت حدد مواعيدك اللي تناسبك, والجرعة الصحيحة لنفسك
الخطوة الثالثة: خطوة العلاج
===================================
وهي دي الحلقة بتاعتنا كلها النهاردة
إنت قررت إنك هاتلتزم بعدم فتح حاجات معينة نهائي
وقررت إنك مثلا مش هاتفتح فايسبوك بعد الساعة ٧ مساءا
لما تيجي تفتح فايسبوك أو أي حاجة قررت ما تفتحهاش… مفيش مشكلة خالص… إفتحها وعيش حياتك على الآخر
بس بعد لما تخلص… تطلع ٢٠ جنيه .. وتتبرع بيهم لأحد المشروعات الخيرية اللي ينفع تتبرع ليهم عن طريق رسايل الموبايل
زي مثلا… المستشفيات اللي بتعالج السرطان وأمراض القلب والكبد بالمجان
و الجمعيات الخيرية زي جميعة رسالة وغيرها
الجميل جدا في الخطوة دي هو حاجتين:
الأولى… هي إنك مش بتعاقب نفسك ولا حاجة… بالعكس… إنت بتعمل حاجة كويسة جدا وبتعمل خير جميل… إنت نفسك محتاج تعمله
الثانية: هي مرررررررة واحدة… وعن تجربة من ناس كتييييرة جدا… هاتدفع مرة…
والمرة اللي جاية وإنت جاي تكسر القاعدة بتاعتك دي… الشيطان هايحلف عليك ما إنت فاتح فايسبوك أبدا
وهايقولك.. أعوذ بالله منك يا أخي… إنت إيه… شيطان… شيطان… ربنا يكفينا شرك وشر الفايسبوك
إكتبلنا دلوقتي في كومنت… إيه إدمانك اللي عاوز تعالجه… وأسئلتك لحلقاتنا اللي جاية
وشير ومنشن لكل أصحابك المدمنييييين
الحلقة على ساوند كلاود من هنا:
24 Responses to “برنامج: أسلوب في دقيقة – الحلقة الرابعة: أنا مدمن تضييع وقت على الموبايل والكمبيوتر,هل فيه علاج؟”
اول كومنت ليكم
كل سنه وانتم طيبين
اهم ادمان فعلا هو الفيس زفت
شكرا على أول كومنت منك 🙂
مرحبا
عندي مشكلة
انا تصلني اشعارات من تطبيق اسلوب و لما افتحها ما يطلعلي الموضوع
يطلعلي الصفحة الرئيسية
هسة انشر شي بعنوان “النهاردة يوم جميل….
و قبله و قبله بس كلها ما تطلعلي
شكرا جدا… إن شاء الله سوف يتم تصحيح النقطة دي في النسخة القادمة من برنامج أسلوب 🙂
أزاي اتغلب او اسيطر علي نفسيو اعمل الكلام البقولو
اشكركم جدا علهلفيديوهات الرائعه وان شا الله رح طبقها كلها وبعد الامتحانات رح رح قلكم اديش كان معدلي السنه دي والتاثير بتنظيم وقتي والناس حتلاحظ التغيرات دي ان شا اله
بسم الله ما شاء الله عليكم الحمد لله انا كان عندي ادمااان فيس بوك ولله الحمد من الفيديو اللي فات بتاع تقسيم الوقت والفيديو التاني اللي قولت فيه علي النوته اللي بشوف فيها ايه اللي بيحاول يلهيني عن انجاز مهام حياتي اكتر حاجه كانت (افتحي الفيس دقيقتين) ههههه ففهمت انه ادمان والحمد لله واجهت نفسي وقررت اني مفتحوش غير في وقت واحد بس طول اليوم ممنوع وبجد بقيت بنجز حاجات كتير مكونتش بلقيلها وقت الله يديم علينا نعمت انجازنا لما في خير لنا في ديننا ودنيانا ومحيانا ومماتنا وعاقبة امرنا
بجد روعه ربنا يحفظكم
ادمان هو الفيس بوك بس انا بحاول ان الوقت الى اقضيه عليه يكون فى مواضيع مفيدة
ممكن تعملوا حلقة عن ازاي اتخلص من عاده سيئة أو سلبيه بشكل عام
كمان ازاي اكتسب عادات جديدة وتبقى جزء من حياتي 😁😄😄
MineSweeper!! يااااه يا عبدالصمد 😀
بس البرنامج جميل ماشاء الله, استمروا 🙂
بجد موقع مفيد جدا انا متابعه بقالي حوالي اسبوعين كدا ..مستجد يعني …
بس في مشكلة بتقابلني ..انا عايز حاجة تعزز ارادتي وتخليني اخد القرار الصح في الوقت الصح
شكرا ليكو سواء اهتميتوا بكلامي او لا …لان انا فعلا استفدت
مدمنه فيس وواتساب يااارب الحل ده ينفع معايا
قناة رائعه وفيديوهات عمليه مختصرة فى الصميم
جزاكم الله خيرا
انا عندي مشكلة الادمان للتضيع الوقت بس مش الالكتروني … ولان في ثانويه عامة لغي كل التطبيقات من علي الموبايل …. معرفش الوقت بيضيع في ايه بالظبط ممكن يوصل لاكتر من ساعتين خاصة.. بعد ما اوصل البيت بعد يوم طويل في الدروس …بغير هدومي و اكل و اصلي حاجات كلها كده علي بعضها متكملش تلت ساعة بس بتطول
انا كان ادماني لعبة clash of clans بس الحمد لله مسحتها
استفدت من الحلقة جداااا 👍😊
بس ياريت لو حد يعرف برنامج يتحكم في قفل الفيس لفترة معين خلال اليوم يقولنا
انا كنت سمعت عنه قبل كدا بس مش عارفه اسمه
فعلا من البرنامج الوحيد بجوالي اللي استفيد منه
فعلا من البرنامج الوحيد بجوالي اللي استفيد منه
بسم الله الرحمن الرحيم،
و الصلاة و السلام على اشرف الخلق اجمعيــن.
احببت ان اقدم لكم هذه الهدية المتواضعة:
مدونة خاصة بقناة اسلوب ـ Osloop فيها جميــع افلام قناة اسلوب في صفحة واحدة
هذه المدونة ملكيتكم انتم، يعني (راسلوني للحصول على بيانات الدخول)
هدا اقل ما يمكن فعله لشكركم على مجهودكم الجبار و المفيــد لامة محمد
انا مدمنة نوووم 😪اعمل ايه بئه 😭
انا مذاكرتش خلاص من اول الترم ومش عارفة ابدا منين وكل لما اجى اقول انا هذاكر مش ببقى عارفة ابدا منين
league of legend لعبه ادمان جدااااااااااااا
بس مش لاقى طريقه اتخلص منها
جرتب نفذت طريقة ال ٢٠ جنيه تبرع اللي في الحلقة؟
جربها بس وشووووووف النتائج