غير حياتك: النوم الكتير – قصة هروب الطلاب من المذاكرة للنوم – أستوديو أسلوب – الحلقة السادسة
أهلا بيكم في الحلقة السادسة من برنامج أستوديو أسلوب… وحلقة خاصة جدا … لأنها بتناقش قضية مهمة أوي للطلبة
في طلبة كتير جدا… بتهرب من المذاكرة … وتنام… مع إنها مش بتكون محتاجة تنام
وناس كتير بتقولنا… أنا بيكبس عليا النوم أول لما ببدأ أذاكر… وأقول هانام شوية … وأصحى أكسر الدنيا مذاكرة… وطبعا مش بيصحوا
وإحنا جايين نفكر مع بعض في النقطة المهمة دي
خلينا نقولك الأول
في دراسة إتعملت على الناس الناجحة في العالم
وهما بيعملوا إيه علشان يوصلوا للنجاح
كان النوم الطويل بالنسبة لهم عبارة عن تضييع وقت
وكانو بيعتمدوا على نظام القيلولة
أديسون مثلا كان بياخد أكثر من قيلولة خلال اليوم
ليناردوا دا فينشي كان بينام ٢٠ دقيقة كل ٤ ساعات…
وهو ده كان نظام وعادات نومهم
كل الناس الناجحة دي ماكنتش بتنام نوم طويل
علشان كده كانوا مختلفين عن أي حد
كانوا مهوسين بفكرة النجاح… لدرجة إنهم ماكنش عندهم وقت يضيعوه في النوم
مش مفاجئة إن الناس الناجحة بتحط خطة حقيقية للنوم بتاعها… والطلبة اللي بتجيب أعلى الدرجات… بيبقى النوم عندها فعلا بقوانين صارمة
إحسبها معايا… لو إنت طالب بتنام ٨ ساعات في اليوم… يبقى في السنة بتنام ٤ شهور كاملين ….… مع كل ساعة واحدة زيادة نوم في اليوم… بتنام ١٥ يوم زيادة
المتفوقين دايما بيناموا في أيام الأسبوع حوالي خمس ساعات ونصف… وفي الويك إند والآجازات ٨ ساعات… يعني متوسط نومهم حوالي ٦ ساعات …. يعني هما بيكونوا صاحيين شهر كامل زيادة عن الناس العادية
مستحيل واحد بينام في اليوم ١٠ ساعات يقدر ينافس واحد متوسط نومه ٦ ساعات…
لا يمكن تكون ناجح… بدون تضحيات في الراحة والنوم
:وزي ما قال الإمام الشافعي
- بقدرِ الكدِّ تكتسبُ المعالي ومن طلب العلا سهر الليالي
:وزي ما قال عمر الخيام
- ما اطال النوم عمرا .. ولا قصر في الاعمار طول السهر
:السؤال دلوقتي ليك
إنت عاوز؟ ولا إنت عااااااوز؟
إنت عاوز تنجح السنة دي؟
ولا مش فارقة معاك إنك تدبلر (تسقط)؟
إنت أكيد عاوز تنجح … ونجاح كبير كمان علشان تفتخر بنفسك… علشان تحترم نفسك… علشان تفرح عيلتك
ولا الحاجات دي مش في دماغك أصلا؟
لو عاوز توصل للسعادة في حياتك… النجاح هو اللي هايخليك سعيد
إوعى تستنى السعادة تدخل حياتك علشان تنجح
النجاح هو الوسيلة الوحيدة للسعادة
السبيل الوحيد لإحترام الناس ليك
الحل الوحيد لتحقيق ثقتك بنفسك
النجاح ببساطة هو الحل لكل مشاكلك
النجاح مش محتاج منك بس إنك تتمناه… النجاح محتاج منك إنك تموت نفسك وتجتهد وماتنامش
إنوي دلوقتي إنك تموت نفسك إجتهاد ومذاكرة
وقول أنا مش هنام… أنا هذاكر صبح وليل وهاتحمل الألم
لو ماحستش بالألم بتاع إجتهادك وتضحيتك بوقت راحتك ونومك… عمرك ما هاتحس إنك إجتهدت
هاتحس إنك إجتهدت… وهاتحس بطعم النجاح… لما تحس بألم إجبار النفس على إنك تقعد تذاكر…. في الوقت اللي نفسك تنام فيه
إثبت لنفسك إنك تقدر
إجبار النفس عبارة عن عضلة زي أي عضلة في جسمك… بتكون ضعيفة في الأول ومش بتقوى غير بالتمرين
مرن نفسك إنك تقاوم النوم… وتدفع تمن النجاح من مجهودك
في ناس محترفة كلام من بناع… لأه… إحنا لازم ننام كتير علشان نقدر نرتحاح وننتج والكلام الكبير ده… نام ١٦ ساعة في اليوم لو عاوز… إحنا فرحانين لك طالما ماعندكش مشكلة… بس إحنا النهاردة بنخاطب الناس اللي عاوزة تتميز عن غيرها… مش الناس اللي بتحسب لنفسها هي نامت كفاية ولا لأه
قولنا في كومنت… إنت بتنام كام ساعة في اليوم… وخطتك إيه علشان تقدر تصحي نفسك في وقت المذاكرة
إعمل شير للحلقة دي مع كل أصدقائك… وإعمل ليهم منشن كمان
وإعمل سابسكرايب لقناة أسلوب على يوتيوب… علشان توصلك كل حلقاتنا اللي جاية
الحلقة صوت فقط على ساوند كلاود
15 Responses to “غير حياتك: النوم الكتير – قصة هروب الطلاب من المذاكرة للنوم – أستوديو أسلوب – الحلقة السادسة”
انا بنتي في الصف الخامس وتنام من 10 لي 11ساعة في اليوم ومش عارفة اعمل معاها ايه
خليها تشوف الحلقة 🤔
بنتك محتاجة لتشجيع مادي ومعنوي
مثلا تحكيلها لو جبتي كدة هجيبلك الهدية الفلانية او هخرجك رحلة او .. او..
برضه احتمال تكون في مرحة التغيير الجسدي وهاي مرحلة بيفقد الجسم كميات كبيرة من طاقته
انا بنام كل يوم من الساعه ١ ل ٥.٥ الفجر .. وبستمر طول اليوم عادي .. بس يومين كدا وبنخ وبفضل نايم للساعه ١١ .. بس تقريبا كدا الصحيان او قلة النوم عندي مفيش فايده منه لاني بضيع وقت كتير جدا في ايه مش عارف .. حتي لم بذاكر مبجمعش معلومات كتير او بنسي اللي بذاكره بسرعه ،.. !
انا رح اساعدك شوية
فكر في ما بعد النجاح هيكون شعورك ايه
اسال نفسك الايئلة دي
انا عاوز ايه ؟؟
ازاي اوصل لكدة ؟؟
لمتى رح اضيع وقتي مثلا بالانترنت او غيره ؟؟
اما بالنسبة لانك بتنسى ده لانك مش متعود عالدراسة بمرور الوقت هتصير 100%
انا بنام كتير جدااااااا خصوصااا لو عندى مشكله … الاول كان الموضوع بيعدى لان مكنش عندى امتحان وتلضغوط مش كتير بس دلوقتى عمدى امتحان والوقت ضييق وكمان المشاكل كتير اووى كل دا وانا مش قادرا اواجهه وافضل صاحيه وافصل دماغى وارككز ف المذاكره وبس
للاسف انا مرتبطة جدا بالنوم..لو حصل اى مشكلة بدخل انام حتى لو مش جيلى نوم ..بس بجد بعد الفديو ده هبدا التزم بتقليل عدد ساعات النوم.
شكرا لمجهودكم
انا مراات بنااام كتييير اووي ومرراات لا لما انوووم بنوووم لي اكتر من 7ساعات
بجد بجد انتو موقع رهييييب كلامكو و طريقة عرضكو للكلام غير عادي ( incredible )
كل اللي اقدر اقولو ربنا يوفقكو و يبقى ده كلو في ميزان حسناتكو بتدو طاقة ايجابية مش طبيعية في نفس الانسان بجد بجد راااااااااااااااااااااااائع جدااااااا
انا بنان كتيير اوي ولما باجي من الكليه لما كنت بفكر في المزاكره بقي عايز انام ، …. بس دي وقتي خطتي علشان ازاكر و أنجح هستعين بالله ومش هضيع وقت علشان هسأل عليه ..،
بشكر كل الناس اللي قيمة علي أسلوب انا بسمعكو علي طول يارب متتوقفوش ابدا ، انتو غيرتو حجات كتيير في حياتي
انا فى ثانوية عامة..و زى م انتو عارفين مش فاضل كتير من الوقت انا كنت بنام كتير بس اتخلصت من المشكلة دى..بس انا مش بذاكر و دى المشكلة…حاسة انو انا مقصرة فى حق نفسى…اعمل إيه؟
انا بنان كتيير اوي ولما باجي من الكليه لما كنت بفكر في المزاكره بقي عايز انام ، …. بس دي وقتي خطتي علشان ازاكر و أنجح هستعين بالله ومش هضيع وقت علشان هسأل عليه ..،
بشكر كل الناس اللي قيمة علي أسلوب انا بسمعكو علي طول يارب متتوقفوش ابدا ، انتو غيرتو حجات كتيير في حياتي
انا بنان كتيير اوي ولما باجي من الكليه لما كنت بفكر في المزاكره بقي عايز انام ، …. بس دي وقتي خطتي علشان ازاكر و أنجح هستعين بالله ومش هضيع وقت علشان هسأل عليه ..،
بشكر كل الناس اللي قيمة علي أسلوب انا بسمعكو علي طول يارب متتوقفوش ابدا ، انتو غيرتو حجات كتيير في حياتي
السلام عليكم ورحمة الله وبركاته
ياليت بدلا من ذكر ليناردو واديسون ذكرتم علماء المسلمين مثل الشيخ الألباني وابن باز والعثيمين رحمهم الله كانوا ينامون في اليوم 4ساعات فقط
أنا مش عارف أتحكم في سعات نومي ، أنا بنام يوميا من ١٠ ل١١ سعاة . أعمل أيه