قهوة الصباح من أسلوب: الأشغال متراكمة؟

قهوة الصباح
الشغل اللي وراك تراكم عليك لدرجة إنك خلاص ملوش معنى إنك تبدأ في أي حاجة؟
الدنيا كلها متلخبطة معاك ومفيش أمل تصلح حاجة؟
المذاكرة اللي وراك كبيرة جدا لدرجة إنك ماينفعش تبدأ؟
…. مبروك… لأن الموضوع ده طبيعي جدا جدا جدا… وبيحصلك دلوقتي وهايحصلك كتيييير أوي تاني في المستقبل
وبيحصل للي بيطلع الأول في كل حاجة وبيحصل لأصحاب النجاحات المشهورة وأصحاب البطولات والأرقام القياسية وبيحصل للطلاب اللي بيطلعوا الأوائل
… ده… جزء من قوانين الكون والحياة
إنك هايجي عليك وقت, تحس إن الدنيا دي كلها أشغال وطلبات متراكمة عليك, وإنت مفيش وراك غير إنك تهرب في يوتيوب أو فايسبوك أو لعبة أو تضيييع وقت, لأنك كده أو كده عارف إنك مش هاتعرف تعمل الشغل اللي وراك
….. بس….
في حل
وحل أكييييد كمان
الحل ببساطة هو إنك توقف حياتك كلها كلها كلها
وتعمل ريستارت
وتبدأ من الصفر تاني
الموضوع ممكن يبان إنه صعب
لكنه الحل الوحيد
إنك تبدأ من الصفر في أي حاجة بتعملها
ترمي كل المهام والمشغوليات اللي وراك كلها بلا إستثناء من الشباك
وتبدأ تجيب ورق أبيض, وتبدأ تكتب بذهن صافي كل حاجة وراك
وتبدأ من الصفر تاني
هاتحس براحة غريبة أوي
وهاتقدر فعلا تشتغل وتخلص كل حاجة وراك
وشوف الحلقة دي, بنتكلم فيها عن الموضوع ده بالتفصيل

ومبروك والله بجد… الفرصة الجديدة اللي إنت فيها دلوقتي
الحمد لله الحمد لله الحمد لله الذي رزقنا كلنا الفرصة دي دلوقتي
فرصة إننا نوقف كل حاجة بنعملها ونبدأ من الصفر تاني